Read bura-pabir Ishaya 55 Bible Online

Ishaya 55 - bura-pabir bible

Ishaya 55

¹MTHLAKU akwa pəla, “Sər giri, shanga giri na ka thləli, sər giri ka giri sa yimi! Tsuwa shanga giri na kula kwaba, sər giri ka giri kwasə su tə giri akwa barari! Sər giri ka giri sa yimər anap ka uwa gapani kula shamta wala kwaba pal!

²Kamnyar mə tə giri ata shamta kwabar giri ata kəra su na andlantə giri wa ri? Kamnyar mə tə giri ana tsi duna giri akwa kəthlər kamnyar su na atsi mi wa ri? Psi gir thləm ka hangkal ka giri hara su tə I ata pəla ala giri, antə giri ata səm susəma na msəra!

³Kəlar giri thləma giri, ka giri si adzə ra, psi gir thləma giri ali, antə giri ata ndzi ka mpika! I ata mbwi alkawal na ata fəi ka giri, ka hamta ala giri barkayeri natə I kətə alkawalari aka Dauda.

⁴I ku vəi ni mdə ola ka kuthlir tsəɗiyayeri, atar ni antə I ku ncantə dunarna ala ɗa.

⁵Ata saka nda ga ata kəga durayeri damwa, natə akwa saka na təramta da aɗi səndə ngə wa, amma saka nda da ata sə hwi si adzə nga! I na MTHLAKU na Hyelər nga, Hyelər Israila na ɓɗakkarkara, ata vu ka su ngəni hara, I ata na gə səli ka olkur.”

⁶“Bara gir MTHLAKU tsu kulini tə giri ata mzhi wutə ni, ndər giri alari kulini tə tsa tsu kudzəha.

⁷Ka mji na ɗimi zhar surharar ɗa ka pali dzamər ɗa. Ka da ngka adzə MTHLAKU na Hyelər mburu, antə tsa ata kətadzə ɗa ka tifəmta ala ɗa bikər ɗa.”

⁸Kamnyar MTHLAKU akwa pəla, “Dzamərna an zum ka dzamər giri, tsuwa lakurna an zum ka lakur giri.

⁹Apatə vəi na amtazi ku ndzi ciju miu ta duniya, apani antə lakurna ku ndzi nal ka təramta lakur giri tsuwa dzamərna ku təramta dzamər giri.”

¹⁰“Yimi ka handzəkəla ana thlata akwa vəi na amtazi ka səghəi kamnyar ləɓantə duniya. Da ana vu ka sur fakə kəla ka ya munya kamnyar hwulfa ka susəma.

¹¹Tsu apani an ata hara ka ndər tə I pəla, tsa aɗi ata ngka adzə ra kula kuri su na mwantə ni wa, tsa ata hara shanga su tə I thlentə ni ka tsa hara.”

¹²“Giri ata sə ləɓəla kazhar Babila ka kucali, ka ngka akwa tsəɗiyir giri akwa msərakur. Garayeri kəga ɗəɗəgəlayeri ata sə pthli ha, nfwayeri na akwa mtakəu ata sə kucali ka kuraku.

¹³Ata vəi tə mtəhərayeri ana kəla akwa, nfu na ɓɗakɓɗaku an ata ptsi anda. Antə su ngəni ata ndzi sur ɗangtə na ata fi, sur ɗangta ata kəra su tə I na MTHLAKU ku hara.”