Read bura-pabir Pristayeri 19 Bible Online

Pristayeri 19 - bura-pabir bible

Pristayeri 19

¹MTHLAKU ku pəla aka Musa

²ka tsa pəla aka mjir Israila abbər, “Ka giri ndzi ɓɗakkarkara, kamnyar I na MTHLAKU na Hyelər giri I ɓɗakkarkara.

³Ka waskəi akwa nca giri na olkur aka mama'ni ka baba'ni, tsuwa ka tsa ɓəlatə Vir Ghərəmtaghəra apatə I ku tsawa, I an MTHLAKU na Hyelər giri.

⁴Giri aɗiya zhar ra kara vəngkər səli aka haptayeri wa, wala namtə haptayeri ar liya ka vəngkər səli ala ɗa wa. I an MTHLAKU na Hyelər giri.

⁵Ma sakatə giri ata tsi mwaɓi kamnyar hamta saɗakar jakə mwardzi, ka giri hamta akwa laku tə mdə ku thlipa ala giri, antə I ata dlu saɗakar giri.

⁶Ka giri ɓɗəmnya kumər saɗaka ni tsu vir nda wala səɓəla ɗəpari. Kəlara kum na ku mbili ka mwanta aka vir na makərkur. Antə tar ka mdə mbamta ni ka u'u

⁷kamnyar tsa ku ndzi sur cika. Antə kəlara mdə na ku səma, I ata nggəlar saɗaka ni.

⁸Antə kəlara mdə na ku ɓɗə kum ngəni akwa vir na makərkur, tsa ata wuta asarari, kamnyar tsa ku ɓzamtə surna na ɓɗakkarkara. Antə tar ka mdə kədləɓəla ni kazhar nca mji.

⁹Sakatə giri akwa fəgəi sur fakayeri ar giri, giri aɗiya nthlə mthli na ata tenga fakəu wa, tsuwa giri aɗiya hwilkə suayeri na mbili wa.

¹⁰Ga aɗiya ngka kamnyar hwilka anap na ku fwaridzi akwa fakər ngə wa, wala ɗəmta na ku pumtadzi ata di wa. Ka gə zhar ɗa aka mjir tursu kəga mətəpiyayeri, I an MTHLAKU na Hyelər giri.

¹¹Giri aɗiya həl wa, wala fəi mdə wa, wala thlandər aka nvwa giri wa.

¹²Giri aɗiya kathləmi gapani wa, kamnyar ma giri ku hara apani, giri ata hilantə thləmi na ɓɗakkarkara ni. I an MTHLAKU na Hyelər giri.

¹³Ga aɗiya ɗar bwani aka mdə wa, wala mbultsa sur ntəwulər ngə wa. Ga aɗiya ngkatə watsəɓər mdə na ku hara ala gə kəthlər har ka vir kur wa.

¹⁴Ga aɗiya thləmnya aka twangtwang wa, wala vəi sur tsamta səl akəma mdlyang wa. Ka gə thlivər ra, I an MTHLAKU na Hyelər nga.

¹⁵Ka giri ndzi ka jirkur ka hara su na kalkal akwa shariya. Giri aɗiya ncanta abbər giri hir mji na ngguɗi wa, tsuwa giri aɗiya thlivər mjir gəna wa, amma ka giri hara shariya na kalkal aka ntəwulər giri.

¹⁶Ga aɗiya cingdləmnya ata kəra mdə wa, wala zhar ta ləɓəla ata bəbal ka hamta seɗar jirkur kamnyar msərantə mpika mda akwa shariya wa, I an MTHLAKU.

¹⁷Ga aɗiya kəsi ɓzərma' nga ka kəmanggarkur akwa ɗəffa ga wa, amma tar ka gə nggaɓəladzi ka tsa, ta ga asə hara biku kamnyar ni.

¹⁸Ga aɗiya ntə ɗimikur ata kəra mdə wa, wala kəsi nvwa nga akwa ɗəffa ga wa, amma ka gə hir ntəwulər nga apatə gə hir kər nga. I an MTHLAKU.

¹⁹Ka giri ɓəlatə tsawayeri arna. Giri aɗiya paktə mwaɓiyayeri na zumzum ka da pi wa. Giri aɗiya thləka hwulfa zumzum suɗa akwa fakər giri wa. Giri aɗiya ha kari natə mdə tsa ka puwa zumzum suɗa wa.

²⁰Ma mdə laga ku pi ka ɓzər ngkwa na mafa, natə sal laga ku zhutə ni mwalankiɗa amma tsa tsu akwa mafakur, antə mda ata ɗi ɗa daci. Mda aɗi ata tsi ɗa wa, kamnyar tə tsa mafa.

²¹Sal ni ata səntə gam anyarmbwar tentər tsaptədzi kamnyar saɗakar ntə bikərni.

²²Antə prist ata kətə gam ni ka hamta ni ali kamnyar kəcə bikər mdə ni, antə bikərni ata tifəmtadzi.

²³Aghəla tə giri ku ləkwa tsəɗi Kanana ka ncimta nfwayeri ar səma, da ata ndzi dlimbur ar məva makər na ntangkəma. Antə giri aɗi ata səm yar ɗa akwa məva nayeri ni wa.

²⁴Akwa məva na nfwarkur mda ata hamta ali shanga yar nfwayeri ni apa saɗakar huwa na ɓɗakkarkara, I na MTHLAKU.

²⁵Amma akwa məva na ntəfkur giri ata mzhi səm yar nfwayeri ni. Ma giri hara apani, nfwayeri ni ata vərvər ya hang. I an MTHLAKU na Hyelər giri.

²⁶Giri aɗiya səm kum natə mamshi ku mbili akwa wa. Giri aɗiya hara ɗeaghakur wala mutukur wa.

²⁷Giri aɗiya nthləhə təngar giri wa, wala pamta shishir kumiya giri wa.

²⁸Giri aɗiya thləthlatə wala ɗahətə dza giri kamnyar ncanta abbər mta ku wutə giri wa. I an MTHLAKU.

²⁹Ga aɗiya hilantə ngkwar nga atar vu ni akwa karwakur ar mashiɗayeri wa, kamnyar ngəni ata namtə tsəɗi ni ka tsa ndzi tsəɗiyir karwakur ka ɗimikur.

³⁰Ka giri ɓəlatə Vir Ghərəmtaghəra arna, ka giri namtə ka vəi vəngkər səli ali ndzi ka daraja. I an MTHLAKU.

³¹Giri aɗiya mwari ra bara sauri akəla mjir hakdzi ka mjir tsadi wa, kamnyar da ata hilantə giri. I an MTHLAKU na Hyelər giri.

³²Ka giri nggyarghəidzi sakatə giri ata thlawar mji na ka shishi mwapu akwa kəra ɗa, ka giri nar səli aka mji ghərghəra, ka giri thlivər Hyelər giri. I an MTHLAKU.

³³Giri aɗiya hara ɗimikur aka mətəpiyayeri na ka ndzi akwa tsəɗiyir giri wa.

³⁴Ka giri wulwul ɗa apa da maɗa'ma giri, ka hir ɗa apa kəra giri. Ka giri ɗangta abbər giri ku ɗar ndzi mətəpi akwa Masar. I an MTHLAKU na Hyelər giri.

³⁵Giri aɗiya fəi mda atar baukur wala saɓəlkur wala hangkur ar sur masə wa.

³⁶Ka giri ndzi ka wayar ngkərtə kəgəɓkur su na kalkal, ka tasar ngkərtə su na kalkal. I an MTHLAKU na Hyelər giri na fwaɓəla giri akwa Masar.

³⁷Ka giri ɓəlatə shanga tsawayeri ka surthlipayeri arna. I an MTHLAKU.”