Read bura-pabir Ishaya 61 Bible Online

Ishaya 61 - bura-pabir bible

Ishaya 61

¹Mambələr MTHLAKU na olta shang an ata kəri, kamnyar tsa ku carɓəla ra ka thlentə ra, kəi ra psəmnya labar na msəra aka mjir bwani. Tsa ku thlentə ra kəi shiktə mji na ka ɗəffə ɓzəɓza, kəi psəmnya abbər mda ata msərantə mji tə mdə ku ngkəi, ka salamtə mji na akwa pərsəna.

²Tsa ku thlentə ra kəi psəmnya abbər kulini saka ku hara, tə MTHLAKU ata kətadzə mjirni ka mbantə ɗa, ka ɗi dawayeri arɗa. Tsa ku thlentə ra kəi shiktə mji na akwa tuwa,

³mji na akwa tuwa akwa Urushalima kəi hamta ala ɗa mal na msəra ata vəya shimwi, ka kucali ata vəya tuwa ka ha ar huwa ata vəya ɗəffə ɓzəɓza. Da ata ndzi apa nfwayeri natə MTHLAKU surni an nca. Da ata hara su na kalkal antə mji ata sə hu Hyel kamnyar su tə tsa hara.

⁴Da ata sə jaktə latə fyayeri arɗa, na ku huza təng ɗəm.

⁵Mjirna, durayeri damwa an ata sə hara kəthlər ala giri, da ata sə nar susəma aka ciɓər təma ar giri, da ata kukula ala giri ka wul ala giri fakər anapər giri.

⁶Mda ata sə kəga giri abbər giri an pristayeri ar MTHLAKU, mjir kəthlər aka Hyelər mburu. Giri ata sə nggatə msərakur gənar tsəɗiyayeri, ka waha ata kəra gənar ɗa.

⁷Shanga sur səli na wutə giri ata kura. Giri ata ndzi mji na ka su hang ka duna. Giri ata nggatə msərakur su tə giri wuta akwa tsəɗiyir giri, ka ndzi ka kucali hang ba saka madi.

⁸Kamnyar I na MTHLAKU I hir jirkur, I ku nggəlar thla laku ka shanga ɗimikur. Kula nuhum I ata hamta watsəɓa aka mjirna, ka mbwi alkawal na ba saka madi ka da.

⁹Kəkayeri arɗa ata sə ndzi mji na ol'ola ata nca tsəɗiyayeri, shanga mji na wutə ɗa ata sənda abbər I na MTHLAKU ku vədza ala ɗa barka.

¹⁰Urushalima akwa kucalər su tə MTHLAKU ku hara. Tsa ndzi apa amaliya wala sala mwala na dəɓamtadzi akwa kari kəldzərni. Hyel ku hadza alari ləptər mbantədzi ka jirkur.

¹¹Kamnyar apatə həi ana hara ka hwulfə ptsa ka pu səl, antə kula nuhum MTHLAKU ata vu ka jirkur wutədzi bamama. Antə shanga mjir duniya ata sə hu thləmari.