Read bura-pabir Pristayeri 13 Bible Online

Pristayeri 13 - bura-pabir bible

Pristayeri 13

²“Kəlara mdə na ka kəthla, wala kuɗu, wala huhwala na ku baɗitə dlarhə dzari, ka mdə səntə ni aka Haruna wala aka pal akwa nca pristayeri na akwa nyarmbwar Haruna.

³Antə prist ni ata wulhə vəi na ka shilku na ata kəsəm dzari ni. Ma shishi na akwa shilkə ni ku ndzi mwapu ka ma shilkə ni ku ləghəi zurang, shilkə ni ata ndzi shilkər kəsəm na ɗimi na ana pəl mda, antə prist ni ata pəla alari abbər ‘Ga aɗi kəcəkəcari wa.’

⁴Amma ma huhwala ni mwapu daci, tə zurangkurari aɗi ləghəi ta kəsəm dzari wa, ka tsuwa shishi na akwa vəi huhwala ni aɗi shina ka ndzi mwapu wa, prist ni ata ɗuwar ni ambwa mnyar vir murfa.

⁵Akwa vir na murfəkur antə prist ni ata jaktə wul ni ka damwa. Ma tsa wuta abbər shilkə ni aɗi titiləmtadzi akwa kəsəm dzari wa, prist ni ata jaktə zhar ni shini ambwa ar vir murfa.

⁶Akwa vir na murfəkur, prist ni ata jaktə wul ni. Antə ma shilkə ni ku baɗitə kura, tə tsa aɗi titilardzi wa, antə prist ata pəla alari abbər, ‘Gə kəcəkəcari, təng dza gə ka kuɗu daci ni.’ Antə mdə ni ata kəcimta kari hata arni ka ndzi kəcəkəcari.

⁷Amma ma kuɗu ni ku titiltədzi aghəla tə prist ku wul ni ka salamtə ni, antə tar ka tsa jaktə ngka akəma prist ka damwa.

⁸Antə prist ni ata jaktə wul ni ka damwa. Ma kuɗu ni ku jaktə titiltədzi, prist ni ata pəla alari abbər tsa ka shilkər kəsəm na ana pəl mda.

⁹Kəlara mdə na ka shilkər kəsəm dza na ana pəl mda, antə tar ka mdə səntə ni aka prist

¹⁰na ata wul ni. Ma prist ni wuta abbər shishi laga ku ngka mwapu kamnyar kəthla ni ku thla lu, tsuwa kəthla ni ku ndəla,

¹¹tsa ata ndzi shilkər mta ar kəsəm na ana pəl mda, na ku fəi akwa dzari. Antə prist ni ata pəla alari abbər, ‘Gə ka shilku na ɗimi ni!’ Antə Prist ni aɗi ata vəi ni ka wul ni kəra wa kamnyar tə mdə ni aɗi kəcəkəcari wa.

¹²Amma ma shilkə ni ku titiləmtadzi ka ndlətə shanga dzari baɗita ata kərari ka mwanta adzə səlari,

¹³antə prist ni ata jaktə wulhə ni. Ma tsa wuta abbər shilkə ni ku kurtə hartə shanga dzari, tsa ata pəlaɓəla alari abbər, ‘Gə kəcəkəcari, kamnyar tə shilkə ni ku pali nga tə ga ku ndzi mwapu.’

¹⁴Amma ma mbəlku ni ku kəlar mnyari, tsa ata ndzi dlimbur.

¹⁵Prist ata pəlaɓəla shilkə ni alari təkəma tə tsa nggaɓəla abbər mbəlku ni ku kəlar mnyari, kamnyar mbəlku na ku kəlar mnyari an shilku na ɗimi na ana pəl mdə ni. Antə tsa dlimbur.

¹⁶Amma ma mbəlku ni ku kuri ka ngka mwapu, antə tsa ata ngka adzə prist.

¹⁷Antə ma prist ni ku jaktə wulhə ni ka wuta abbər mbəlku ni ku ngka mwapu jiri, tsa ata pəla alari abbər, ‘Gə kəcəkəcari.’

¹⁸Kəlara mdə natə kuɗu ku səɓəla ata dzari ka kura,

¹⁹amma ma huhwal laga mwapu wala mamza ku mbili akwa vəi kuɗu ni, antə tar ka tsa mwari adzə prist.

²⁰Ma prist ku wuli ni ka wuta abbər vəi ni ku hara zurang ta kəsəm dzari ka tsuwa shishi na akwa ku ngka mwapu, antə prist ata pəla alari abbər, ‘Gə dlimbur.’ Ngəni an shilku na ɗimi na ana pəl mdə na ku səɓəla akwa kuɗu.

²¹Amma ma prist ni wuta abbər shishi na akwa vəi ni aɗi hara mwapu wa, tsuwa mbəlku ni aɗi zurang wa, amma mbəlku ni akwa kura, antə prist ni ata kəsi ni ambwa ar vir murfa.

²²Amma aghəla nda ma mbəlku ni ku vərvəra ka titiltədzi, antə prist ata pəlaɓəla alari abbər, ‘Gə dlimbur, ku ndzi gə ka shilku ni.’

²³Amma ma mbəlku ni aɗi kəlardzi wala titiləmtadzi wa, tə manjivar an mbil daci. Antə prist ni ata pəlaɓəla alari abbər, ‘Gə kəcəkəcari.’

²⁴Ma u'u ku mba mda, tə mbəlkari ku ndzi mwapu wala mamza mwappa,

²⁵antə prist ata wulhə mbəlku ni. Ma shishi na akwa mbəlku ni ku ngka mwapu, ka tsuwa ma mbəlku ni ku hara zurang, tsa ata ndzi shilku na ɗimi na ku baɗita akwa vəi mbar u'u. Antə prist ata pəlaɓəla alari abbər, ‘Gə dlimbur.’

²⁶Amma ma prist wuta abbər shishi na akwa mbəlku ni aɗi hara mwapu wa, ka mbəlku ni aɗi zurang ta kəsəm dzari wa, amma tsa ku baɗitə kura, antə prist ata kəsi ni ambwa ar vir murfa.

²⁷Akwa vir na murfəkur antə prist ata jaktə wulhə ni ka damwa. Antə ma mbəlku ni akwa ndlətə dzari, tsa ata pəlaɓəla alari abbər, ‘Gə dlimbur. Ngəni an shilku na ɗimi.’

²⁸Amma ma mbəlku ni aɗi kəlardzi wala titiləmta dzi wa, tə tsa ku baɗitə kura ka ndzi manjivar, tsa ata ndzi huhwalər mba. Tsa aɗi shilku na ɗimi ni wa. Antə prist ata pəla alari abbər, ‘Gə kəcəkəcari. Kamnyar ngəni an manjivar mbar u'u daci.’

²⁹Kəlara mda, sal wala mwala, na ka shilku ata kərari wala kirkumiyari,

³⁰ka tsa mwantə ka prist wulha. Ma mbəlku ni zurang ta kəsəm dzari, tsuwa ma shishi na akwa mbəlku ni ku ndzi yiɗauwa hubaka hubaka, antə tsa ka shilkər ɓəɓa na ɗimi. Antə prist ata pəlaɓəla alari abbər, ‘Gə dlimbur.’

³¹Ma prist ku wulhə ni ka wuta abbər shilkər ɓəɓa ni aɗi zurang ta kəsəm dzari wa, tsuwa shishi na akwa ni aɗi mənggəl wa, tsa ata kəsi ni ambwa ar vir murfa.

³²Prist ata jaktə wulhə shilkə ni akwa vir na murfəkur. Antə ma ɓəɓa ni aɗi jaktə kəlardzi ta na hwatu wa, wala zurang ta kəsəm dzari wa, ka ma shishi na akwa aɗi hubaka hubaka wa,

³³antə mda ata shimta alari kərari, kula tsəkwar vəi na ka ɓəɓa ni. Antə prist ata jaktə kəsi ni ambwa ar vir murfa damwa.

³⁴Akwa vir na murfəkur prist ata jaktə wulhə mbəlku ni. Antə ma mbəlku ni aɗi titiləmta wa, ka tsuwa tsa aɗi hara zurang ta kəsəm dzari wa, prist ata pəlaɓəla alari abbər tsa kəcəkəcari. Antə aghəla tə tsa kəcimta kari hata arni, tsa ata ndzi kəcəkəcari.

³⁵Amma ma ɓəɓa ni ku titiləmtadzi aghəla tə mdə ku pəlaɓəla abbər tsa kəcəkəcari ni,

³⁶prist ata jaktə wulhə ni ka damwa. Antə ma ɓəɓa ni ku titiləmtadzi, tsa aɗi ata jaktə shamta sakarni akwa wul shishi wa, kamnyar tə mdə ni dlimbur.

³⁷Amma ma prist ni wuta abbər ɓəɓa ni aɗi jakə wa, har ma shishi na mənggəl ku ptsi akwa vəi ni, ɓəɓa ku kuri. Antə prist ata pəlaɓəla alari abbər mdə ni kəcəkəcari.

³⁸Kəlara mda, sal wala mwala, na ka huhwalayeri laga mwapmwapu ata dzari,

³⁹tar ka prist wulha ɗa. Antə ma nca mbəlku ni aɗi mwapu ka duna wa, ata ndzi huhwala ndzang an səɓəla, antə tsa kəcəkəcari.

⁴⁰Ma shishir kəra mdə sal ku tsuhumtadzi tə tsa ku ndzi ka tsuhurpathla, mdə ni kəcəkəcari.

⁴¹Wala ma shishir kəra mdə sal na abwakəma an tsuhumtadzi, tə tsa ku ndzi ka tsuhurpathlar bwakəma, mdə ni tsu kəcəkəcari.

⁴²Amma ma mbəlku laga mamza mwappa ku səɓəla ata vəi na tsuhtsuhwari ni, ata ndzi shilku na ɗimi an akwa səɓəla akwa kərari ni.

⁴³Prist ata wulha mdə ni, antə ma tsa ku wutə kəthla ata mnya mbəlku na mamza mwappa ata tsuhurpathlarni, na ku dludzi ka shilku na ɗimi ni,

⁴⁴prist ni ata pəlaɓəla alari abbər tsa ka shilku na ɗimi ata kərari. Antə tsa dlimbur.

⁴⁵Mdə na ka shilkər kəsəm na ɗimi ni ata hatə kari na kwahəkwahari, ka zhar kərari kula thlara, ka hartə bwar kəmari na aghəi, ka haptə kuraku akwa pəla, ‘Wul giri ra I dlimbur! Wul giri ra I dlimbur!’

⁴⁶Ka shilku ngəni tsa ata ndzi dlimbur ba saka madi, antə tsa ata ndzi shini aɓəla ata hildi.

⁴⁷Ma pururu aɗi ata ləptər ulu wala lilin,

⁴⁸wala ata zhaɓi tə mdə tsa ka puwa ar lilin, wala ka ulu, wala ka kəlara su tə mdə namtə ka kəsəm.

⁴⁹Ma vəi natə pururu ni ku tsəkwari ata zhaɓi wala kəsəm ni, akwa ngka hakcirhakciri wala mamza, ata ndzi abbər pururu ni ku tamti, antə tar ka mdə ncanta aka prist.

⁵⁰Aghəla tə prist ni ku wulha su ni, antə tsa ata vəi su na ka pururu ata ni akwa vəi laga ar vir murfa.

⁵¹Akwa vir na murfəkur tsa ata jaktə wulhə su ni, antə ma vəi tə pururu tamtə ni ku jakəi, tsa ata pəla ‘Ngəni an shilku na ɗimi na akwa yatədzi, antə suni dlimbur.’

⁵²Antə prist ata mbamta ləptu ni wala kəsəm ni, kamnyar tə pururu ni akwa yatədzi.

⁵³Amma ma prist ku wulha zhaɓi wala kəsəm ni ka wuta abbər pururu ni aɗi jaka ata wa,

⁵⁴tsa ata vu ka mdə kəcimta ni ka vəi ni ka tsa hara vir murfa ka damwa.

⁵⁵Prist ni ata jaktə wulhə su na ka pururu ni aghəla tə mdə ku kəcimta. Antə ma pururu ni tsu hakcirhakciri wala mamza, wala ma tsa aɗi ka jakə baukurərni wa, tsu tsa ata ndzi dlimbur. Antə tar ka mdə mbamta suari ka u'u, wala pururu ni an ata bwakəmari wala ata bwahilari.

⁵⁶Amma ma sakatə prist ku wulha su ni ka wuta abbər pururu ni akwa kura, tsa ata thlaɓəla vəyari.

⁵⁷Amma ma pururu ni jaktə səɓəla ka damwa, ata ndzi abbər pururu ni akwa yatədzi. Antə tar ka mthlakari mbamta ni.

⁵⁸Wala ma tsa kəcimta su na ka pururu ata ni har tə vəyari ku sha, tar ka tsa jaktə kəcimta ni ka damwa kambəla tsa ndzi kəcəkəcari.”

⁵⁹“Nayeri ni an tsawayeri na ata kəra pururu na kalkal ka mdə nuwa, wala ata zhaɓi tə mdə tsa ka ulu wala lilin, wala kəsəm, kamnyar ka mdə səndəɓəla wala tsa kəcəkəcari, wala aɗi kəcəkəcari wa.”