Read bura-pabir Ishaya 62 Bible Online

Ishaya 62 - bura-pabir bible

Ishaya 62

¹Kamnyar tə I hir Sihiyona, I aɗi ata ndzi səri wa. Kamnyar tə hangkali ku nutə Urushalima, I amzhi dləɓa ata kər wa. I aɗi ata zhar hara adduwa kamnyar ni wa, tar ma jirkurərni ku ləkwa mbəla apa parakəu, tar ma mbantədzərni ləkwa mbəlmbəla apa parakər zafu.

²Tsəɗiyayeri ata sə wuta abbər ga ku hara su na kalkal! Shanga kuthlyayeri tsuwa ata sə wutə olkur tə gə kəgari. Har ma I na MTHLAKU surna ata na gə thləm damwa bilən.

³Ga ata ndzi ka daraja apa dzakwar kuthlikur, apa sur barkər ar kuthlikur aka MTHLAKU na Hyelər nga,

⁴Mda aɗi ata jaktə kəga nga abbər, “Zawar” wa, wala ka tsəɗiyir ngə jaktə ndzi “fyi” wa, amma ga ata nggatə msərakur kəldzər nga. Kamnyar ga ata namtə ɗəffa MTHLAKU, antə tsəɗiyir nga ata ndzi apa amaliya alari.

⁵Kamnyar apatə ɓzərdakwi ana wulwul amaliya arni antə maɗa nga ata sə wulwul nga. Apatə sala mwala ana hara kucali ata kəra amaliya arni, antə Hyel ata hara kucali ata kəra ga.

⁶I ku pwi mjir səka ata kəra katanggar nga, Urushalima, ka da hara adduwa pci ka viri kula sarar mpika. Da ata ɗangta aka MTHLAKU alkawal tə tsa hara apani da ata hara adduwa kula ghərəmtaghəra.

⁷Da aɗi ata hartə mnya ɗa wa tar ma tsa ku jaktə nci Urushalima gyang, ka namtə ni akwa laku tə shanga duniya ata hu ni.

⁸MTHLAKU ku hara alkawal na ka duna, antə atar duna tə tsa kəgari tsa ata nghyaɓəlari: “I aɗi ata jaktə zhar ka mthlir giri ndzi susəmər dawayeri ar giri wa, wala zhar ka mji na mətəpi samnya yimər anapər giri wa.

⁹Giri na thləka ka nthləi mthli ni an ata səmari ka hu thləma MTHLAKU. Giri na ɗəm yar anap ni an ata sa yimari akwa bəbalər vəngkər səli ali.”

¹⁰Giri na mjir Urushalima, ləɓəla giri kazhar kutadi, ka giri ɓəli laku na ola aka mjir giri na akwa ngka! Mwa giri ka giri namtə laku na ola, famta giri pelayeri ni! Nci giri alam aka tsəɗiyayeri ka da wuta.

¹¹Nggədza MTHLAKU ku psəmnya har akwa datər duniya, “Pəla giri aka mjir Sihiyona, Nggədza Mdər Mbantə giri akwa si. Tsa akwa si ka watsəɓa akəlari, ka watsəɓər mjir hara ɓɗakkur, ka watsəɓər mjir hara ɗimikur.”

¹²Mda ata sə kəga giri “Mjir Hyel”, mji natə MTHLAKU an pəli ɗa. Mda ata sə kəga thləma Urushalima “Bərni tə mda abara ndzi akwa”, ka tsuwa “Bərni tə Hyel hira.”