Read bura-pabir Ishaya 57 Bible Online

Ishaya 57 - bura-pabir bible

Ishaya 57

¹Mji na ka jirkur ana mta kwabə sakar ɗa, amma mda aɗi na ana dzam su ata kər wala damitədzi ka yu su abbər kamnyar mə ri wa. Mda aɗi na ana nggaɓəla abbər mji ngəni ku msər ta bwaniyir duniya wa

²Kamnyar ma mji na ka jirkur ku mti da ata ləkwa msərakur ka ghərəmtaghəra.

³Amma ar giri, giri na mjir biku sər giri azi! Sər giri ka mdə hara ala giri shariya, giri na ku hakdzi, ka lək mwala' mda, ka hara karwakur.

⁴Giri akwa kumshi ka hara kyartəkur ka ndəraɓəla kyanggyara giri ni aka wa ri? Giri an mjir biku ka mjir thlandər!

⁵Giri ana tsi kər giri akwa vəngkər səli aka haptayeri ar kəl hur na akira kəlara nfur ok. Giri ana ra thla haptu ka maɗa' giri akwa mularayeri, ka akira pelayeri na ol'ola na ku nggəidzi.

⁶Ga ku fatə pelayeri na lələɓu lələɓu akwa mularayeri ka vəngkər səli ala ɗa. Ga ana ɗangkər saɗakar yimər anap ka sənta ala ɗa saɗakar mthli. Ga ana wuta apa su ngənayeri ni ata kəs kəri ya?

⁷Ga ana namtə dəkələr nga ata kəra garayeri na nal nal ka hamta saɗakayeri ka ləka.

⁸Ga ana fwari ata kəri, ka ncigəi haptayeri anyarmbwar nga avəivəi ka vəngkər səli ala ɗa. Ga ku fəi zhaɓər nga ka lətə dəkələr nga ka kəlar ɗa bau, kamnyar pi ka haptayeri ni kalkal ka kwaba tə giri thlamta ata kər. Apani ga ku wul durakurər ɗa ka nggatə msərakurər ɗa.

⁹Giri ana kəkərtə tulariyayeri zumzum ka ra vəngkər səli aka haptu Molek. Giri ana ra bara sauri akwa vəyayeri na ciju ba aghəyazi akəla mjir mambəla.

¹⁰Giri ana ghəra akwa ra bara haptayeri, amma giri aɗi ana wuta abbər giri akwa ghər gapani wa. Təng suari ana ntsətə giri ka giri ləkəma.

¹¹MTHLAKU akwa pəla, “Ngəni jili haptu mada ri na ata vu ka giri thlivəra ka yakata, har tə giri ata fwari ata kəri ka thlandər ni? Apa I ku dləɓ səri kamtə ya tə har giri aɗi akwa thlivər ɗəffi wa ni?

¹²I ata puɓəla surharar giri tə giri akwa wulari apa kalkal ni ata bəbal. Antə haptu wala duku aɗi na ata mzhi dlar giri wa.

¹³Mbura wula ma haptayeri ni ku mzhi dlar giri sakatə giri akwa tuwa dlara! Wala shambar na raka ata fimta ɗa ka təra ka da! Amma mji na ku mbərsa ka iya ata ndzi mthlakər tsəɗi ni ka fa kifər vəi vəngkər səli ali.”

¹⁴MTHLAKU akwa pəla, “Namtə giri laku, ka giri ɗəmhə ni ɓɗaku! Famta giri shanga surtsasəl kazhar laku aka mjirna!”

¹⁵I an Hyel na ɓɗakkarkara na amta ka na ka olkur, na ka mpika ba saka madi. I ana ndzi akwa vəi na amta ka Vəi na Ɓɗakkarkara, ka tsuwa adzə mji na ka kanaɗi ka ɗəffər tubi. I ana dunautə ɗa ka da ndzi ka hamta jiri ka vu su akwa ɗəffu.

¹⁶I aɗi ata ləkəma ka mpa ala ɗa wa, wala zhar ka ɗəffi ləkəma ka ɓzi adzə ɗa ba saka madi wa. Kamnyar ma I ku hara apani, dza ɗa ata mta, antə shanga ɗa ata ndzi kula vu su akwa ɗəffu.

¹⁷Ɗəffi ku ɓzi adzə ɗa kamnyar mbulamkur tə da hara. Antə I ɗi ɗa ka zhar ɗa shiɗa. Amma da ku ləkəma ka hara su tə ɗəffa ɗa hira, ka ngka ka bwahili.

¹⁸I ku wutə su tə da ana hara, amma wala apani I ata mbantə ɗa! I ata pwar ɗa ka shiktə mji na ka ɗəffə ɓzəɓza.

¹⁹I ata hamta msərakur aka shanga mji, mji na ciju ka na kudzəha. I ata mbantə ɗa.

²⁰Amma mji na ɗimi aɗi ka ɗəffu pəpəipəpəi wa, da ndzi apa yimi tə shambar akwa fa ri. Tsa aɗi ana pwi wa, parang tsa akwa kənggəra nghyinghyari ka kusar ka diɗi.

²¹Amma Hyelərna akwa pəla. “Saka aɗi tə kəmanggar ata ndzi ka ɗəffari pwipwiyari wa.”