Read bura-pabir Pristayeri 23 Bible Online

Pristayeri 23 - bura-pabir bible

Pristayeri 23

¹MTHLAKU ku pəla aka Musa

²ka tsa pəla aka mjir Israila abbər, “Nayeri ni an sakayeri natə giri ata tsaptədzi kamnyar vəngkər səli ali.”

³“Giri ka vir ngkwa natə ka giri hara kəthlər akwa, amma vir na murfəkur an Vir Ghərəmtaghəra swakti. Vir nda giri aɗiya kəthlər wa, amma ka giri tsaptədzi kamnyar vəngkər səli. Ka giri namtə Vir Ghərəmtaghəra ka tsa ndzi ali swakti, ka giri ɓəlatə ni akwa kəlara vəi madi tə giri akwa.

⁴Nayeri ni an sakayeri damwa tə mdə ku ɗəmhə kamnyar hara kucali ali tə giri ata psəmnyari akwa sakar ɗa.”

⁵“Na ntangkəma an Kucalər Fəlɓəla Kəi kamnyar vəngkər səli ali, natə mda ata baɗitari akwa tahakər vira thliya kumnya nfwar ar thliya ntang.

⁶Tsuwa tsu akwa vira thliya kumnya ntəfu ar thliya ntang ni antə giri ata baɗitə hara Kucalər Buradi na kula yist, tsa ata kura aghəla vir murfa. Akwa virayeri ni tar buradi na kula yist antə giri ata kwasari.

⁷Akwa vir na ntangkəma ar Vir Kucali ni, shanga giri ata zhar kəthlər ar giri tə giri ana hara tədəku ka tsaptədzi kamnyar vəngkər səli ali.

⁸Akwa kəlara virayeri ngəni murfə ni giri ata hamta saɗakar susəma ali. Antə akwa vir na murfəkur ni, giri ata zhar kəthlər ar giri tə giri ana hara tədəku ka tsaptədzi ka damwa kamnyar vəngkər səli.”

⁹MTHLAKU ku pəla aka Musa

¹⁰ka tsa pəla aka mjir Israila abbər, “Ma sakatə giri ku ləkwa tsəɗi natə I ata hamtari ala giri ni, julangər mthli ar giri na ntangkəma ata ndzi arna. Antə ka giri sənta aka prist.

¹¹Səɓəla ɗəpari aghəla Vir Ghərəmtaghəra Prist ata hamta julang ni ka ali apa sur cauta na ɓɗaku, antə I ata dluwari ala giri.

¹²Vir tə giri ata hamta saɗakar mthli ni, ka giri hamta saɗaka mbamba ka təma na ka məvari pal na kula nangka.

¹³Ka giri hamta saɗaka ni ata kəma duku ka kilogram suɗa ar mpur mthli tə mdə hərtə ka mal zaitun apa saɗakar susəma. Tsa ata mbamta saɗaka ngəni ata bagaɗi saɗaka, antə shiwurari ata ndzi msəra ali. Tsuwa giri ata hamta lita pal ar yimər anap apa saɗakar sur sa.

¹⁴Giri aɗiya səm mthli bilən wa, wala na hadlu, wala na ptsaptsari, wala natə mdə ku namtə buradi kəgari wa, tar ma giri ku hamta saɗakar mthli ni aka Hyel. Ka shanga giri kəga kəkayeri ar giri ɓəlatə tsawu ngəni ba saka madi.”

¹⁵“Ka giri jikaɓəla sati murfa, baɗitə ka vir na aghəla Vir Ghərəmtaghəra sakatə giri hamta julangər saɗakar mthli nda.

¹⁶Akwa vir na ntəfkumarkur, vir na aghəla Vir Ghərəmtaghəra na murfəkur, ka giri jaktə hamta saɗakar mthli bilən.

¹⁷Ka kəlara kutakəi səntə kər buradi suɗa ka mdə hamta apa saɗaka na zum ali. Ka mdə ɓwatə buradi ni ka mpwa ar kilogram suɗa ka yist, ka mdə hamta ali apa saɗakar yarakəmar mthli.

¹⁸Tsuwa giri ata səntə maɗa' təma murfa na ka məva ɗa pal pal, ka ɓzər gyal pal, ka gam suɗa, shanga ɗa na kula nangka. Giri ata hamta ɗa apa saɗaka mbamba ata kəma duku kəga saɗakar mthli ka ar sur sa. Da an saɗaka mbamba swakti ka shiwur na msəra natə I ata dluwari ka kucali.

¹⁹Tsuwa giri ata hamta nciwa pal kamnyar saɗakar biku, ka maɗa' gam suɗa na ka məva ɗa pal pal kamnyar saɗakar jakə mwardzi.

²⁰Prist ata hamta ali gamayeri na suɗa ka buradiyir sur fakəu na ntangkəma. Da ata ndzi apa sur cauta na zum tə mdə ku hamta ali kamnyar prist.

²¹Giri aɗi ata hara kəthlər ar giri tə giri ana hara tədəku wa, amma giri ata tsaptədzi kamnyar vəngkər səli. Antə kəkayeri ar giri ata ləkəma ka ɓəla tsawu ngəni ba saka madi, kəlara vəi madi tə da ata.

²²Ma sakatə giri akwa fəi sur fakər giri, giri aɗiya thli kəga na ata tenga fakəu wa, tsuwa giri aɗiya ngka ka ra hwilkə su na mbili wa. Zhar giri ɗa aka mjir tursu kəga mətəpiyayeri. I an MTHLAKU na Hyelər giri.”

²³MTHLAKU ku pəla aka Musa

²⁴ka tsa pəla aka mjir Israila abbər, “Ka giri namtə vir na ntangkəma ar thliya na murfa ka tsa ndzi Vir Ghərəmtaghəra swakti. Ma sakatə giri ku nggatə mdə ku mbur təmbəl ka giri tsaptədzi kamnyar vəngkər səli.

²⁵Vir nda giri aɗi ata hara kəthlər apa tə giri ana hara hwatu wa, amma ka giri hamta ali saɗakar susəma.”

²⁶MTHLAKU ləkəma ka pəla aka Musa abbər,

²⁷“Thliya na murfa ka virari kuma ata ndzi vir tsaptədzi na ola kamnyar hartə biku aka shanga mji. Vir nda giri aɗiya səm su shang wa, amma ka giri tsaptədzi ata kəma duku kamnyar vəngkər səli ka hamta saɗakar susəma aka MTHLAKU.

²⁸Vir nda swakti mda aɗi ata kəthlər wa. Tsa an vir tə mda ata harta ala giri bikər giri.

²⁹Antə kəlara mdə na aɗi nggəlar msərakur ka zhar səm su vir nda wa, mda ata ndəkəmta ni kazhar mjirni

³⁰Tsuwa kəlara mdə na ku hara kəthlər vir nda I ata tsi ni.

³¹Giri aɗi ata hara kəthlər wala raka wa. Tsawu ngəni ata ndzi ala giri kəga kəkayeri ar giri ba saka madi, akwa kəlara vəi tə giri ata.

³²Ngəni ata ndzi Vir Ghərəmtaghəra na ola ala giri, baɗitə ka tahakər vira thliya əmdla ar thliya ngəni har ka mwanta akwa tahakər səɓəla ɗəpari. Ka giri ɓəlatə vir ngəni, ka zhar ta səm su vir nda.”

³³MTHLAKU pəla aka Musa,

³⁴ka tsa pəla aka mjir Israila abbər, “Akwa vira thliya kumnya ntəfu ar thliya na murfa antə ka giri hara Kucalər Kir Səva ar vir murfa.

³⁵Akwa vir na ntangkəma antə ka giri zhar shanga kəthlər ar giri tə giri ana hara tədəku, ka tsaptədzi kamnyar vəngkər səli.

³⁶Parang viri giri ata hamta saɗakar susəma ar vir murfa. Akwa vir na nciskur ka giri tsaptədzi ka damwa kamnyar vəngkər səli ka hamta saɗakar susəma ata bagaɗi saɗaka. Ngəni an vir vəngkər səli na ola antə giri aɗiya hara kəthlər wala raka wa.

³⁷Nayeri ni an sakayeri natə I ku carɓəla ka mji tsaptədzi kamnyar vəngkər səli, ka sakatə giri ata hamta saɗakar susəma, saɗaka mbamba, mthli, ka yimər anap. Giri ata hara kəlara pal akwa nca ɗa akwa sakarni.

³⁸Ata kəra Vir Ghərəmtaghəra natə giri ana ɓəla hwatu, giri ata ɓəlatə Vir kucali ka vəngkər səli nayeri ni. Tsuwa giri ata hamta saɗakayeri ni ata kəma duku kəga cautayeri, ka saɗakar nghyaɓəla alkawal ka na ar hirər ɗəffu.

³⁹Akwa vira thliya kumnya ntəfu ar thliya na murfa, aghəla tə giri ku tsaptə sur fakər giri ka səvi ni, ka giri hara kucalari har vir murfa. Vir baɗitari ka vir tsikəra kucali, na an vir na nciskur, ata ndzi virayeri ar ghərəmtaghəra ala giri.

⁴⁰Akwa vir na ntangkəma ka giri tsaptə yar nfwa na ɓɗakta shang, tə giri ɗəmi ata nfwayeri ar giri, ka thlipa ar nfur dipənau. Ka giri ɓəltsa tsiya nfwayeri na ka thlali ar mnya zərkəu, ka baɗitə hara kucali ka hu thləmi ar vir murfa.

⁴¹Ka giri hara kucali ar vir murfə ni tədək məva. Ngəni an su tə giri kəga kəkayeri ar giri ata harari ba saka madi. Ka giri hara ngəni akwa thliya na murfa.

⁴²Shanga mjir Israila ata ndzi akwa tentayeri ar vir murfa,

⁴³kamnyar ka kəkayeri ar giri sənda abbər I an vu kəkayeri arɗa ka da ndzi akwa tentayeri sakatə I fwaɓəla giri akwa Masar. I an MTHLAKU na Hyelər giri.”

⁴⁴Apani antə Musa ku ngkərɓəla aka mjir Israila virayeri ar kucali ka vəngkər səli aka MTHLAKU.