Read bura-pabir Ishaya 63 Bible Online

Ishaya 63 - bura-pabir bible

Ishaya 63

¹“Ngəni wan thlata ahar Bozra na akwa Edom akwa si ka ləptərni tatari mamza nə ri? Ngəni wan ka ləptər daraja akwa pakəla ka duna ka kuthlikur nə ri?” “I an MTHLAKU, na ka dunar mbantə mda. I akwa si kəi pəla ala ga abbər I ku səm mpa ni, antə I ata mbantə nga.”

²“Kaha kamnyar mə tə ləptər nga mamza apa mdər dlər yimər anap nə ri?”

³MTHLAKU akwa pəla, “I ku ntsəntsarəmta tsəɗiyayeri shira apatə mda ana ntsar anap akwa vəi ntsarari, mda aɗi na dlar ra wala duku wa. Akwa ɗəffə bwarbwarkurərna antə I ntsəntsarəmta dawayeri arna, antə mamshir ɗa ku pshitə ləptərna. An su na hara tə kariyirna ku tatədzi ni.

⁴I kwamta abbər kulini an saka na kalkal kəi mbantə mjirna ka ɗi dawayeri arɗa.

⁵Su ni ku ndatə ra sakatə I wul ka wula abbər nuhum I ata wutə mdə na ata dlar mjirna, amma I aɗi wutə wa ni. Antə laku tə ɗəffi ɓzi akwa ku dunautə ra tə I ku dlu mpa ni ka duni ka səm ni I shira.

⁶Apani sakatə ɗəffi ku thlata, I ku ntsəntsarəmta mji ni ka səli. Ɗəffə bwarbwarkur arna ku vu ɗa akwa wika, tə da ku ndla ata di ka dəkəidzi.”

⁷I ata ngkər hirkur na ana palidzi wa tə MTHLAKU kəgari, I ata hu ni kamnyar suayeri tə tsa hara ala mburu. Tsa ku hara suayeri na ol'ola ɓɗakɓɗaku hang aka mjir Israila, kamnyar kətadzəmdəkurərni ka hirkurərni na ana palidzə wa.

⁸Kamnyar MTHLAKU ku pəla, “Jiri da an mjirna, da aɗi ata jaktə pwaktə ra wa.” Antə tsa ku ndzi mdər mbantə ɗa.

⁹Sakatə da akwa ɗar bwani, tsa ma tsa ku ɗar bwani, antə tsa surni ku mbantə ɗa. Kamnyar hirkurərni ka kətadzəmdəkurərni antə tsa ku pəli ɗa. Tsa ku fatə ɗa ka kəsi ɗa akwa thlimbəlari.

¹⁰Amma da ku hara alari kər ɓəɓalkur ka ɓzamtə ɗəffari. Antə tsa ku ndzi dawar ɗa ka mpa ɗa.

¹¹Antə da ku ɗangtə sakayeri na təramta sakatə Musa ku fwaɓəla mjir Israila akwa Masar. Da pəla, “Kulini ama Hyel na mbantə mjir pwar Israila ka fwaɓəla ɗa akwa yimi nə ri? Ama Hyel na hamta mambələrni aka Musa nə ri?

¹²Ama Hyel natə dunar səliyirni ku pwar Musa nə ri? Tsa ku ndəkəuwa manda na zurang ka bwa suɗa sakatə Musa ku haptə tsiyari, kamnyar ka mdə sə ɗangtə ni ka hu thləmari ba saka madi.

¹³Sakatə Hyel akwa pwar ɗa akwa manda na zurang, da ku ndurɓəla ka hwi kula sur tsamta səl wutə ɗa.

¹⁴Apatə mda ana mwantə thlar ni akwa mular na ka kusar mirakəu, antə Mambələr MTHLAKU ku pwar mjirni ka mwantə ɗa akwa vəi ghərəmtaghəra na msəra. Antə mji ku hu MTHLAKU kamnyar su ngəni.”

¹⁵MTHLAKU, haghəi nca ga akwar amtazi, vəi ndzəndziyir nga na ɓɗakkarkara na ka səli na ola, kara wul su tə yeru akwa. Dunar mbantədzər ngə ni ama ri? Nənga ga aɗi akwa damitədzi ka yeru kəra wa ri?

¹⁶Ai ga an baba' yeru. Wala tə Ibrahim ka Yakub aɗi səndə yeru wa, gə na MTHLAKU an baba' yeru. Təng waci ga andər pəli yeru.

¹⁷MTHLAKU, kamnyar mə tə ga ana zhar ka yeru pəra kazhar lakur ngə ri? Kamnyar mə tə ga ana vu ka yeru ndzi nggyarɗu ka zhar thlivər ngə nə ri? Ngka, kara dlar yeru kamnyar yeru an mjir nga natə gə carɓəla təng waci.

¹⁸Yeru na mjir nga aɗi fəi akwa vəi na ɓɗakkarkar ni wa. Kamnyar dawayeri ar yeru ku kədləɓəla yeru ka ɓzamtə vəi ni.

¹⁹MTHLAKU, kamnyar mə tə ga akwa hara ala yeru su apa dlu ga aɗi ɗar ndzi mthlakər yeru wa ri, apa yeru aɗi ɗar ndzi mjir ngə wa ni?