Read bura-pabir Pristayeri 22 Bible Online

Pristayeri 22 - bura-pabir bible

Pristayeri 22

¹MTHLAKU ku pəla aka Musa

²ka tsa tsawa aka Haruna kəga maɗa'ni abbər, “Ka giri nar səli ali atar vədzə hangkal aka saɗakayeri natə mjir Israila ku sənta ali. Giri aɗiya hara su na ata ɓzamtə thləmi wa. I an MTHLAKU.

³Ma kəlara mda akwa nca kəkayeri ar giri na dlimbur ku shahədzi kudzəhə ka suayeri na ɓɗakkarkara, natə mjir Israila ku hamta ali, mda ata kədləɓəla ni kazhar kəthlər ar pristkur. I an MTHLAKU.

⁴Kəkar Haruna aɗi wala duku na ka shilkər kəsəm dza na ɗimi, wala na akwa puɓəla yimər dzar salkurərni na ata səm saɗaka na ɓɗakkarkara wa, tar ma tsa ku kəcimtadzi. Kəlara mdə na ku tsəkwar su na dlimbur atar tsəkwar mshiyir mda wala mdə na ku puɓəla yimər dzar salkurərni,

⁵wala kəlara mwaɓi na dlimbur, na ana mwa ka yimər kutari, wala mdə na dlimbur,

⁶tsa ata ndzi dlimbur har ka pci təri. Tsa amzhi səm saɗaka natə mdə ku hamta ali wa, tar ma tsa ku pəra.

⁷Ma sakatə pci ku təri tsa ata ndzi kəcəkəcari, antə tsa ata mzhi səm su tə mdə ku hamta ali, kamnyar hwatu ngəni an susəmərni.

⁸Tsa aɗiya səm su na ku mti dlipa wa, wala natə mwaɓi mtaku an tsi wa, kamnyar ngəni ata namtə ni dlimbur. I an MTHLAKU.

⁹Antə tar ka shanga pristayeri ɓəlatə tsawayeri natə I ku hamta. Kamnyar ma da ku ɓəli ka hara biku, da ata mta. I an MTHLAKU na ku namtə ɗa zum ta mji.

¹⁰Mji gapani wala mətəpi wala buɗar prist amzhi səmari wa.

¹¹Amma mafayeri natə prist masta, wala natə mdə yaɓəla aviyarngkiɗa ata mzhi səm susəm ni.

¹²Ngkwar prist na ku kəl sal na aɗi prist wa amzhi səm su tə mdə ku hamta ali wa.

¹³Amma ma ngkwar ni an kughung, wala ma tsa ku ndək ka sal kula maɗankyar, natə tsa tsu ɓzərngkwa, na ku ngka aviyar baba'ni ka ndzi, tsa ata mzhi səm susəmər baba'ni. Amma mji gapani amzhi səmari wa.

¹⁴Ma mda gapani na ku səm su tə mdə ku hamta ni ali kula səndərni, tsa ata ntə suari aka prist, ka jakəngkər duku ata kəra ntəfu ar su ni.

¹⁵Pristayeri aɗiya ɓzamtə suayeri natə mjir Israila ku hamta ali wa,

¹⁶atar zhar mji gapani ka da səm suayeri ni. Kamnyar ngəni ata səntə biku aka mji ni ka vu ɗa akwa ntə biku. I an MTHLAKU, na ku namtə giri zum ta mji.”

¹⁷MTHLAKU ku pəla aka Musa

¹⁸ka tsa tsawa aka Haruna, ka maɗa'ni, ka shanga mjir Israila abbər, “Kəlara sakatə mdər Israila wala mətəpi na andzəndzi akwa Israila ku səntə saɗaka mbamba arni, wala ar nghyaɓəla alkawal, wala saɗakar hirər ɗəffu,

¹⁹ma giri ata bara kəi dluwa, tar ka mwaɓi ni ndzi salari na kula nangka. Ka tsa ndzi gyal, wala gam wala nciwa.

²⁰Ma giri ku hamta mwaɓi na ka nangka, I aɗi ata dluwari wa.

²¹Ma giri ata hamta ali saɗakar jakə mwardzi, wala ar nghyaɓəla alkawal, wala ar hirər ɗəffu, tar ka giri hamta mwaɓi na kula nangka, ma giri ata bara kəi dluwa.

²²Kəlara mwaɓi na mdlyang, wala abdala, wala natə mdə ku nthləmta bwadukwa dzari, wala na ka mbəlkari akwa hwi lu, wala na ka ɓəɓa, wala banyabanya, giri aɗiya hamta apa saɗaka mbamba ali wa.

²³Giri ata mzhi hamta mwaɓi na ka səlari saɓəl ta nvwani, kamnyar saɗakar hirər ɗəffu. Amma giri amzhi hamta ni kamnyar nghyaɓəla alkawal wa, kamnyar mda aɗi ata dluwari wa.

²⁴Giri aɗiya hamta ali mwaɓi natə mdə ku thladlərəmta, tasɓəla wala ntau, wala thlamta shipəlari wa. Giri aɗiya hamta ɗa ali wa.

²⁵Giri aɗiya hir dlu mwaɓi na ka nangka wala natə dzari aɗi kalkal wa akəla mətəpiyayeri ka hamta ni saɗakar susəma ali wa. Kamnyar jili mwaɓiyayeri apani mda aɗi ata dluwari wa.”

²⁶MTHLAKU ləkəma ka pəla aka Musa abbər,

²⁷“Kəlara sakatə kəna, wala ɓzər təma, wala ɓzər kwi ku yaɓəla dzi, tar ka tsa hara vir murfa ata vəi duku ka məmari. Amma baɗita akwa vir na nciskur ka ləkəma mda ata mzhi ngkəyari ka hara saɗakar susəma ali.

²⁸Giri aɗiya tsi məma thla wala təma ka ɓzərni vir duku wa.

²⁹Sakatə giri ata hamta saɗakar gwaɗita ali, tar ka giri hamta akwa lakwari kambəla mdə dluwa ala giri,

³⁰ka giri səməmnya tsu vir nda, giri aɗiya zhari ka tsa pi wa. I an MTHLAKU.

³¹Ka giri ɓəlatə tsawayeri arna. I an MTHLAKU.

³²Giri aɗiya hara sur səli aka thləmi wa, ka giri sənda abbər I an ɓɗakkarkara. I an MTHLAKU na ku namtə giri zum ta mambila mji damwa,

³³I an ku fwaɓəla giri akwa Masar kamnyar kəi ndzi Hyelər giri. I an MTHLAKU.”