Read bura-pabir Ishaya 6 Bible Online

Ishaya 6 - bura-pabir bible

Ishaya 6

¹Akwa məva natə Kuthli Uzziya mta antə I wutə MTHLAKU. I wutə ni andzəndzi ata dəkəl kuthlikur na ɓɗaku laga nal, ka ləptərni na nghyantə kutambwar vəngkər səli.

²Abwa kərari serapayeri aɗi waskəi ka ɓəɓəkayerari ngkwa ngkwa. Kəlara serap ku hartə kəmari ka ɓəɓəku suɗa, ka hartə səlari ka ɓəɓəku suɗa, ka kəthlər ka ɓəɓəkari na mbil suɗa kamnyar fəla.

³Antə kəlara pal akwa pəla abbər, “Aɗi apa gə wa, aɗi apa gə wa, aɗi apa gə wa! MTHLAKU na ka Duna ta Shang! Səliyir nga ku nghyantə shanga duniya.”

⁴Antə kuraka ɗa ku kənggərantə udzəmayeri ar nyarmbwar vəngkər səli, tə mbwa ni ka kərari ku nghyi ka ɗer.

⁵Antə I haptə kurakəi ka pəla, “Su ku wutə ra! I ku sha, kamnyar shanga su na səɓəla akwa mnyi ka biku, tsuwa I akwa ndzəndzi akwa nca mji tə gariyir ɗa shang biku. Amma wala apani I ku wutə kuthli, MTHLAKU na ka Duna ta Shang!”

⁶Antə pal akwa nca serapayeri ku fəla akwa si adzə ra ka hakthlir u'u natə tsa kətə ka məksa ata bagaɗi.

⁷Tsa tsəkwar mnyi ka hakthlir u'u ni ka pəla, “Wutə su ngəni ku tsəkwar kəsəm mnya ga, apani mdə ku kələmta ɗimikur tə gə hara, ka tifəmta ala gə bikər nga.”

⁸Antə I nggatə MTHLAKU akwa pəla abbər, “Wan tə I ata thlentari ri? Wan ata mwari ala mburu ri?” Antə I pəla, “I ata mwari. Thlenta ra!”

⁹Antə tsa pəla ali, “Mwari ka gə pəla aka mji ngəni, ‘Giri ata ləkəma ka ngga su, amma giri aɗi ata nggaɓəlari wa. Giri ata ləkəma ka wul su amma giri aɗi ata wulɓəlari wa.’

¹⁰Hara ka ɗəffa mji ngəni ndzi ɓəɓal, ka thləma ɗa ndzi twangtwang, ka nca ɗa ndzi mdlyang, ta da asə wutə su ka nca ɗa, wala nggatə su ka thləma ɗa, wala nggaɓəla su ka ɗəffa ɗa, ka sə ngka adzə ra ka mbantədzi.”

¹¹Antə I pəla, “Aiyi maɗara, nawa tə su ngəni ata sə datari?” Antə tsa pəla, “Tar ma bərniyayeri shang ku ngka apa kumba ka ndzi kula mda akwa. Tar ma sakatə kəyayeri ni ku ndzi fya, sakatə tsəɗi ni ku hili ka ndzi kula mda akwa.

¹²Tar ma I ku kədləmta shanga mji ciju, ka namtə tsəɗi ni tə tsa ndzi fya.

¹³Kəlara mdə pal akwa mji kuma na ku mbili akwa tsəɗi ni, mda ata shamta ni. Tsa ata ndzi apa gwagwar nfur ok natə mdə nthləmta.” Amma gwagwa ni ata ndzi apa hwulfə na ata ncantə laku tə mjir Hyel ata sə jaktə ɗəɗa.