Read bura-pabir Pristayeri 17 Bible Online

Pristayeri 17 - bura-pabir bible

Pristayeri 17

¹MTHLAKU ku pəla aka Musa abbər,

²“Hamta aka Haruna ka maɗashilərni ka aka shanga mjir Israila tsawayeri ngəni.

³Ma mdər Israila na ku tsi thla wala təma wala kwi akwa kuta di wala aɓəla ata hildi,

⁴natə tsa aɗi sənta anyarmbwar tentər tsaptədzi kamnyar ka tsa hamta ni saɗaka wa, antə bikər mamshi natə tsa pumta ni ata ndzi ata kərari. Antə mda ata kədləɓəla mdə ngəni kazhar nca mjir Israila.

⁵Tsawu ngəni an kamnyar ka mjir Israila sənta ali saɗakayeri arɗa natə da ana hara ata kəlara bəbal. Kulini da ata sənta aka prist anyarmbwar tentər tsaptədzi ka tsi mwaɓiyayeri ni apa saɗakar jakə mwardzi.

⁶Antə prist ata pshitə mamshari ata kəra bagaɗi na anyarmbwar tentər tsaptədzi. Tsa an saɗaka mbamba swakti ka shiwur na msəra natə I ata dluwari ka kucali.

⁷Mjir Israila aɗi ata jaktə hamta saɗakayeri arɗa aka shatanayeri na apa kwi natə da ana vəngkər səli alari kəra wa. Da ata ɓəlatə tsawayeri ngəni ba saka madi.

⁸Ka da ɗangta abbər mdər Israila wala mətəpi na andzəndzi akwa nca ɗa aɗi ata hamta saɗaka mbamba wala saɗaka laga ata vəi damwa wa,

⁹tar anyarmbwar tentər tsaptədzi. Mdə na ku kar ka ɓəli tsawu ngəni mda ata kədləɓəla ni kazhar nca mjirna.

¹⁰Kəlara mdər Israila wala kəlara mətəpi na andzəndzi akwa nca ɗa, na ku sa mamshi wala səm mamshi, I ata ɗi ni ka kədləɓəla ni kazhar nca mjirna.

¹¹Kamnyar mpika shanga su na ka mpika an akwa mamshirni. Ngəni an su na hara tə I ku tsawa abbər ka mdə hamta ali shanga mamshir mwaɓi kamnyar kəcimta biku. Kamnyar mamshi an mpika, antə tsa ata kəcimta bikər giri.

¹²An su na hara tə I pəla aka mjir Israila abbər da wala mətəpi na andzəndzi akwa nca ɗa aɗiya səm mamshi wa ni.

¹³Kəlara mdər Israila wala mətəpi na andzəndzi akwa nca ɗa na ku ləkwa bara ka ngkəi kum mtaku wala ɗikar ɓɗa antə tar ka tsa pumta mamshari ka hartə ka bərbər.

¹⁴Kamnyar tə mpika kəlara su na ka mpika an akwa mamshirni. An su na hara tə I ku ngkatə mjir Israila ta səm mamshir su na ka mpika. Antə kəlara mdə na səma, mda ata kədləɓəla ni kazhar nca mjirna.

¹⁵Kəlara mda, wala tsa mdər Israila wala tsa an mətəpi, na ku ɓɗə mwaɓi na ku mtə dlipa wala natə nvwani an tsi ni, antə tar ka tsa kəcimta kari hatərni ka pəra. Antə tsa ata ndzi dlimbur har ka pci təri. Aghəla nda antə tsa ata ndzi kəcəkəcari.

¹⁶Amma ma tsa aɗi kəcimta kariyirni ka pəra wa, su na ku wutə ni ar kərari.”