Read bura-pabir Ishaya 65 Bible Online

Ishaya 65 - bura-pabir bible

Ishaya 65

¹MTHLAKU akwa pəla, “I ɗəmhəɗəmhari kəi dlar mjirna akwa kəlara su tə da ku yuwa akəli, amma mda aɗi na ghər yu ali su wa. I ɗəmhəɗəmhari kamnyar kəi dlar mjirna, amma mda aɗi na hir bara dlar akəli wa. I ku ndzi ata bəbal, amma mda aɗi na bara si adzə ra wa. I akwa pəla ala ɗa, ‘Nggədza ra azi, I ata dlar giri!’

²I ana zhar nyarmbwarna ka tsa ɓukci bwang abbər nuhum mjirna angka avəi, amma da nggyarɗu. Da aɗi ana hara su na kalkal wa, tar su tə ɗəffa ɗa hira.

³Da ana təri pci akwa hara su na ata thlentə ɗəffi atar hamta saɗaka aka haptayeri na akwa mələmayeri. Da ana mba sur shiwura ala ɗa ata bagaɗiyir hamta saɗakayeri.

⁴Ma aviri da ana mwari akwa vəi kula ka vəyayeri na akwa ɗuwari kamnyar ka da kəɓa ka shatan. Da ana ɓɗə kum gadu, ka sa yimər kumər suayeri na adiya adiya.”

⁵“Amma ba kulini da ana pəla aka mji damwa abbər, ‘Giri aɗiya si adzə yeru wa, kamnyar yeru ɓɗakta giri atsəkwar yeru.’ Mji ngəni ndzi apa ɗer na ɗimi akwa kuciri, ɗerər u'u na ana ɓukci akwa mba.”

⁶“Antə kulini I ku ɗəmhə su tə I ata hara ala ɗa, I aɗi ata zhar ɗa wa. I ata ɗi ɗa swaiswai

⁷kamnyar bikayeri tə da hara ka natə kəkayeri arɗa ku hara. Da ku ɓzamtə ɗəffi atar mba sur shiwura akwa mashiɗayeri na ata gar, ka ngkər ndər ɗimi ata kəri. Antə I ata ɗi ɗa kalkal ka ɗimikur tə da hara sakanda.”

⁸MTHLAKU akwa pəla, “Mda aɗi ana nthləmta gwandzalər anap natə tsa ana nam yimər anap kəgari wa, tsa ana zhar ni. Tsu apani tsuwa I aɗi ata shamta mjir Israila purəm wa. I ata zhar mji na ana kələngkər ali ka mpika.

⁹I ata mbilar mjir Israila na akwa nyarmbwar Yahuda, kamnyar ka kəkayeri arɗa sə fa kifər tsəɗi ni. Mji natə I ku carɓəla an ata fa kifari ka ndzəndzi akwa.

¹⁰Mjirna na ata vəngkər səli ali, I ata namtə mtakər Sharon na bwar ramta ka tsa ndzi vəi ɓəla təmar ɗa, ka kuta gar Akor na bwar raghəi ndzi vəi pwi thlar ɗa.”

¹¹“Amma giri na ku fwari ata kəra MTHLAKU ka Gar Na Ɓɗakkarkara, tə giri ɗəmhə susəma aka haptu Nəɓwa, ka hamta saɗakar yimər anap aka haptu Asar,

¹²watsəɓər giri an mta! I ata thlamta wulya giri shang ka katsakar. Kamnyar sakatə I ndəra ala giri, giri aɗi ndər wa, sakatə I akwa gari, giri aɗi psi thləm wa. Giri ku carɓəla ka giri hara su na ɗimi kamnyar ka giri ɓzamtə kuti.

¹³Antə I akwa pəla ala giri abbər mi ka thləli ata kurəmta giri, amma mji na ana kələngkər ali ata səm ka sa. Giri ata ləkwa səli ka ɗəffa giri ɓza, amma da ata ndzi ka kucali.

¹⁴Buɗayeri arna ata hara ha kamnyar msərakur ɗəffa ɗa, amma giri ata tuwa kamnyar ɗəffə ɓzəɓza.

¹⁵Mjirna na carcarari ata sə kathləma giri ka ɗimikur, antə I na MTHLAKU na olta shang ata sə kurəmta giri. Amma I ata nar thləm bilən aka mji na ana kələngkər ali.

¹⁶Antə kəlara mdə na ata kiɗə barka wala kahyel akwa tsəɗi ngəni ata harari akwa thləma Hyelər jirkur. Kamnyar I ata fwari ata kəra suayeri na ɗimi ɗimi tə giri hara akwa saka na təramta.”

¹⁷MTHLAKU akwa pəla, “I ata namtə duniya ka vəyayeri na amtazi bilən. Shanga suayeri na ku hara akwa saka na ku təramta, mda ata fwari ata kəra ɗa turəku.

¹⁸Ka gə hara kucali ba saka madi ata kəra su tə I ata harari ni. Kamnyar diya Urushalima na bilən tə I ata namtari ni mji na ata ndzəndzi akwa ata ndzi ka kucali.

¹⁹Wala I ma ɗəffi ata ndzi msəra ali ata kəra Urushalima ka mjirni. Mda aɗi ata jaktə tuwa wala nggatə kurakər tuwa akwa tsəɗi nda kəra wa.

²⁰Maɗangkyar aɗi ata jaktə mta akwa ngkyarkurər ɗa wa, shanga mji ata fəi ka mzhitə sakar halər ɗa. Kamnyar mdə na ku mtə ka məvari aru pal daci tsa mtə tsu ngkyar. Tar mdər biku an ata mtə ɗəm ta sakarni ahara, kamnyar fəyirni akwa duniya an asar alari.

²¹Mjirna ata həntə kəyayeri arɗa ka ndzəndzi akwa, da ata ncimta fakər anap ka səm yarni.

²²Da aɗi ata həntə kəi ka mji damwa an ləkwa wa, wala thləka ka mji damwa an sə səm wa. Kamnyar hangkur məva nfwa tə da nca ata kəɓa ka saɓəlkur mpika ɗa. Da ata fəi ka nggatə msərakur vəi ufur ɗa.

²³Da aɗi ata hara kəthlər gapani wa, tsuwa da aɗi ata ya maɗa' kamnyar ka asar sə wutə ɗa wa. I ata vədzə barka aka maɗa' ɗa kəga kəkayeri arɗa.

²⁴Kwabə da ndəra ali I ata shinau ala ɗa. Təng kwabə da akuri hara adduwa ali, I ata hamta ala ɗa suari.

²⁵Ata saka nda mwaɓəlu ka təma ata sə səm susəma ata kəma duku. Tsəngi ata sə ɓɗə kusar apa thla, antə həi ata ndzi susəmər pwapu. Pwapu aɗi na ata ləkəma ka kal mda wala dəkəi mdə kəra wa. Su aɗi na ata ndzi ata garərna na ɓɗakkarkar ni na ata dəkəi mdə wa.” I na MTHLAKU an pəla gari ngəni!