Read bura-pabir Pristayeri 1 Bible Online

Pristayeri 1 - bura-pabir bible

Pristayeri 1

¹Vir laga MTHLAKU ku kəga Musa akwa tentər tsaptədzi ka pəla alari abbər,

²“Pəla aka mjir Israila abbər, ‘Kəlara sakatə giri ata səntə saɗaka aka MTHLAKU antə tar ka waskəi kəɓəla thla akwa bəri arni wala təma wala kwi akwa dləmarni ka tsa hamta.

³Ma sur hamta saɗaka mbamba ar nga an thla antə tar ka tsa ndzi gyal na kula nangka. Tsuwa tar ka gə hamta saɗaka ni anyarmbwar Tentər vəngkər səli, antə I ata dluwari ala ga.

⁴Ga ata vəngkər tsiya ga ata kəra thlar saɗaka mbamba ni, antə I ata dlu saɗaka ni apa sur kəcimta ala gə bikər nga.

⁵Ga ata thlamta wulya gyal ni anda akəmi, antə pristayeri na akwa nyarmbwar Haruna ni ata kətə mamshari ka pshita ata shanga tenga bagaɗi na anyarmbwar tentər tsaptədzi ni.

⁶Ga ata hənəmta mwaɓi ni ka gə thləthlau raka raka,

⁷antə pristayeri na akwa nyarmbwar Haruna ata ɗəmhə udzəm mba u'u ata kəra bagaɗi mbamba ni ka njingkər u'u.

⁸Da ata putə dakulayeri ar kum ni, ka paktə ka kərari ka malari ata udzəm na akwa mba ata kəra bagaɗi ni.

⁹Amma tar kara kəcimta kariyir kutari ka səlayerari ka yimi, kambəla prist na ata hamta saɗaka ni mbamta ɗa tuktukku ata bagaɗi ni. Tsa an saɗaka mbamba swakti ka shiwur na msəra natə I ata dluwari ka kucali.’ ”

¹⁰“Ma ga ata hamta saɗaka mbamba ni ka təma wala kwi antə tar ka gə hamta gam wala nciwu na kula nangka.

¹¹Mwantə mwaɓi ni təbwar yala ka bagaɗi ni ka gə thlamta wulyari akəmi, antə pristayeri ni ata pshitə mamshari ata shanga tenga bagaɗi ni.

¹²Ga ata thləthlau kum ni raka raka antə prist ni ata putə ɗa kəga kərari ka malari ata u'u na ata kəra bagaɗi ni.

¹³Tar kara kəcimta kari kutari ka səlayerari ka yimi, kambəla prist ni mbamta shanga saɗaka ni ata bagaɗi. Tsa an saɗaka mbamba swakti ka shiwur na msəra natə I ata dluwari ka kucali.”

¹⁴“Ma ga ata hamta saɗaka mbamba ni ka ɗikayeri, antə tar ka gə hamta bukəl wala ɓzər katapar.

¹⁵Antə prist ata mwantə ɗika ni ata bagaɗi, vəi tə tsa ata ndwaləmta wulya ɗika ni ka mbamta kərari ata u'u. Antə mamshari ata hwiyimta athlimbəla bagaɗi ni.

¹⁶Amma ar mbwashikari ka shishari mda ata ra pumtari akwa vəi pumta pənju abwa raghəi ka bagaɗi ni.

¹⁷Aghəla nda antə tsa ata kətə ɗika ni ata ɓəɓəkari ka ngkərtə ntau ni, ka mbamta ni ata kəra udzəm u'u na ata kəra bagaɗi ni. Tsa an saɗaka mbamba swakti ka shiwur na msəra natə I ata dluwari ka kucali.”