Read bura-pabir Ishaya 9 Bible Online

Ishaya 9 - bura-pabir bible

Ishaya 9

¹Amma mji na ku ɗar bwani aɗi ata ləkəma ka ndzi akwa kuthlu ka bwani ni ba saka madi wa. Akwa saka na təramta mdə ku rutə tsəɗi Zebulun ka tsəɗi Naftali, amma akəmazi mda ata sə haptə səliyir Galili, tsəɗiyir mji gapani, na ata lakur Manda Meditereniya, har ka mwanta aɓəla bwanda Thlyagha Jodan.

²Mji na akwa mwa akwa kuthlu, ku wutə parakəu na ola. Mji na ndzi akwa bwar kuthlər mta, parakəu ku səɓəla ata kəra ɗa.

³Ga ku vu tə tsəɗi ni ku hara ola, ka namtə ɗəffa ɗa msəra ala ɗa. Da ku hara kucali akwa su tə gə hara ala ɗa, apatə mji ana hara kucali akwa sakar fəi sur fakəu, apa sakatə mji akwa ndəkəi su tə da fata akwa mpa.

⁴Kamnyar ga ku ɓəli duna mjir na ɗa bwani, ka ɓəgələmta zwalər dlaɓu ɗa. Ga ku nggyari durayeri na akwa na ɗa bwani, apatə ga ku nggyari sojayeri ar Midiyan.

⁵Kamnyar kəlara ɓaɓiyir mwar katsala natə mdə ku kəthlər kəgari akwa mpa, ka shanga ləptər ɗa natə mamshi ku tamta, mda ata sə mbamtari.

⁶Kamnyar mdə ku yaɓəla ala mburu ɓzəngkyar! Mdə ku hamta ala mburu ɓzər sal! Antə tsa ata sə ndzi kuthlir mburu. Mda ata sə kəga thləmari abbər, Mdər Sauri na ata Ndatə Mda, Hyel na ka Duna, Tədda na Ba Saka Madi Kuthlir Msərakur.

⁷Kuthlikurərni ata ləkəma ka kəla, ka ndzi akwa msərakur ba saka madi. Tsa ata hara kuthlikurərni ata dəkələr Dauda, ka nci kuthlikurərni gyang atar hara su na kalkal ka su na ka jirkur, baɗitə kulini har ba saka madi. MTHLAKU na ka Duna ta Shang an ata hara su ngəni.

⁸MTHLAKU ku thlentə labar na mwavər aka mjir Israila, aka kəkayeri ar Yakub.

⁹Shanga mjir Israila, mji na akwa Samariya ku səndə su nayeri ni. Amma hirkər ka kər olkur an vu ɗa ka da pəla abbər,

¹⁰“Mbwayeri ar yeru natə mdə hən ka caɗuwayeri ni ku ndləndlamtadzi, amma yeru ata jaktə hənɓəla ɗa ka pela. Da ku ɓəgələmta udzəm ciɓ kəra mbwa tə mdə hara ka kwataɓəla, antə kulini yeru ata kəthlər ka udzəm seda.”

¹¹Antə MTHLAKU ku mbwantə ɗəffa dawayeri arɗa na ahar Rezin, antə da ku si ka dlər ɗa.

¹²Sojayeri ar Siriya ku thlata akwa bwar raghəi antə sojayeri ar Filistiya ku thlata akwa bwar ramta ka si kamnyar ka da kurəmta mjir Israila. Amma wala apani ɗəffa MTHLAKU aɗi pwi wa, tsa ku bara ləkəma ka ɗi ɗa.

¹³Kamnyar ata kəra shanga su nayeri ni mjir Israila aɗi ka ngka ka tubi aka MTHLAKU na ka Duna ta Shang, ka vəngkər səli alari wa.

¹⁴Apani MTHLAKU ata sə shamta mjir Israila, kuthli kəga talakarni ata kəma duku. Tsa ata kurəmta ɗa kər ka nggilang akwa vir pal.

¹⁵Mji ol'ola ka mji na ka olkur akwa Israila an kər, naɓiyayeri na ana thlandər tsuwa da an nggilang

¹⁶Mjir pwar mji nayeri ni ku mwantə ɗa akwa sha, ka ndəndatə hangkala ɗa.

¹⁷Apani MTHLAKU aɗi akwa nggatə msərakur kustayeri wa, antə tsa aɗi ata kətadzə kughungayeri kəga mutayeri wa. Kamnyar shanga mji ku ndzi kula thlivər Hyel ka ndzi kəmanggar, shanga ɗa akwa thlandər. Kamnyar ngəni ɗəffa MTHLAKU aɗi pwi wa, tsa ata ləkəma ka ɗi tsəɗi ɗa.

¹⁸Kamnyar kəmanggarkur mji ngəni ana mba apa u'ur mtakəu. Tsa ana mbamta thlali kəga mtəhəra ka shanga dlədləku na akwa mtakəu, ka ɗerari ləmta ahar hyel.

¹⁹Kamnyar tə ɗəffa MTHLAKU na ka duna ku ɓzi, antə tsa ata mbamta tsəɗi ni ka bwarbwarkur ɗəffari. Antə mji ata ndzi apa sur mba u'u. Mda aɗi na ata zhar nvwani ka mpikə wa.

²⁰Kəlara vəi madi tə da wutə susəma akwa da ana famnya ka səməmnya purəm, amma tsu mi ana ləkəma ka kətə ɗa. Aghəla nda da ka kəra ɗa ata ɓɗəmnya maɗa' ɗa.

²¹Mjir tsəɗiyir Manasse ka mjir tsəɗiyir Ifrayim ata mpa ka nvwa ɗa, ka da jaktə paktədzi ka dlər Yahuda. Amma ba kulini ɗəffa MTHLAKU aɗi ata pwi wa, tsa ata ləkəma ka ɗi tsəɗi ni.