Read bura-pabir Ishaya 64 Bible Online

Ishaya 64 - bura-pabir bible

Ishaya 64

¹MTHLAKU, apa ka gə ntamta vəi na amtazi ka gə səghəi, ka garayeri ni wutə ka yakata kamnyar thlivəra!

²Apatə u'u ana vu ka udzəm mbamtadzi, ka vu ka yimi mbwa, antə shanggura ga ata vu tsəɗiyayeri ka da yakata ka ndla.

³Məva laga aɗi waci tə ga ku səghəi ka hara surndatayeri na ku thlivərantə yeru. Sakatə garayeri ni wutə nga da ku thlivəra ka yakata!

⁴Təng tə mdə vəi duniya, mda aɗi ɗar wutə wala nggatə Hyel laga apa gə wa. Ga ana hara surndata aka mji na ku mbərsa ka ga.

⁵Ga ana dlar mji na ana kələngkər ala ga, mji na ana hara su na kalkal ka kucali. Ɗəffa ga ku ɓzi adzə yeru, amma yeru ku ləkəma ka hara biku. Təng ɗəm antə yeru baɗitə hara biku ni, ka apa madi tə yeru ata wutə mbantədzi ri?

⁶Shanga yeru ku ndzi apa mdə na adiya, ɓɗakkur yeru ku ndzi apa dasa na ku ta ka diɗi. Antə bikər yeru ku namtə yeru apa thlali na ana tətəɓwa ka ula ka shambar fimta.

⁷Mda aɗi wala duku na ana ka thləma ga wala bara dlara akəla gə wa. Antə ga ku shinar kəma ga kazhar yeru, ka vu yeru akwa bwani kamnyar bikər yeru.

⁸Amma ai MTHLAKU, ga an baba' yeru. Yeru ndzi apa həi, antə ga an mdər hən tughum ni. Ga an həntə yeru.

⁹Antə usa, ntsari ɗəffa ga. Ga aɗiya kəsi yeru akwa kuta wa. Yeru an mjir nga, antə kara kətadzə yeru.

¹⁰Bərniyayeri ar nga ku ndzi kula mda apa mtakəu, wala Urushalima ma tsa ku ngka apa fya.

¹¹Mbwa natə kəkayeri ar yeru ana vəngkər səli ala gə ka hu nga akwa ku mbamtadzi. Shanga vəyayeri ka suayeri na ɓɗakɓɗaku ku higəlantədzi.

¹²Ata kəra shanga su nayeri ni, MTHLAKU, ga ata ləkəma ka psəngkər thləm, ka yeru ləkəma ka ɗar bwani ya?