Read bura-pabir Ishaya 54 Bible Online

Ishaya 54 - bura-pabir bible

Ishaya 54

¹MTHLAKU akwa pəla, “Hara ha, mwala ciri, gə na aɗi ɗar yaɓəla ɓzər wa, gə na aɗi ɗar kutərya wa, Kamnyar maɗa' mwala tə salərni təra kazhar ni, ku hara hangta maɗa' mwala na ka sal!

²Kəlar bəbal kuta tentər nga ka tsa ndzi ola, namtə lapəlayerari ka da ndzi saɓəl saɓəl! Ndərar səwayeri ar nga, ga aɗiya pərtə ɗa wa, kara nci udzəmayeri ar nga ɓəɓal

³Ga ata kəlar baukurərni təbwa mazəm ka matsəkar, kəkayeri ar nga ata mbultsə tsəɗiyayeri damwa. Antə giri ata ndzəndzi akwa bərniyayeri tə mji hwi kazhari.”

⁴“Ga aɗiya thlivər wa, wala zhar ka hangkala gə dzatədzi wa, kamnyar ga aɗi ata jaktə ləkwa sur səli wa. Ga ata fwari ata kəra sur səli tə gə hara akwa mwala bilənkur nga, ka sur cika tə gə hara akwa kughung kur nga.

⁵Kamnyar mdə na nam nga ata ndzi ala ga apa salngkiri, MTHLAKU na ka Duna ta Shang an thləmari. Hyel na ɓɗakkarkara ar Israila an ata pəli nga, tsa an ola ata kəra duniya ni swakti.”

⁶Kamnyar Israila, gə ndzi apa amaliya, natə salngkiɗa ku psi ni tə tsa ku ndzi ka ɗəffari ɓzəɓzari, apa kwaɓdaɓər mwala tə salngkiɗa kədləmta. Amma MTHLAKU akwa kalaktə nga, ka pəla,

⁷“I ku kədləmta nga mnyar saka laga raka, amma I akwa kətadzə nga hang kamta antə I ata kalaktə nga.

⁸Akwa sakatə ɗəffi ku ɓzi ka duna, I ku shinar kəmi kazhar nga, amma kulini I ata kətadzə nga ka hir nga ba saka madi.” MTHLAKU na mbantə nga akwa pəla,

⁹“Akwa sakar Nuhu I ku hara alkawal, abbər I aɗi ata jaktə shamta duniya ka avava wa. Antə kulini I ku kətə alkawal abbər ɗəffi aɗi ata ɓza adzə nga kəra wa, I aɗi ata mpa ala gə kəra wa.

¹⁰Kamnyar garayeri kəga ɗəɗəgəlayeri ata mzhi ndla ka sha, amma hirkurərna na apalidzə wa ata ndzi adzə nga ba saka madi, I ata kəsi alkawalər msərakur ka ga ba saka madi.”

¹¹MTHLAKU akwa pəla, “Ai Urushalima, ga ku ɗar bwani, kəwal ku titiləmta nga, nggədza mdər dlarər nga aɗi wa, amma I ata jaktə nci səla ga ka pelar dəɓa.

¹²I ata latə mbwayeri na nal nal ka pelar dəɓa na mamza njau, ka latə nyarfayeri ar giri ka pela na ata hamta parakəu apa u'u, ka katanggar giri ka pelar dəɓa.”

¹³“I surna an ata thlipa aka mjir nga, ka vu ka da wutə ləkəma ka msərakur.

¹⁴Su na kalkal ka jirkur an ata namtə kara ndzi ka duna, mjir na gə bwani ka sur thlivəra ata ndzi ciju ka ga.

¹⁵Jiri su aɗi na ata wutə ngə wa. Kəlara mdə na ku bara mpar nga, kula tsa tsəkwitə ra tsa ata ndla ka hamta kərni akwa tsiya ga.”

¹⁶“Ka gə ɗangta abbər I an alaktə mdər ɓdla, na ana mbatə u'u ka ɓdlətə sur mpa kəgari. Tsuwa I an alaktə soja, na ana kəthlər ka kari mpa ka kurəmta mji.

¹⁷Amma vir nda sur mpa aɗi na ata mzhi dəkəi nga wala raka wa, tsuwa ga ata ɓəli shanga thlandər tə mdə ɗəmha ata kəra ga akwa mbwar shariya. I ata mbuli buɗayeri arna ka hamta ala ɗa nggyari su. I na MTHLAKU an pəla gari ni.”