Read bura-pabir Ishaya 60 Bible Online

Ishaya 60 - bura-pabir bible

Ishaya 60

¹Thlatə Urushalima, kara mbəl parara apa pci, kamnyar səliyir MTHLAKU akwa mbəla ata kəra ga!

²Kuthlu ata hartə kəra duniya, ka kuthlu na pələku hartə mji. Amma parakər MTHLAKU ata si ata kəra ga, antə mda ata wutə səliyirni ata kəra ga.

³Tsəɗiyayeri ata sə si adzə parakər nga, ka kuthlyayeri si adzə parakər baltiyir nga.

⁴Haptə nca ga kara wulhə suayeri na kalaktə nga, mjir nga akwa tsaptədzi ka da ngka avəi! Maɗashilər nga ata sə thlatə ciju ka si Maɗangkwiyir nga mda ata fata akwa kərathlu apa maɗangkyar ata hili.

⁵Antə ga ata sə wutari ka hara kucali, ɗəffa ga ata sə ɓathla ka nghyi ka kucali. Kamnyar tsəɗiyayeri ata sə sənta ala gə gənar ɗa, wala gənar mji na ciju ata mnya yimi.

⁶Dləkəmauwayeri hang na ka virər ɗa, ata sə thlata ahar Midiyan ka Efa ka si. Shanga mji na ahar Sheba ata səntə dinar ka tulari ar ɗuza, ka hu MTHLAKU kamnyar ɓɗakkur tə tsa hara!

⁷Mda ata sə hamta shanga təma na ahar Kedar ala ga, ka səntə gamayeri na ahar Nebayothh ata bagaɗiyir hamta saɗaka ali. Vir nda I ata dəɓatə mbwarna na ka səli ni.

⁸Ngəni kəga wa an akwa mwa ata hyel apa dlamba nə ri, apa bukəlayeri na akwa hwi ləkwa mbwar ɗa ni?

⁹Da an sharayeri na thlata akwa diyayeri na ciju, ka sharayeri ar mjir Tarshish akəma ɗa akwa pwar ɗa, kamnyar səntə mjir Israila na ciju. Da akwa si ka adzərfa ka dinar, kamnyar hu MTHLAKU, Hyel na ɓɗakkarkara arɗa, na vu ka shanga mji hu mjirni Israila.

¹⁰MTHLAKU akwa pəla aka Urushalima, “Durayeri damwa zum an ata sə jaktə hənta ala gə katanggar nga, kuthlyayeri arɗa tsuwa ata sə thlenta ala gə dlara. Kamnyar sakatə ɗəffi ku ɓzi I ku ɗi nga, amma kulini I ata hara ala gə ɓɗakkur ka kətadzə nga.

¹¹Nyarfayeri ar nga ata ndzi bwang pci ka viri, kamnyar ka kuthlyayeri ar tsəɗiyayeri, mzhi səvəi ka gənar ɗa ala ga.

¹²Kamnyar tsəɗiyayeri na aɗi hir dlar ngə wa, mda ata shamta ɗa karkar.”

¹³“Səli natə Lebanon kəgari ata sə ngka ala ga, mda ata sə səntə mənta ka shanga udzəmayeri na ɓɗakɓɗaku ala ga. Mda ata kəthlər ka da kamnyar jaktə latə nga, Urushalima, kamnyar dəɓatə mbwar vəngkər səli ali, antə ga ata sə ndzi ka səli na ola.

¹⁴Kəkar mji na ana nagə bwani ni ata sə si ka nggyarghəidzi ka na gə səli. Shanga mji na ku rutə nga ata sə zuzuri akəma ga ka fatə kalau. Da ata sə kathləma ga, ‘Bərni MTHLAKU’, Sihiyona, Bərniyir Hyel na Ɓɗakkarkara ar Israila.”

¹⁵Mda aɗi ata sə jaktə nggəlar nga wala fwari ngə kəra wa, ga aɗi ata jaktə ndzi halang kula mdə wa. I ata haptə nga kara ndzi ka səli ola, ga ata ndzi vəi na ka kucali ba saka madi.

¹⁶Mji kəga kuthlyayeri arɗa ata sə wulwul nga, apatə məma ana wulwul ɓzərni. Antə ga ata sənda abbər I na MTHLAKU an mbantə nga, abbər Hyelər Israila na ka Duna ta Shang an pəli nga.

¹⁷I ata sənta ala gə dinar ata vəya əmza, kəi na gə liya mənggəl ata vəya adzərfa. I ata na gə əmza ata vəya udzəm, kəi na gə liya ata vəya pela. I ata vu ka kuthlyayeri ka mji ol'olər giri hara kuthlikur ar msərakur ka jirkur ata kəra giri.

¹⁸Ga aɗi ata nggatə kurakər mpa kəra wa, asar aɗi ata jaktə hara akwa tsəɗiyir ngə wa. I ata tsəlpi nga ka mbuli nga apa katangga, antə ga ata sə fwal ra kamnyar mbantə nga.

¹⁹Pci aɗi ata jaktə ndzi parakər nga təpci wa, wala ka thliya ndzi parakər nga aviri wa, kamnyar I na MTHLAKU an ata ndzi parakər nga ba saka madi. Parakər səliyirna ata mbəla ata kəra ga.

²⁰Parang pci ata hamta ala gə parakəu, tsa aɗi ata təri wa. Thliya ata hamta ala gə parakəu, tsa aɗi ata təri wa. I na MTHLAKU an ata ndzi parakəu ar nga ba saka madi, virayeri ar ɗəffə ɓzəɓza ar nga ata kura.

²¹Shanga mjir nga ata sə hara su na kalkal, ka sə ndzi mthlakər tsəɗi ni ba saka madi. Da an nfwayeri tə I namtə ka tsi ka nci ɗa, kamnyar ka da sə ncantə səliyirna aka mji.

²²Wala kəi na raka ta shang ata sə ndzi dur, dur na raka ta shang ata sə ndzi tsəɗi na ka duna. Ma sakari ku hara kalkal, I ata vu ka su ngəni hara taktar. I an MTHLAKU.