Read bura-pabir Ishaya 53 Bible Online

Ishaya 53 - bura-pabir bible

Ishaya 53

¹Mji ni shinau abbər, “Wan ata mbərsa ka gari tə mburu nggatə nə ri? Tsuwa aka wa antə Mthlaku ncantə dunarni nə ri?

²MTHLAKU an ɗəmhə ka buɗarni kəla apa su na haɗa ptsa na kukwa səl akwa vəi na ul'ulari. Tsa aɗi ka olkur wala ɓɗakkur dza na amzhi ka mburu wul ni wa, wala dakwi dzau na andəkərtə hangkala mburu wa.

³Mburu ku rutə ni ka nggəlar ni, tsa ku ɗar bwani ka ndzi ka ɗəffə ɓzəɓza. Mda aɗi na hir wul ni ma wa, mburu ku rutə ni ka namta apa tsa aɗi suma wa.”

⁴“Amma wala apani tsa ku kətə shilkayeri ar mburu ka ɗəffə ɓzəɓza ar mburu. Amma ba kulini mburu kəta abbər Hyel an akwa ɗi ni ka hara bwani alari kamnyar bikərni.

⁵Amma kamnyar bikər mburu antə mji ku dəkəi ni, kamnyar ɗimikur mburu antə mji ku dlaɓu ni. Atar ɗya tə mdə hara alari antə mburu ku wutə lapiyakur, atar mnya kwandeng arni antə mburu ku mbəi.

⁶Shanga mburu ku sha akwa laku apa təma, shanga mburu akwa nu lakur mburu pal pal. Amma wala apani MTHLAKU ku vu tə tsa ɗar bwani, ata vəya ka mburu ka kəra mburu an ɗar bwani.”

⁷“Mji ku hara alari bwani ka duna, amma tsa aɗi mburar mnyari wa. Mdə ndəkərtə ni apa ɓzər gam tə mda akwa mwantari aka mdər thla wulyari, tsuwa apatə təma ana dləɓ səri akəma mdər pamta shishirni, tsa aɗi mburar mnyari wa.

⁸Mdə ku hara alari shariya na kula jirkur, ka təra ka tsa kamnyar ka mdə ra tsi ni, Akwa zamanərni wan damitədzi ka tsa ri? Kamnyar mdə ku ndəkəmta ni ka duniyar mji na ka mpika, ka tsi ni kamnyar bikər mjirni.

⁹Da harəmta ni apa mdə na ɗimi ɗimi, ka ɗuwar ni akwa kulər mdər gəna, wala tə tsa aɗi ɗar ɓzamtə su wa, wala ɗar pwaktə mdə wa.”

¹⁰MTHLAKU akwa pəla, “I wuta abbər kalkal ka tsa ɗar bwani, kamnyar ma tsa ku hamta mpikari ka ndzi saɗakar tifəmta biku, tsa ata fəi ka mpika ka wutə kəkayeri arni. Antə atar ni su tə I ɗəmha ata nghyaɓəladzi.

¹¹Aghəla tə tsa ku ɗar bwani, tsa ata sə nggatə msərakur, tsa ata sə nggaɓəla abbər bwani tə tsa ɗari ni aɗi ndzi gapani wa. Wala tə buɗarni an kula biku, tsa ata ɗar bwani kamnyar bikər mji, kamnyar ka hang akwa nca ɗa sə ndzi kula biku.

¹²Apani I ata nar vəi ndzəndzi na ka səli, vəi ndzəndzi akwa nca mji na ol'ola ka kuthlikur. Kamnyar tsa ku hir ka hamta mpikari, tə mdə ku jikau ni akwa nca mjir biku. Tsa ku kətə bikər mji hang, ka kiɗə Hyel ka tsa tifəmta ala ɗa bikər ɗa.”