Read bura-pabir Pristayeri 26 Bible Online

Pristayeri 26 - bura-pabir bible

Pristayeri 26

¹“Giri aɗiya namtə haptayeri, wala martə dludzayeri, wala nci pelayeri akwa tsəɗiyir giri, ka vəngkər səli ala ɗa wa. I an MTHLAKU na Hyelər giri.

²Ka giri ɓəlatə Vir Ghərəmtaghəra ka nar səli aka vəi vəngkər səli ali. I an MTHLAKU.”

³“Ma giri ku kələngkər ali ka ɓəlatə tsawayeri arna,

⁴I ata hamta ala giri yimərhyel akwa saka na kalkalari kamnyar ka sur fakəu hamta susəma, ka nfwayeri ya.

⁵Giri ata ləkəma ka fa mthli har ka vədza aka sakar ɗəm yar nfwayeri, giri ata ləkəma ka ɗəm yar nfwayeri har ka vədza aka sakar thləka. Giri ata səm ka ndla apa tə giri ata barari, ka ndzi lapiya kula thlivəra akwa tsəɗiyir giri.

⁶I ata hamta ala giri msərakur akwa tsəɗiyir giri ka giri pəpəi ka heni kula thlivəra. I ata kədləmta shanga mwaɓiyayeri na ɗimi ɗimi kazhar tsəɗiyir giri, antə mpa aɗi ata səkwa tsəɗiyir giri kəra wa.

⁷Giri ata sə kədlə dawayeri ar giri, ka tsəgəi ɗa ka katsakar.

⁸Mjir giri ntəfu ata mzhi mpamta mji aru pal, antə mjir giri aru pal ata mula aka dəpu kuma. Antə giri ata sə kurəmta dawayeri ar giri ka katsakar.

⁹I ata vədzə barka ala giri antə giri ata ya maɗa' hang, I ata nghyantə alkawal natə I hara ala giri.

¹⁰Giri ata ndzi ka susəma hang apa su gapani har tə giri ata pumta mitəfaku kamnyar nar laku aka bilənari.

¹¹I ata ndzi akwa nca giri tədəku akwa tentər tsaptədzi, I aɗi ata zhar giri wa.

¹²I ata mwa akwa nca giri, kəi ndzi Hyelər giri, antə giri ata ndzi mjirna.

¹³I an MTHLAKU na Hyelər giri na ku fwaɓəla giri akwa Masar ta giri a ləkəma ka ndzi mafar ɗa. I ku msərantə giri ka kəli kələr mafakur ata wulya giri, antə kulini ka giri psi dza giri ka mwa kula thlivəra.”

¹⁴“Amma ma giri aɗi ata psi thləm ali ka ɓəlatə tsawayeri arna wa,

¹⁵ma giri ku rutə ra, ka nggəlar tsawayeri arna, ka ɓəli alkawal natə I ku hara kəga giri,

¹⁶I ata ɗi giri ka su nayeri ni: I ata thlenta asar ata kəra giri ka tsa giri ka shilkər mta, ka dzəkdzəku na ata tsi nca giri ka thlarəmta giri. Giri ata thləkamta hwulfa gapani, kamnyar dawayeri ar giri ata nggyari giri ka səməmnya su tə giri thləka.

¹⁷I ata nggəlar giri antə dawar giri ata sə mula ala giri. Mji na nggəlar nca giri an ata sə hara kuthlikur ata kəra giri. Antə giri ata sə hwi kula mda akwa kədla giri.

¹⁸Antə ma ba kulini giri aɗi kələngkər ali wa, I ata jaka ala giri mwavərkur bwani ni ka bwa murfa kamnyar bikər giri.

¹⁹I ata ɓələmta dunar gayar giri, kəi ngkata ala giri yimərhyel, ka di ulantədzi ɓəɓal apa liya.

²⁰Shanga ghərər giri ata ndzi gapani, kamnyar tə di aɗi ata hamta sur fakəu wa, tsuwa nfwayeri aɗi ata ya wa.

²¹Antə ma ba kulini giri tsu akwa nggyarɗəkur ali, I ata jakəngkər ala giri bwani ni ka bwa murfa, kamnyar bikər giri.

²²I ata thlentə mwaɓi mtaku na ɗimi akwa nca giri, antə da ata tsəgəi maɗa' giri kəga mwaɓiyayeri ar giri. Antə giri ata sə mbil raka, kula mji akwa laku.

²³Ma har akwa bwaniyayeri ngəni giri aɗi palidzi ka kələngkər ali wa, amma giri ku ləkəma ka rutə ra,

²⁴I ata ndzi mwavər ala giri, ka hara ala giri bwani na ata təramta na ndaga ka bwa murfa, kamnyar bikər giri.

²⁵I ata səntə dləra ata kəra giri na ata ɗar bwani ala giri kamnyar ɓəli alkawal na akwa daɓwa mburu. Antə wala ma giri hwi ka ra ɗuwardzi akwa bərniyayeri ar giri, I ata thlentə shilkayeri ka da tsəgəi giri anda, antə dawayeri ar giri ata mula ala giri.

²⁶I ata kəmta hangkur susəma tə giri ana wuta, natə tar ka kutakəi kuma sə sək ɗəvər lindi pal. Da ata ngkərtəngkərtə susəm ni ka ndəkəmta raka raka, antə wala ga an ka susəma ga aɗi ata səmari ka ndlə wa.

²⁷Ma ba kulini giri aɗi psi thləm ka kələngkər ali wa, ma giri tsu akwa ləkəma ka nggyarɗəkur ni,

²⁸I ata ndzi mwavər ala giri ka duna. Antə I ata hara bwani na mwavər ka duna na ata təramta na ndaga ka bwa murfa, kamnyar bikər giri.

²⁹Mi ata hara mwavər apa ka tsa tsi giri har tə giri ata sə ɓɗə maɗa' giri.

³⁰I ata huzamta mashiɗayeri ar giri, ka ndlagamta vəi mba sur shiwura ar giri. I ata zhar mshiyir giri ata kəra haptayeri ar giri na kula mpika, ka cikə giri.

³¹I ata namtə bərniyayeri ar giri ka da ndzi fya. Mashiɗayeri ar giri ata ndzi kula mda, tsuwa I ata nggəlar ta dlu saɗakayeri ar giri.

³²I ata huzamta tsəɗiyir giri ɗimi ɗimi har tə dawayeri ar giri na ata sə ndzəndzi akwa ata sə ndatədzi ata kəra su tə mdə hara aka tsəɗi ni.

³³I ata səntə dləra ata kəra giri kəi titiləmta giri akwa tsəɗiyayeri, ka tsəɗiyir giri ndzi fya, ka bərniyayeri ar giri ata ngka apa mzhiku.

³⁴Apani antə di ata wutə ghərəmtaghəra ka nggatə msərakur kamnyar mda aɗi ata tsəkwar ni akwa sakatə giri akwa tsəɗiyir dawar giri wa.

³⁵Akwa sakatə di ni ata ndzi kula mda, tsa ata wutə ghərəmtaghəra natə tsa aɗi ɗar wutari akwa sakayeri ar ghərəmtaghəra na təramta wa.

³⁶Mji na ku mbili akwa nca giri ka ləkwa tsəɗiyir dawar giri, I ata nghyantə giri ka thlivəra natə wala kuraka thlali tə shambar ata fyari ata kədləmta giri. Antə giri ata hwi ka ndla apa dawar giri an akwa kədlə giri akwa mpa.

³⁷Giri ata tərəngkər ka ndlangkərdzi aka nvwa giri wala tə mda aɗi akwa kədlə giri wa. Giri aɗi ata mzhi mpa kəlara dawar giri wa.

³⁸Antə giri ata mtəgəmtadzi tsu akwa tsəɗi na aɓəla, ka dawar giri harəmta giri anda.

³⁹Giri na ata mbil ka mpika akwa tsəɗiyir dawar giri, giri ata sə hiɗamtadzi kamnyar bikər giri ka bikər kəkayeri ar giri.

⁴⁰Amma ma kəkayeri ar giri ku sə jikaɓəla bikər ɗa ka bikər mjir yar ɗa, ka nggyarɗəkur tə da hara ali,

⁴¹na vu tə I ku ndzi mwavər ala ɗa, ka mwantə ɗa akwa tsəɗiyir dawayeri arɗa. Amma ma sakatə da ku tərghəi kəra ɗa ka kiɗə tifəmtar biku, ka pali surharar ɗa,

⁴²I ata ɗangtə alkawal arna aka Yakub, ka Ishaku, ka aka Ibrahim, antə I ata vədzə barka aka tsəɗi ni.

⁴³Amma ntangkəma tar ka tsəɗi ni ndzi kula mji akwa, ka tsa ghərɓəlaghəra ɓɗaku. Aghəla nda ka da dlu watsəɓər bikər ɗa, kamnyar tə da ku rutə ra ka nggəlar tsawayeri arna ni.

⁴⁴Wala apani, sakatə da akwa tsəɗiyir dawar ɗa I aɗi ata zhar dlar ɗa cap wa. I aɗi ata rutə ɗa, wala nggəlar ɗa, wala cikə ɗa, wala shamta ɗa karkar wa. Tsuwa I aɗi ata ɓəli alkawal arna ka da wa. I an MTHLAKU na Hyelər ɗa.

⁴⁵Kamnyar ɗa antə I ata ɗangtə alkawal natə I ku mbwi kəga kəkayeri arɗa natə I fwaɓəla akwa Masar. Tsəɗiyayeri ku wutə su tə I hara kamnyar ɗa kamnyar kəi ndzi Hyelər ɗa. I an MTHLAKU.”

⁴⁶Nayeri ni an tsawayeri ka surthlipə natə MTHLAKU ku hamta aka mjir Israila atar Musa sakatə tsa ata kəra Gar Sinai.