Read bura-pabir Pristayeri 10 Bible Online

Pristayeri 10 - bura-pabir bible

Pristayeri 10

¹Maɗa' Haruna laga aɗi na ka thləma ɗa Nadab ka Abihu. Da fatə hahəi u'u pal pala ɗa, ka pu hakthlir u'u, ka pungkər sur shiwura na msəra, ka hamta aka MTHLAKU. Atar ngəni da ku nggəlar ndərər MTHLAKU, tə da ku mba u'u damwa zum ta natə tsa tsawa ala ɗa.

²Antə təkəma MTHLAKU ku thlentə u'u na ku mbamta ɗa ka tsi ɗa tsu anda.

³Musa ku pəla aka Haruna abbər, “Ngəni an su tə MTHLAKU akwa tsaktə giri ata kər sakatə tsa pəla, “ ‘Shanga mji na akwa kəthlər pristkur ali, Tar ka da wutə səliyir olkurərna, Antə shanga mji, ata sə hu ra.’ ” Amma Haruna ku dləɓ səri.

⁴Antə Musa ku kəgatə Mishayel ka Elzafan, maɗa' Uzziyel na msəkər Haruna. Tə tsa pəla ala ɗa, “Shahə girdzi ka giri famta mshiyir maɗa'da giri kazhar vəi na ar Hyel ni, ka giri mwanta ata hildi.”

⁵Antə da ku si ka tamtə mnya ləptər mshiyayeri ni ka ndəkərəmta ɗa ka mwanta ata hildi, tsu apatə Musa ku tsawa.

⁶Antə Musa pəla aka Haruna kəga mambila maɗa'ni damwa suɗa Eleyazar ka Ithlamar abbər, “Giri aɗiya zhar shishir kəra giri zhəvərək kula thlar wa, wala kukwahəmta ləptər giri kamnyar ncanta abbər giri akwa tuwa wa. Ma giri ku hara, giri ata mta, antə ɗəffa MTHLAKU ata ɓza ata kəra shanga mjir Israila. Amma shanga mambila mjir Israila na yangkura giri ata mzhi tuwa mji natə MTHLAKU ku mbamta ni.

⁷Giri an pristayeri na carcarari ar MTHLAKU, antə giri aɗiya ləɓəla kazhar tentər tsaptədzi ni wa. Ma giri ku hara, giri ata mta.” Antə da ku nu su tə Musa ku pəla ala ɗa.

⁸Aghəla nda MTHLAKU pəla aka Haruna abbər,

⁹“Ga kəga maɗa'nga aɗi ata sa yimər anap wala kəlara sur sa na mwavər sakatə giri ata ləkwa tentər tsaptədzi wa. Ma giri ku hara, giri ata mta. Ngəni an tsawu natə giri kəga kəkar giri ata ɓəlatari ba saka madi.

¹⁰Dwali ka giri hara apani kamnyar ka giri mzhi ndəkɓəla zumzumkur na akwa daɓwa su na ar Hyel ka su na ndzang, daɓwa su na ɓɗaku ka su na ɗimi.

¹¹Tsuwa dwali ka giri thlipa aka mjir Israila shanga tsawayeri natə I ku hamta ala ɗa atar Musa.”

¹²Antə Musa pəla aka Haruna ka mambila maɗa'ni na suɗə ni: Eleyazar ka Ithlamar abbər, “Kətə giri su na mbiləmta akwa saɗakar mthli natə mdə hamta aka MTHLAKU, ka giri namtə buradi na kula yist kəgari. Ka giri səma athlimbəla bagaɗi saɗaka ni. Tar mdə na prist an ata səmari, kamnyar saɗaka ngəni an ar Hyel, antə mdə damwa aɗi na ata tsəkwarari wa.

¹³Ka giri səm ni akwa vəi na ar Hyel. Kamnyar ngəni an nəɓwar nga kəga maɗa'nga akwa kuta susəma natə mdə ku hamta aka MTHLAKU. An su tə MTHLAKU ku tsawa ali.”

¹⁴Amma ar kərathlu ka kiɗə natə ga ku kədaɓta, giri kəga maɗa'nga shəli ka mwanki ata mzhi səm ɗa akwa kəlara vəi na kəcəkəcari ɓɗaku. Bwa nayeri ni mjir Israila ku fwaɓəla akwa kuta saɗakar jakə mwardzi arɗa, ka pwi ɗa ala gə kəga mjir kutakəyir nga.

¹⁵Da ata səntə kiɗə ka kərathlu akwa sakatə mda akwa hamta saɗakar susəma ar malkum aka MTHLAKU. Bwa nayeri ni ku ndzi ar giri kəga kəkayeri ar giri ba saka madi tsu apatə MTHLAKU ku tsawa.

¹⁶Sakatə Musa ku yu su ata kəra nciwu na ar saɗakar kiɗə tifəmta biku, antə tsa ku nggaɓəla abbər mdə ku mbamta ni. Antə ɗəffari ku ɓzi adzə Eleyazar ka Ithlamar maɗa' Haruna.Tə tsa yuwa abbər,

¹⁷“Kamnyar mi tə giri aɗi səm saɗakar kiɗə tifəmta biku ni akwa Vəi na Ɓɗakkarkara wa ri? Tsa an susəma na ɓɗakkarkara. Antə MTHLAKU ku hamta ala giri kamnyar kəcə bikər mji.

¹⁸Təng tə mda aɗi mwantə mamshir mwaɓi ni akwa Vəi na Ɓɗakkarkara wa, ai kalkalari ka giri səma akwa Vəi na Ɓɗakkarkara apatə I ku tsawa ala giri.”

¹⁹Antə Haruna shinau ata vəya maɗa'ni aka Musa abbər, “Ma I an səm saɗakar kiɗə tifəmta biku ni ashina, sakani MTHLAKU ata hirari ya? Ashina antə maɗa'na ku hamta saɗakar kiɗə tifəmta biku ka saɗaka mbamba arɗa aka MTHLAKU, amma tsu asar ngəni wutə maɗa'na na suɗə ni!”

²⁰Sakatə Musa ku nggatə ndərər Haruna ni, antə ndər ni ku kəskərari.