Read bura-pabir Ishaya 52 Bible Online

Ishaya 52 - bura-pabir bible

Ishaya 52

¹Thlata, Urushalima, thlatə kara ndzi ɓəɓal! Hatə ləptər kuthlikur, di na ɓɗakkarkara! Kərɗi aɗi ata jaktə ləkwa nyarfur ngə wa.

²Ɓumta dza ga ɓɗaku Urushalima! Thlata akwa bərbər ni kara lətə dəkələr nga! Mpəlɓəla səwu na akwa wulya gə ni, gə na mdər Sihiyona na mbwimbwiyari!

³MTHLAKU na olta shang akwa pəla aka mjirni, “Sakatə I ɗələmta giri I aɗi ka dlu kwaba wa, antə kulini tə I ata pəli giri I aɗi ata ntə kwaba wa.

⁴Ntangkəmar mwarər giri ahar Masar, giri ku ndzəndzi anda apa mətəpi. Amma aghəla nda mjir Assiriya ku na giri bwani kula suari aɗi.

⁵Antə kulini an su na akwa hara ahar Babila: Giri ku ndzi mafayeri kula suari aɗi. Mdə ku fatə giri kula suari aɗi. Mji ol'olər giri akwa tuwa kamnyar bwani, tədək viri mjir Babila akwa ɓzamtə thləmi.

⁶Antə akwa saka na ata sə si aghəlazi giri ata sə sənda abbər I an Hyel ka tsuwa I ku gari ka giri.”

⁷Kəmar ɓɗakkur səla ɗa ata gar ni aɗi wa! Səla mjir səntə labar na msəra ni! Sakatə mdər thlenta akwa səghəi ka labar na msəra! Sakatə tsa akwa psəmnya akwa Urushalima labar msərakur ka ar mbantədzi abbər, “Hyel na ar ngə ni an Kuthli!”

⁸Ngga giri mjir səka akwa hara kuraku, da akwa hara kurakər kucali! Kamnyar da akwa wul ngkar MTHLAKU akwa Sihiyona ka nca ɗa sur ɗa!

⁹Pthləngkər giri har kucali, shanga vəyayeri na ku ndlagamtadzi akwa Urushalima! Kamnyar MTHLAKU ku mbuli Urushalima, ka shiktə ɗəffa mjirni.

¹⁰MTHLAKU ku ncantə dunarni, ata nca shanga mjir duniya, antə shanga mjir duniya ata sə wutə mbantədzi ar Hyel.

¹¹Mwa giri ka giri ləɓəla kazhar Babila, shanga giri na akwa fa kari kutambwar vəngkər səli! Giri aɗiya tsəkwar su na adiya wa, ka giri ndzi kəcəkəcari, ka ləɓəla kazhar ɗa.

¹²Akwa saka ngəni giri aɗi ata ləɓəla ka huvə wa, giri aɗi akwa hwi ta mpika giri wa. MTHLAKU na Hyelər giri ata pwar giri, ka tsəlpi giri bwahili ka bwakəma.

¹³MTHLAKU akwa pəla, “Buɗarna ata səma akwa kəthlərərni, mda ata sə hu ni ka nar səli na ola, antə tsa ata ndzi mdə na ola ka səli.

¹⁴Mji hang ku ndatədzi sakatə da wutə ni, dlaɓwa ku hilantə dzari ka pali ni apa tsa mdə wa, antə dzari ku ndzi zum ta dza mji.

¹⁵Antə tsa ata ndəndatə mjir tsəɗiyayeri hang, kuthlyayeri ata kəsi mnya ɗa kamnyar ndatədzi ata kərari. Kamnyar su tə mda aɗi ɗar gari ala ɗa ata kər wa, antə da ata wutari, su tə da aɗi ɗar nggatə su ata kər wa, antə da ata nggaɓəlari.”