Read bura-pabir Ishaya 58 Bible Online

Ishaya 58 - bura-pabir bible

Ishaya 58

¹MTHLAKU akwa pəla, Haptə kuraka gə ola apatə ga amzhi! Psəmnya aka mjirna Israila ata kəra bikayeri tə da hara!

²Tədək viri da ana vəngkər səli ali, apa dlu hangkala ɗa akwa bara səndə tsawurna ka da ɓəlata. Da ana hara su apa da tsəɗi na akwa hara su kalkal, na aɗi ata ndək ka Hyelər ɗa wa. Da hir ncanta apa da ana nggatə msərakur vəngkər səli ali ka bara kəi hara ala ɗa shariyar jirkur.

³Da ana pəla, “Apa madi tə yeru ata ngkatə susəma aka mnya yeru akwa asham amma ga ana hamta kəma ga apa ga aɗi wutə wa nə ri? Apa madi tə yeru ata tərghəi kəra yeru amma ga aɗi ana damitədzi kəgari wa ri?” MTHLAKU akwa pəla ala ɗa, “Ar jirkur su, akwa sakatə giri akwa kəl asham ni giri akwa hara su tə ɗəffa giri hira, ka nar bwani aka mjir kəthlər ar giri.

⁴Giri ana tsikəra ashamər giri ka beɗi ka mpa, ka tsa nvwa giri ka matəkum. Apani I aɗi ka sakar ngga adduwar giri akwa jili asham ngəni wa.

⁵Giri ana wula apa ma giri tərghəi kəra giri, ka nggyarghəi kəra giri apa ntsəhəl, ka pshari dasa ka kuktətə pənju ka ndzəndzi ata ni an asham ni ya? Gir ana wuta apa I ata dlu ala giri jili asham ngəni ya?”

⁶Nggədza jili asham tə I akwa barari: ka giri msərantə mji natə aɗi kalkal ka mdə mbwi ɗa akwa pərsəna wa, ka zhar nar bwani aka mjir kəthlər na akira giri. Ka giri msərantə mji natə mdə ku ntsari ɗa ka da wutə kəra ɗa.

⁷Ka giri ndəkəi susəmər giri kəga mji na ka mi, ka dlu mji na ka tura ka mji na kula kəi akwa kəyir giri. Ka giri nar zhaɓi aka mji na akwa turari, tsuwa giri aɗiya nggəlar dlar yangkura giri wa.

⁸Apani antə parakər giri ata mbəla apa səɓəlar pci, antə giri ata mbə taktar. Jirkur tə giri kəgari an ata pwar giri ka giri wutə ləkəma. Tsuwa I ata ndzi adzə giri kəi mbantə giri, dunar səliyirna ata ɓəlatə giri akwa kəlara bwa.

⁹Antə ma giri ku tuwa su akəli, I ata hamta suari ala giri. Ma giri ku ndəri I ata nggatə giri. Ma giri ku zhar hara bwani aka mji, ka zhar nca kuleng aka nvwa giri, ka zhar mnya ɗimikur,

¹⁰ma giri ku hamta susəma aka mji na ka mi, ka tsi turər mji na ka bwani, antə parakər giri ata mbəla akwa kuthlu, tə kuthlər giri ata sə shin ka parakər pci təpkər.

¹¹I ata pwar giri ka hamta ala giri mwaɓər ɗəffa giri ka suayeri na ɓɗakɓɗaku. I ata namtə giri ka giri ndzi lapiya ka duna. Antə giri ata ndzi apa gadina na ka yimi hang, apa kucirkila na aɗi ana shiwu wa.

¹²Mjir giri ata sə jaktə latə fyayeri ar giri na ku huzamtadzi. Antə mda ata sə səndə giri abbər giri an mji na jaktə latə katangga ka mbwayeri na ku ndla waci.

¹³MTHLAKU akwa pəla, “Ma giri ku ɓəlatə Vir Ghərəmtaghəra ka namtə ni ɓɗakkarkara, tə giri aɗi bara sur ɗəffa giri vir nda wa, ma giri ku nggatə msərakur vir na ɓɗakkarkara ni ka nar səli, ka zhar lənggu, ka zhar kəthlər, ka zhar mnya gapangapani,

¹⁴antə giri ata sə nggatə msərakurərna. I ata vu ka shanga mjir duniya na giri səli, antə giri ata nggatə msərakur tsəɗi natə I hamta aka kəkar giri Yakub. I na MTHLAKU an pəla ngəni!”