Read bura-pabir Pristayeri 25 Bible Online

Pristayeri 25 - bura-pabir bible

Pristayeri 25

²ka tsa pəla aka mjir Israila abbər, “Ma sakatə giri ku ləkwa tsəɗi ngəni tə I akwa hamta ala giri ni, tsəɗi ni ata ɓəlatə kəlara məva na murfəkur kamnyar nar səli ali.

³Giri ata mzhi thləkata fakayeri ar giri, ka pamta nfwayeri ar anap, ka fəi sur fakayeri ar giri ar məva ngkwa.

⁴Amma akwa məva na murfəkur ka giri zhar shanga fakayeri ar giri ka da ghərɓəlaghəra ar məva pal swakti kamnyar nar səli aka thləmi. Antə giri aɗi ata thləka fakayeri, wala pamta nfur anap ar giri wa.

⁵Giri aɗiya səvi ka mthli na ptsə akwa fakəu kula mda thləka wa, wala ɗəm yar anap na kula mda pamta kəra nfur ɗa wa. Ka giri zhar ka fakayeri ni ghərɓəlaghəra ar məva pal swakti.

⁶Wala tə giri aɗi ata tsuhwa akwa məva ni wa, di ata ptsanta su, ka ya su hang tə susəma ata mzhi giri kəga mafayeri ar giri, ka mjir kəthlər watsəɓa ala giri, ka mətəpiyayeri na ka ndzi akwa nca giri.

⁷Tsuwa mwaɓiyayeri ar giri na avi ka mwaɓi mtaku ata ndlantədzi ka su tə di ata hamtari.”

⁸“Ka giri jikatə məva murfa vəyari murfa, antə məva murfə murfa vəyari murfə ni ata ndzi məva nfwarkumari ka əmdla.

⁹Antə akwa vira thliya kuma ar thliya na murfa na ar vir Kəcimta Biku na Ola, ka giri vu ka mji mbur təmbəl ka kuraku na ola akwa shanga tsəɗi ni.

¹⁰Ka giri namtə məva ni ka tsa ndzi zum ta hwada, ka mdə psəmnya labar msərmsərkur aka shanga mji na akwa tsəɗi ni. Tsa ata ndzi məvar kucali ala giri, kamnyar mda ata zhar ka kəlara mafa ngka aviyar ɗa, fakəu tə mdə masɓəla ata ngka aka mthlakari.

¹¹Məva na ntəfkumarkur ni ata ndzi məvar kucali ala giri. Antə giri aɗi ata thləka fakayeri, wala səvi ka mthli na ptsa kula mda thləka, wala ɗəm yar nfur anap ar giri na kula giri pamta ɗa wa.

¹²Məva ni swakti ata ndzi məvar kucali ala giri, tsa ata ndzi zum ala giri. Antə giri ata səm barkar su tə di ku hamta ala giri daci.

¹³Akwa məvar kucali ni ka kəlara mda ngka akwa fakər kəkarni.

¹⁴Ma giri ata ɗəl fakəu aka nvwa giri na mjir Israila, wala masə fakəu akəla ɗa, giri aɗiya fəi ɗa wa.

¹⁵Ma giri ata masə fakəu wala ɗəl fakəu ka giri ngkərha kwabari kalkal ka hangkur su tə mda ata mzhi wutari akwa məvayeri ni kwabə məvar ngka kəgari aka mthlakari a hara.

¹⁶Ma fakə ni ata hara məva hang, masari ata hara kwaba hang, ma məvari raka, kwabari ata ndzi raka, kamnyar su tə mda ata ɗəlari ni an hangkur su tə mda ata mzhi wutari ata fakə ni.

¹⁷Giri aɗiya hir ka giri fəi nvwa giri wa, amma ka giri kələngkər ali. I an MTHLAKU na Hyelər giri.

¹⁸Ka giri kələngkər ka hara shanga su tə I ku tsawa ala giri, antə giri ata ndzi lapiya akwa tsəɗi ni.

¹⁹Di ata hamta yarni, antə giri ata səmari ka ndla, ka ndzəndzi lapiya kula thlivəra.

²⁰Nuhum giri ata dzama abbər man su tə giri ata səmari akwa məva na murfəkur, ma giri aɗi ka thləka wala səvi ka sur fakəu wa ri?

²¹I ata vu ka di hamta susəma hang akwa məva na ngkwakur na ata mzhi səmər giri ar məva makər.

²²Sakatə giri ata thləka fakər giri akwa məva na nciskur, giri ata səm mitəfaku ar məva na ngkwakur nda, tar akwa məva na əmdləkur antə giri ata səm su tə giri thləka akwa məva na nciskur.”

²³“Giri aɗiya ɗələmta fakəu aka mdə ka tsa ndzi arni ba saka madi wa, kamnyar di ni arna, antə giri an mətəpi ka mjir hayari akəli.

²⁴Akwa kəlara sakatə giri akwa masə faku, ka giri sənda abbər mdə na ɗələmta ni ata mzhi masɓəlari ka damwa.

²⁵Ma yangkura ga na mdər Israila ku ndzi mdər bwani ka ləkwa ɗəl fakərni, yangkurari na kudzəha ata mzhi masɓəla alari fakə ni.

²⁶Ma yangkura ga aɗi na amzhi masɓəlari wa, ga ata sə pəli sur nga, ma ga ku wutə kwaba aghəla nda.

²⁷Antə tsa ata jikaɓəla məvayeri na mbila akəmata Məvar Kucalər Ngka ka su ni ahara, ka ntəmta aka mdə na mastə fakə ni kwabar məvayeri ni. Antə tsa ata mzhi pəli fakə ni.

²⁸Amma ma ga aɗi mzhi wutə kwabar pəli fakə ni wa, fakə ni ata ndzi aka mdə na mastə ni har ka vədza aka Məvar Kucalər Ngka ka su. Akwa məva ndaga mda ata ngka ka fakə ni aka mthlakari na hwatu.

²⁹Ma ga an ku ɗələmta kəyir nga na akwa kuta di na ka katangga, ga ata mzhi pəli kəi ni akwa məva pal ka masər giri ni. Mdə ku hamta məva pal daci kamnyar ka mthlakər kəi ni mzhi mbuli kəyirni.

³⁰Amma ma ga aɗi mzhi pəliyari akwa məva pal ni wa, ga aɗi ka lakur pəliyari kəra wa. Antə kəi ni ata ndzi aka mdə na mastə ni kəga kəkayeri arni. Mda aɗi ata mzhi jaktə vu mdə ni ka tsa ngka ka kəi ni aka mthlakari wala akwa Məvar Kucalər ngka ka su wa.

³¹Amma kəyayeri na akwa di na kula katangga ata ndzi tsu apa mtakayeri ndzang, antə mda ata mzhi pəliyari. Tsuwa mda ata ngka ka da akwa Məvar Kucalər Ngka ka su.

³²Amma ar mjir Lawi, da ata mzhi pəli kəyayeri arɗa na akwa di na ka katangga akwa kəlara sakatə da hira.

³³Ma mdər Lawi aɗi hir pəli kəi tə tsa ɗələmta akwa bərni ni wa, antə tar ka mdə ngka ka kəi ni alari akwa Məvar Kucalər Ngka ka su. Kamnyar kəyir mjir Lawi na akwa kauyayeri arɗa an arɗa ba saka madi akwa nca mjir Israila.

³⁴Amma mda aɗi ata ɗəl vəyayeri ar ɓəla na kalaktə kauyayeri ar mjir Lawi wa, kamnyar da an arɗa ba saka madi.”

³⁵“Ma ɓzərma' giri na mdər Israila ku ndzi ngguɗi akwa nca giri, tə tsa amzhi vəi kər ni wa, ka giri dlar ni apatə mda ana dlar mətəpi, ka tsa ləkəma ka ndzəndzi akwa nca giri.

³⁶Giri aɗiya vəngkər yimi ata kəra kəlara su tə giri ku təpata alari wa. Amma ka giri thlivər Hyel, ka zhar ɓzərma' giri ka tsa ləkəma ka ndzəndzi akwa nca giri.

³⁷Giri aɗiya təpata kwaba wala ɗəl susəma aka yangkura giri, ka bara yimi ata kər wa.

³⁸I an MTHLAKU na Hyelər giri, na fwaɓəla giri akwa Masar, kamnyar kəi hamta ala giri tsəɗi Kanana, ka kəi ndzi Hyelər giri.”

³⁹“Ma kəlara mdər Israila na akwa nca giri ku ndzi mdər bwani har ka ɗələmta kərni ala ga, ga aɗiya vu ni akwa kəthlər mafakur wa.

⁴⁰Ka gə namtə ni apa mdər kəthlər watsəɓa wala apa mətəpi na akwa nca giri. Tsa ata hara kəthlər ala gə har ka mzhitə Məvar Kucalər Ngka ka su.

⁴¹Akwa saka na ndaga tsa kəga maɗa'ni ata ngka adzə mjirni ka akwa kifər kəkarni.

⁴²Mjir Israila an buɗayeri arna. I an fwaɓəla ɗa akwa mafakur akwa Masar, antə mda amzha ɗələmta ɗa apa mafa wa.

⁴³Ga aɗiya nca duna alari apa tsa mafa wa, amma ka gə thlivər Hyelər nga.

⁴⁴Ma ga ata bara mafa, ga ata mzhi mastari akwa nca mji damwa na kalaktə giri.

⁴⁵Tsuwa giri ata mzhi mastə maɗa' mətəpiyayeri na ka ndzi akwa nca giri kəga kutakəyir ɗa. Antə maɗa' ɗa natə mdə yaɓəla ɗa akwa tsəɗi ni ata mzhi ndzi ar giri ka kəra giri.

⁴⁶Giri ata mzhi zhar ɗa apa kifa aka maɗa' giri, tə da ata hara kəthlər mafakur ala ɗa har kurər mpika ɗa. Amma giri aɗiya nar bwani aka nvwa giri na mjir Israila wa.

⁴⁷Ma mətəpi laga na ka ndzi akwa nca giri ku ndzi mdər gəna, amma ɓzərma' giri na mdər Israila ku ləkwa bwani har ka ɗələmta kərni apa mafa aka mətəpi ni,

⁴⁸pal akwa nca maɗa'ma'ni ata mzhi pəli ni,

⁴⁹wala msəkərni, wala ɓzər msəkərni, wala yangkurari damwa na kudzəha ata mzhi pəli ni. Wala tsuwa ma da ku wutə sur kəra ɗa, da ata mzhi pəli kər ɗa.

⁵⁰Tsa ka mdə na mastə ni ni ata jikaɓəla hangkur məva na mbila akwabə Məvar Kucalər Ngka ka su ni a hara. Antə tsa ata ntəmta su tə mda ata mzhi tsiyari ata kəra mdər kəthlər ar məvayeri ni aka mthlakərni.

⁵¹Ma məvayeri ku mbili hang, tsa ata ntəmta bwar ola kwaba tə mdə masə ni kəgari ni kamnyar pəli kərni.

⁵²Ma məvayeri ni mbil raka kwabə Məvar Kucalər Ngka ka su a hara, tsa ata ngkərtə su na mbila ka ntəmta su na kalkalari kamnyar pəli kərni.

⁵³Mətəpi na masə ni ata namtə ni apa mdər kəthlər watsəɓa ar məva ata məva, tsa aɗi ata hara bwani alari wa.

⁵⁴Wala ma tsa aɗi msərantədzi akwa lakwayeri ngəni wa, akwa Məvar Kucalər Ngka ka su mda ata psi ni kəga maɗa'ni.

⁵⁵Mdər Israila aɗi ata ɗar ndzi mafa na ba saka madi aka mdə wa, kamnyar giri na mjir Israila an mafayeri arna natə I fwaɓəla akwa Masar. I an MTHLAKU na Hyelər giri.”