Read bura-pabir Pristayeri 18 Bible Online

Pristayeri 18 - bura-pabir bible

Pristayeri 18

¹MTHLAKU ku pəla aka Musa

²ka tsa pəla aka mjir Israila abbər, “I an MTHLAKU na Hyelər giri.

³Giri aɗiya nu surharar mjir Masar tə giri ku ɗar ndzi kəga da, wala sur mjir Kanana natə I ata mwantə giri akwa tsəɗiyir ɗa wa. Giri aɗiya thlipə surharar ɗa wa.

⁴Ka giri ɓəlatə tsawayeri natə I ku na ala giri ka vədzə hangkal ala ɗa. I an MTHLAKU na Hyelər giri.

⁵Ka giri ɓəlatə tsawayeri natə I ku na ala giri antə giri ata ndzi lapiya. I an MTHLAKU.

⁶Giri aɗiya pi ka yangkura giri wa. I an MTHLAKU

⁷Ga aɗiya vu baba' nga akwa sur səli atar pi ka mama' ngə wa. Tsa an mama' nga antə ga aɗiya vu ni akwa sur səli wa.

⁸Ga aɗiya vu baba' nga akwa sur səli atar pi ka mwalankiɗa wa. Kamnyar ngəni an durakur ar baba' nga.

⁹Ga aɗiya pi ka ngkwarma nga wala ngkwarda nga wa, wala giri kəla avi ata kəma duku wala tsa kəla aɓəla akwa vəi damwa.

¹⁰Ga aɗiya pi ka kəkar ngə wa, wala tsa an ngkwa ɓzər nga wala ngkwar ngkwar nga, kamnyar su apa ni ata kəli səliyir nga.

¹¹Ga aɗiya pi ka ngkwar mwalar baba' ngə wa, kamnyar tsa an ngkwarda nga.

¹²Ga aɗiya pi ka ngkwarma' baba' ngə wa, kamnyar tsa an bəbar nga.

¹³Ga aɗiya pi ka ngkwarma' mama' ngə wa, kamnyar tsa an marsha ar nga.

¹⁴Ga aɗiya kəli səliyir ɓzərma' baba' nga atar pi ka mwalankiɗa wa, kamnyar tsa ma tsa bəbar nga.

¹⁵Ga aɗiya pi ka mwalaɓzər ngə wa, tsa an mwalar ɓzər nga. Kamnyar ngəni an sur səli.

¹⁶Ga aɗiya pi ka mwalar ɓzərma nga wa. Tsa an durakur ar ɓzərma nga.

¹⁷Ga aɗiya pi ka ngkwar mwala natə ga ku pi ka tsa wa. Tsuwa ga aɗiya kəl ngkwar ɓzərni wala ngkwar ngkwarni wa. Da ata mzhi ndzi yangkura nga na kudzəha, antə ngəni an adiyakur.

¹⁸Ga aɗiya kətə ngkwarma' mwalankiri ka tsa ndzi marərni sakatə mwalankiri tsu ka mpikə wa.

¹⁹Ga aɗiya pi ka mwala sakatə tsa akwa wul thlali wa, kamnyar sakanda tsa ka diɗi.

²⁰Ga aɗiya pi ka mwalar ntəwulər ngə wa, kamnyar ata namtə nga dlimbur.

²¹Ga aɗiya hamta ɓzər nga ka tsa ndzi sur thla saɗaka aka haptu Molek wa, kamnyar ngəni ata ɓzamtə thləmi, I an MTHLAKU.

²²Ga aɗiya pi ka sal nvwa nga apa tsa mdə mwala wa, kamnyar ngəni an sur cika na ɗimi kamta.

²³Mdə sal aɗiya pi ka mwaɓi wa, tsuwa mdə mwala aɗiya hamta kərni ka mwaɓi pi ka tsa wa. Kamnyar ngəni an adiyakur ka hilhilkur na ku təra vəyari.

²⁴Ga aɗiya diɓəranta kər nga atar hara kəlara pal akwa nca suayeri ngəni wa, kamnyar atar suayeri ngəni antə I akwa kədləɓəla mjir tsəɗi ni, kamnyar tə da ku ndzi dlimbur.

²⁵Apani tsəɗi ni ku ndzi dlimbur, antə I ku ɗi ni kamnyar bikərni. Antə tsəɗi akwa tapərɓəla mjirni.

²⁶Amma tar ka giri ɓəlatə surthlipayeri ka tsawayeri arna, giri na maɗa' di ka mətəpiyayeri na ka ndzi akwa nca giri. Giri aɗiya hara shanga sur cika nayeri ni wa.

²⁷Mji na ndzəndzi akəmata giri akwa tsəɗi ni ku hara shanga sur cika nayeri ni antə tsəɗi ni ku ndzi dlimbur.

²⁸Antə giri aɗiya hir ka tsəɗi ni nggəlar giri kamnyar adiyakur giri apatə tsa ku hara ka mji na akəmata giri akwa tsəɗi ni wa.

²⁹Kəlara mdə na ku hara pal akwa nca su nayeri ni, mda ata kədləɓəla ni kazhar nca mjirna.

³⁰MTHLAKU ku pəla, ‘Ka giri ɓəlatə tsawayeri natə I ku hamta ala giri. Giri aɗiya hara sur cika natə mji na akəmata giri ku hara ni wa. Giri aɗiya namtə kər giri dlimbur wa. I an MTHLAKU na Hyelər giri.’ ”