Read bura-pabir Ishaya 66 Bible Online

Ishaya 66 - bura-pabir bible

Ishaya 66

¹MTHLAKU akwa pəla, “Vəi na amtazi an dəkəl kuthlikurərna, duniya tsuwa an kulahər putə səli. Jili mbwa madi antə giri ata hənta ali nə ri? Tsuwa vəi madi an ata mzhi ndzi vəi ghərəmtaghəra arna ri?

²Shanga suayeri ngəni I an namtə ɗa, antə shanga suayeri ngəni arna, I na MTHLAKU an gari ni.” “Nggədza jili mdə tə I akwa barari, mdə na ka kanaɗikur ka ɗəffər tubi, mdə na ana thlivər ɗəffi ka ɓəla ndərərna.”

³“Giri akwa hara su tə ɗəffa giri hira, ka nggatə msərakur hara suayeri na adiya, antə I aɗi ata dlu saɗakar giri wa. Kamnyar giri ana hamta ali saɗakar gyal ka jaktə ra tsi mda, giri ana hamta ali saɗaka ka ɓzər təma, ka jaktə ra thla haptər giri ka kila, giri ana hamta ali saɗakar mthli ka jaktə ra hamta saɗakar mamshir gadu, giri ana mba sur shiwur na msəra ali ka jaktə ra fwal haptayeri ar giri.

⁴Antə I ata thlenta asar ata kəra giri, suayeri tə giri ku thlivərari hwatu. Kamnyar sakatə I akwa kəga giri, giri aɗi psi thləm ka si wa. Giri ku carɓəla ka giri hara suayeri na ɗimi, suayeri na ana nggəlar kuti.”

⁵I na MTHLAKU akwa pəlari, Ngga giri su tə I akwa pəlari, giri na ana yakata ata kəra gariyirna ni, “Maɗa'ma giri na akwa nggəlar giri ka kədləɓəla giri kamnyar tə thləmi, akwa pəla, ‘Haptə gir thləma MTHLAKU, ka yeru wutə kucalər giri!’ Amma da an ata ləkwa sur səli ni.

⁶Psi gir thləma giri aka kuraku na ola na thlata akwa kutadi ni, kuraku na thlata akwa mbwar vəngkər səli. Ngəni an kuraka MTHLAKU, tsa akwa ntə dawa tə dawayeri arni ku hara alari.

⁷Urushalima ku ndzi apa mwala mwala na yaɓəla ɓzər kəmata kutərya. Akəmata dzari abaɗitə kətə ni tsa ku kuri ya ɓzər ni.

⁸Mda aɗi na ku ɗar nggatə jili su apani ya? Mda aɗi na ku ɗar wutə jili su apani ya? Mda ata mzhi namtə tsəɗi akwa vir pal ya? Wala mzhi yaɓəla mjir tsəɗi ni ata saka duku ri? Amma kəlara sakatə Urushalima ku nggatə kutərya tsa ata yaɓəla maɗa'ni təkəma.

⁹I ata vu ka mjirna mzhitə sakar ya, kula I hara ka da yaɓəla ya? Awa, I aɗi ata vu ka mwala kətə hur, kəi ngkata alari yaɓəla ɓzər ni wa. I na MTHLAKU an gari ni.”

¹⁰“Hara gir kucali aka Urushalima, ka ɗəffa giri ndzi msəra kamnyar ni, shanga giri na hir tsəɗi ngəni! Hara gir kucali alari kulini shanga giri na ku tuwa ni ni!

¹¹Tsa ata wulwul giri ka shiktə ɗəffa giri, apa tsa an mama' giri. Giri ata nggatə msərakur ka duna, ka səm susəma apatə giri akwa barari.”

¹²Kamnyar MTHLAKU akwa pəla, “I ata vu ka tsəɗiyir giri kəla ka ləkəma ka gəna sə hwi səkwa ala giri apa thlyagha. I ata hara ka olkur si aka mjirni apatə zərkəu ana nghyi ka pumta. Giri ata ndzi apa ɓzəngkyar tə mama'ni ana kəsi ni akwa kərathlari ka nar uwa, ka vu ni akwa humba ka gyal alari.

¹³I ata shiktə giri akwa Urushalima apatə məma ana shiktə ɗəffa ɓzərni.

¹⁴Ma sakatə giri ku wutə su ngəni akwa hara, ɗəffa giri ata ndzi msəra ala giri, tsuwa giri ata jaktə wutə duna. Antə giri ata sənda abbər MTHLAKU ana dlar mji na ana kələngkər alari, ka ncantə ɗəffə bwarbwarkurərni ata kəra dawayeri arni.

¹⁵Kamnyar MTHLAKU ata si akwa u'u, akwa wagənər taku na ata hwi ka duna apa kəwal kamnyar ra ɗi dawayeri arni. Tsa ata tuzhi ɗəffə bwarbwarkurərni ata kəra ɗa ka mbamta ɗa ka u'u.

¹⁶MTHLAKU ata ɗi shanga mjir duniya na ku hara biku ka u'u ka katsakar, antə mji hang ata mta.”

¹⁷MTHLAKU akwa pəla, “Datər mji na ana kəcimta kərɗa ka ləkwa layi kamnyar mwari adzə haptər ɗa akwa mələm, ka ɓɗə kum gadu, ka kilang, ka susəmayeri na ku ndzi sur cikə ni ku hara.

¹⁸I asəndə dzamər ɗa ka surharar ɗa. Antə I ata tsaptə shanga tsəɗiyayeri ka durayeri. Ma sakatə da ku si da ata wutə jili olkur səli tə I kəgari.

¹⁹I ata vəi seɗa akwa nca ɗa. I ata mbilar mji akwa nca ɗa ka mpika kəi thlentə ɗa akwa tsəɗiyayeri apa Tarshish ka Pul ka Lud, mji na masəku akwa sha. I ata thlentə ɗa ba akwa tsəɗi Tubal ka Yavan ka diyayeri na ciju ciju na aɗi ɗar nggatə su ata kəri wa. Antə da ata ngkər aka mjir tsəɗiyayeri ni jili olkur səli tə I kəgari.

²⁰Antə da ata səntə shanga maɗama giri na mbila akwa shanga tsəɗiyayeri apa sur cauta ali. Da ata fatə ɗa ata takwayeri, akwa wagənayeri ar taku ka amalangkeyayeri, ata kwaraləbandərayeri, ka dləkəmauwayeri ka səntə ɗa ata garərna na ɓɗakkarkara akwa Urushalima. Ata ndzi tsu apatə mjir Israila ana səntə sur hamtar ɗa akwa kugwa na kəcəkəcari akwa mbwar vəngkər səli ali.

²¹I ata pwi bwadukwa ɗa ka da ndzi pristayeri ka mjir Lawi. I na MTHLAKU an gari ni.

²²“Kamnyar apatə I ata vu ka vəi na amtazi ka duniya na bilənari ndzi ba saka madi, antə I ata vu ka thləma giri ka kəkayeri ar giri fəi ka duna.

²³Ata vir na ntangkəma ar kəlara thliya ka vir na ntangkəma ar kəlara sati, shanga mji ata tsaptədzi kamnyar vəngkər səli ali. I na MTHLAKU an gari ni.”

²⁴“Antə mjirna ata sə ləɓəla ka wutə mshiyir mji na ku hara nggyarɗəkur ali. Kulamnya na akwa ɓɗə ɗa aɗi ata mtə wa, tsuwa u'u na ata mba ɗa aɗi ata mtə wa. Da ata ndzi sur cika aka shanga mji na ata sə təramta adzə ɗa.”