Read bura-pabir Ishaya 8 Bible Online

Ishaya 8 - bura-pabir bible

Ishaya 8

¹Antə MTHLAKU pəla ali ka damwa abbər kəi kətə sur rəbutə na ola kəi rəbutə ol'ola ata abbər, Maher shalal hashbaz. Karapur ndər ngəni an abbər, “Mda ata dlər ɗa təkəma ka famnya ɗa taktar.”

²Antə I kiɗə Uriya na prist ka Zakariya na ɓzər Yeberekiya, japwa ɗa mjir jirkur abbər ka da ndzi seɗar rəbutə ni.

³Aghəla nda antə I ku kəɓa ka mwalangkəya, antə tsa ku kətə hur. Sakatə tsa ku yaɓəla ala yeru ɓzər sal, antə MTHLAKU pəla ala yeru abbər, “Vətə giri alari thləm ‘Maher shalal hashbaz.’

⁴Kamnyar kwabə ɓzəngkyar ngəni asə kəla ka səndə pəla, ‘Mama’ wala ‘Baba’, kuthlir Assiriya ata famnya shanga gənar Damaska ka shanga su tə mdə fata akwa mpa ahar Samariya.”

⁵Antə MTHLAKU jaktə gari ali ka damwa abbər,

⁶“Mji ngəni ku nggəlar yimayeri ar Shilowa, na ana hwi ka hangkal, ka ləkwa kumshi su na ata wutə Kuthli Rezin ka Kuthli Peka.

⁷Antə kulini, I na MTHLAKU, ata thlentə kuthlir Assiriya ka sojayeri arni na mulmulari ni ka da ra dlər Yahuda. Antə da ata si ka duna apa pərtu ar Thlyagha Yufiretis na akwa hwi ka puɓəladzi ata mnya maghəm.

⁸Da ata si ka tsarəmta Yahuda ka puɓəla ɗa apa su tə pərtu na ku nghyi kəl ka wulya mda ana tsarəmta ka shamta shanga su.” Amma Hyel ata vəi duku ka mburu, tsa ata pəbəlar ɓəɓəkari ata kəra tsəɗi ni ka tsa ɓəlatə tsəɗiyir mburu.

⁹Tsaptə girdzi, giri na dur damwa! Psi gir thləm tsəɗiyayeri na ciju ciju. Ɗəmhə girdzi kamnyar mpa, amma mda ata kurəmta giri! Jiri, ɗəmhə girdzi, amma mda ata kurəmta giri!

¹⁰Giri ata mzhi tsaptədzi ka ɗəmhədzi kamnyar mpa, amma giri aɗi ata səm wa. Giri ata mzhi pəla su, amma suari aɗi ata hara wa, kamnyar Hyel an adzə yeru.

¹¹Kamnyar MTHLAKU ku gari ali ka duna abbər I aɗiya nu su tə mji ngəni akwa harari ni wa. Tsa pəla,

¹²“Ga aɗiya namtə ɗimikur tə da akwa ɗəmhari ni abbər tsa su laga wa, tsuwa ga aɗiya thlivər su tə da ana thlivərari ni wa.

¹³Ka gə sənda abbər I an MTHLAKU na ka Duna ta Shang. Antə tar ka gə thlivər ra, kamnyar I duku an ɓɗakkarkara.

¹⁴I ata ndzi vəi tə mji ata hwi ka ra ɗuwardzi akwa. Amma aka mjir Israila ka Yahuda, I ata ndzi ala ɗa apa pelar tsamta səla ɗa. Tsuwa I ata hara ka mdə ngkəgəi mjir Urushalima akwa dərku kəga shiwi.

¹⁵Antə mji hang ata sə tsamta səla ɗa ata pela ni ka ɓəgəlwadzi. Shiwi ni ata sə ngkəgəi ɗa.”

¹⁶Giri na mjirthlipərna, ka giri kəsi ndərayeri ngəni tə Hyel ni ni ɓəɓal.

¹⁷Wala tə MTHLAKU ku shinar kəmari kazhar mjir Israila, tsu I ata mbərsa ka tsa.

¹⁸Nggədza ra kəga maɗangkyar natə MTHLAKU ku na ali ni. Yeru an seɗar suayeri tə MTHLAKU na ka Duna ta Shang, na ka ndzi akwa gar Sihiyona, ku hamta kamnyar tsaktə mjir Israila.

¹⁹Mji ata mzhi pəla ala giri abbər ka giri mwari adzə ɗeaghayeri ka mjir hakdzi na ana nggurtə mnya ka cicuhtə su. Ai kalkal ka mji ra yu sauri akəla haptayeri, ka nggaɓəla su akəla mambələr mji na ku mti.

²⁰MTHLAKU akwa pəla, “Ma giri psi thləma giri, giri ata nggaɓəlari ata bəbal abbər shanga su tə da akwa pəlari ni jirkur aɗi akwa.

²¹Mjirna ata sə kadla akwa mtakəu ka ɗar bwani, da ata sə ghəra ka ndzi ka mi. Antə kamnyar bwani ka mi ka ɗəffə ɓzəɓza da ata sə nggəl kuthlir ɗa ka Hyelər ɗa. Antə wala ma da an haptə kəma ɗa kamnyar bara dlara ahar hyel

²²ka akwa duniya, təng tsu bwani na mwavərari, ka kuthlu an ata wutə ɗa. Mda ata pu ɗa akwa kuthlu na mənggəl thlərətu.”