Read bura-pabir Pristayeri 24 Bible Online

Pristayeri 24 - bura-pabir bible

Pristayeri 24

¹MTHLAKU ku pəla aka Musa

²ka tsa tsawa aka mjir Israila abbər, “Ka giri səntə mal Zaitun na ɓɗaku laga kamnyar pitəlayeri na akwa tent, kamnyar ka da ləkəma ka hamta parakəu.

³Tədəku tahaku ka Haruna njiu u'u akwa pitəlayeri ka da ləkəma ka hamta parakəu baɗitə ka tahaku nda har ka vir kura. Da ata ləkəma ka hara su ngəni ba saka madi anda akwa tentər tsaptədzi, akəma Akwati Alkawal.

⁴Antə ka Haruna ɗəmhə ka wulwul pitəlayeri na ata sur vətə pitəlayeri tə mdə namtə ka dinar ni tədəku akəmi.”

⁵“Ka gə kətə mpwa natə hangkurari ku mwantə kilogram sərkumari ka nfwar, ka ra ɓwata buradi kər kumnya suɗa kəgari.

⁶Ka gə pwi ɗa akwa layi suɗa ata kəra tebər dinar, ka kəlara layi ndzi ka kər buradi ngkwa ngkwa.

⁷Ka gə pwi sur shiwura na msəra adzə kəlara layi antə mda ata mbamta ni ata vəya buradi apa saɗakar susəma ali.

⁸Ka Haruna ləkəma ka vəi jili buradi ngəni ata tebəl tədəku Vir Ghərəmtaghəra ar mjir Yahudi ata vəya mjir Israila, kamnyar ka alkawal arna kəga mjir Israila ndzi har ba saka madi.

⁹Jili buradi ngəni ata ndzi aka Haruna ka kutakəyirni. Antə da ata kwasari akwa vəi na ar Hyel, antə mdə damwa aɗi na ata tsəkwarari wa. Kamnyar ngəni an bwar susəma natə mdə ku hamta ali kamnyar pristayeri.”

¹⁰Vir laga mdə laga na ka mama'ni ngkwar Israila ka baba'ni ɓzər Masar ku ləkwa mpa ka mdər Israila na gwang.

¹¹Antə sakatə da akwa mpa ni ɓzər ngkwar Israila ni ku ngkər ndər ɗimi na ku ɓzamtə thləma MTHLAKU, antə mdə ku burkatə ni akəma Musa. Thləma mama'ni an Shelomith, ngkwar Dibri na akwa nyarmbwar Dan.

¹²Antə Musa ku hartə ni akwa vəi laga kwabə mda nggaɓəla su tə MTHLAKU ata pəlari ata kərari.

¹³Antə MTHLAKU pəla aka Musa abbər,

¹⁴“Kəɓəla mdə ngəni kazhar kuta di. Kara pəla aka shanga mji na ku nggatə ni akwa nggəl su ni ka da pungkər tsiya ɗa ata kərari. Aghəla nda ka shanga mji ndzəndzəh ni ka tsi ni ka pela.

¹⁵Aghəla ngəni ka gə pəla aka mjir Israila abbər, kəlara mdə na ku pəla ndər na ɗimi ata kəra Hyel ata wutə watsəɓari,

¹⁶mda ata tsi ni. Antə kəlara mdər Israila, wala mətəpi na ka ndzi akwa nca mjir Israila, na ku ngkər ndər na ɗimi ata kəra Hyel, mji ata ndzəndzəh ni ka pela har ka tsa mta.

¹⁷Kəlara mdə na ku tsi nvwani, mda ata tsi ni.

¹⁸Tsuwa mdə na ku tsi mwaɓiyir nvwa ni, tar ka tsa nta. Shariya ni an mpika ata vəya mpika.

¹⁹Ma mdə na ku dəkəi nvwa ni, mda ata dəkəi ni tsu apatə tsa dəkəi nvwa ni akwa ni.

²⁰Ma tsa ɓəli ɗethlər mda, mda ata ɓələmta ɗethlərni, nca ata vəya nca, ka thlir ata vəya thlir. Kəlara jili dəkəidzi tə mdə ku hara aka nvwa ni, ka jili dəkəidzi ndaga antə mda ata ntari.

²¹Mdə na ku tsi mwaɓi, ka tsa ntəmta, amma ma tsa tsi mda, ka mdə tsi ni.

²²Tsawayeri ngəni ata ndzi aka shanga giri na mjir Israila ka mətəpiyayeri na akwa nca giri. I an MTHLAKU na Hyelər giri.”

²³Sakatə Musa ku kuri hamta tsawayeri ni aka mjir Israila, antə da ku kəɓəla mdə na hara biku nda kazhar kuta di, ka ndzəndzəhtə ni har ka tsi ni. Apani antə mjir Israila ku hara tsu apatə MTHLAKU ku tsawa aka Musa.