Read bura-pabir Ishaya 59 Bible Online

Ishaya 59 - bura-pabir bible

Ishaya 59

¹Giri aɗiya dzama abbər MTHLAKU ku hara mtathlaku tə tsa amzhi mbantə giri wa wa, wala twangtwang tə tsa amzhi nggatə tuwar giri wa wa!

²Su na hara an abbər bikayeri ar giri ku ndəkəmta daɓwa giri ka Hyelər giri. Bikər giri an vu tə tsa ku shinamta kəmari kazhar giri, ta tsa anggatə giri.

³Kamnyar tsiya giri ku diɓərantədzi ka mamshir tsi mda, antə kulenga giri ku ndzi sur cika kamnyar biku. Mnya giri ku nghyi ka thlandər, antə kəsəm mnya giri ku tatədzi ka ɗimikur.

⁴Mda aɗi na ana mwari akwa mbwar shariya ka jirkurərni wa. Giri ana mbərsa abbər giri ata səm shariyar giri ka thlandəra. Giri ana ɗəmhə ɗimikur ka harata.

⁵Ɗimikur tə giri ana ɗəmhə ni ndzi tsu apa thlithlir fufukər. Ma gə jaɓumta thlithlirni fufukər na ɗimiyari an ata səɓəla, antə kəlara mdə na ku kwasə thlithlyari tsa ata mta. Giri ana tsatə zhaɓi ka zakur tətau.

⁶Amma ɗimikur tə giri ana ɗəmhə ni ndzi tsu apa zhaɓi tə mdə nam ka zaku, amzhi pudzər giri wa. Kəthlərər giri an ɗimikur ka mpa!

⁷Parang səla giri tsətsaku akwa hara ɗimikur, tsuwa giri ana dəkəi mji ka tsi mji na kula biku kula shamta saka. Dzamər giri an dzamər hara ɗimikur daci, antə kəlara bwa tə giri ku nuwa, dəlpa giri ana ndzi ncir asar ka ɗəffə ɓzəɓza.

⁸Giri asəndə lakur ndzi akwa msərakur ka nvwa giri wa, tsuwa su aɗi tə giri ana hara ka jirkur akwa wa. Giri ana hara su akwa laku na mbalmbalari, antə mda aɗi na ata nu lakur giri ka tsa kuri lapiya wa.

⁹Antə yeru ku ndzi kula jirkur, su aɗi tə yeru ana hara kalkal wa. An su na hara tə wala ma yeru akwa bara parakəu, kuthlu andər hartə yeru.

¹⁰Yeru ana tətəm laku apa mji na mdlyang, ka tsamta səla yeru təpci apa yeru aviri. An su na hara tə ma yeru akwa nca mji na ata nggari yeru ndzi apa mshiyayeri.

¹¹Yeru ana tuwa apa mwaɓəlu na ka mi, apa bukəl twangtwang tə su wutə ni. Yeru ana bara ka mdə hara ala yeru jirkur, ka Hyel msərantə yeru akwa bwani, amma yeru tə kər wa nggilang wa.

¹²Kamnyar ɗimikur yeru ku hara hang akəma ga MTHLAKU, bikər yeru an burkatə yeru. Jiri yeru ka kəra yeru asəndə suayeri tə yeru harata.

¹³Yeru ku hara nggyarɗəkur ala gə ka pwaktə nga, ka shinadzə bwahila yeru ala ga. Yeru asəndə jili ɗimikur, ka kula hangkalkur, ka thlandərayeri tə yeru ɗəmhə ka hara aka mji.

¹⁴Jirkur ku sha, antə su aɗi tə mda ana hara kalkal kəra wa. Mda aɗi akwa hir pəla jirkur ata layi wa, mda aɗi na ka ɗəffər hara su na kalkal anda wa.

¹⁵Jirkur aɗi wa, antə kəlara mdə na akwa bara zhar hara su na ɗimi tsa ata ndzi susəmər mji. MTHLAKU ku wul ka wula ka wuta abbər jirkur aɗi wa, antə su ngəni ku ɓzamtə ɗəffari.

¹⁶Su ni ku ndatə ni tə wala mdə duku aɗi tə tsa wutə na ndəra ata kər ka dlar mjir bwani ni wa. Apani atar jirkur tə tsa kəgari, tsa ku hau tsiyari surni ka msərantə ɗa ka dunari.

¹⁷Tsa ku hatə jirkur apa ləptər mpa ka dunar mbantə mda apa dzakwar mpa. Tsa hatə ləptər ɗəffə bwarbwarkur ka ntə dawa.

¹⁸Tsa ata ntəmta ɗimikur ata dawayeri arni kalkal ka su tə da hara, wala dawayeri na akwa diyayeri na ciju.

¹⁹Aghəla nda antə shanga mjir duniya ata sə nar səli aka MTHLAKU ka thlivər ni. Kamnyar tsa ata sə si apa laku tə yimər zərkəu ana pu kərni ka hwi akwa, apa kəwal na ka duna.

²⁰MTHLAKU akwa pəla aka mjirni, “I ata si akwa Sihiyona ka mbuli giri, ka msərantə giri, giri na ku zhar hara biku.

²¹Antə nggədza alkawal na ata ndzi akwa daɓwa mburu kəga giri: I ku hamta ala giri mambələrna ka dunarna, ka surthlipərna ka da ndzi ala giri kəga maɗa giri, kəga kəkayeri ar giri ba saka madi. I na MTHLAKU an pəla ndər ngəni.”