Read bura-pabir Pristayeri 27 Bible Online

Pristayeri 27 - bura-pabir bible

Pristayeri 27

¹MTHLAKU ku pəla aka Musa

²ka tsa tsawa aka mjir Israila abbər, “Ma ga ku hara alkawal abbər ga ata hamta mda aka MTHLAKU ka nghyaɓəla alkawal ni, ga ata mzhi pəli mdə ni atar ntəmta kwaba na kalkalari,

³akwa laku ngəni: Mdə sal na ka məvari sərkumari ka mwanta aka ngkwakumari mda ata ntə liyar adzərfa ntəfkumari, ata sur ngkər su tə mda ana kəthlər kəgari akwa Vəi na Ɓɗakkarkara ni.

⁴Mwala na ka məvari sərkumari ka mwanta aka ngkwakumari mda ata ntə liyar adzərfa makkumari.

⁵Ɓzər sal na ka məvari ntəfu ka mwanta aka sərkumari, mda ata ntə liyar adzərfa sərkumari. Ɓzərngkwa na ka məvari ntəfu ka mwanta aka sərkumari mda ata ntə liyar adzərfa kuma.

⁶Ɓzər sal natə məvari aɗi təramta ntəfu wa, mda ata ntə liyar adzərfa ntəfu. Ɓzərngkwa natə məvari aɗi təramta ntəfu wa, mda ata ntə liyar adzərfa makər.

⁷Mdə sal na ku təramta məva ngkwakumari mda ata ntə liyar adzərfa kumnya ntəfu. Mdə mwala na ku təramta məva ngkwakumari mda ata ntə liyar adzərfa kuma.”

⁸“Ma ga ku kətə alkawal ar hamta mda ali amma ga ngguɗi kamta tə ga amzhi ntəmta su tə mdə ku thlamta kamnyar pəli mdə ni wa, ka gə mwari adzə prist, antə prist ata thlamta ala gə su na kalkal ka duna ga ka gə ntəmta.

⁹Ma ga an kətə alkawalər hamta ali saɗakar mwaɓi na kalkal kəi dluwa, tsa ku ndzi arna,

¹⁰antə ga aɗi ata paltari wala pəliyari ka mwaɓi damwa wa. Ma ga ku kar ka pəla ga ata paliyari, japwa ɗa ata ndzi arna.

¹¹Amma ma mwaɓi ni an dlimbur tə mda amzhi hamta saɗaka ali kəgari wa, tar ka gə mwantə mwaɓi ni aka prist.

¹²Antə prist ata wulha ɓɗakkur ka ɗimikur mwaɓi ni ka tsa thlamta su ata kər, antə kəlara su tə prist ku thlamta ku ndzəndzi.

¹³Amma ma ga ata bara masəɓəlari, ga ata ntəmta kwabar masari ka gə jakəngkər duku akwa kuta ntəfu ar kwaba ni.

¹⁴Ma gə na ku hamta kəyir nga ali, prist an ata si ka tsa wulha ka thlamta masari ata kəra ɓɗakkur kəi ni, antə su tə tsa ku thlamta ku ndzəndzi.

¹⁵Ma ga ata bara masɓəla kəi natə gə hamta ni, tar ka gə ntəmta kwabar masər kəi ni ka gə jakəngkər duku akwa kuta ntəfu ar kwaba ni.”

¹⁶“Ma ga ata hamta bwadukwa fakər nga ali, ga ata thlamta masari ata kəra hangkur hwulfa tə mda ata mzhi thləkamtari ata vəi ni, mda ata masə kəlara vəi na ata thləkamta barli kilogram sərkumari ata kəra liyar adzərfa kuma.

¹⁷Ma ga hamta fakə ni akwa sakar Məvar Kucalər Ngka ka su, mda aɗi ata kəmta su akwa sur masari wa.

¹⁸Amma ma ga hamta fakə ni aghəla Məvar Kucalər Ngka ka su, prist ata ɗəmhə kwabari ata kəra hangkur məva na ku mbili Kwabə Məvar Kucali ni. Apani ga ata kəmta kwabar masə fakə ni.

¹⁹Ma gə na hamta fakə ni ata bara ka gə masɓəla sur nga, ga ata ntəmta kwabar masari ka gə jakəngkər bwa duku ata kəra ntəfu ar masə fakə ni.

²⁰Ma ga aɗi pəli fakə ni wa, antə mdə damwa ku masɓəla, to ga aɗi ata ɗar fakə ni kəra wa.

²¹Ma sakatə mda ata ngka ka fakə ni akwa Məvar Kucalər Ngka ka su, fakə ni ata ndzi ali. Antə mda ata hamta ri aka prist.

²²Ma ga ata hamta ali fakər nga tə gə masta, na aɗi bwadukwa kifər kəkar ngə wa,

²³prist ata thlamta kwabar masə fakə ni ata kəra hangkur məva na mbila kwabə Məvar Kucalər Ngka ka su asi. Antə giri ata ntəmta kwabari tsu vir nda. Antə kwabari ata ndzi ali.

²⁴Akwa Məvar Kucalər Ngka ka su mda ata ngka ka fakə ni aka kutakəyir mthlakari na hwatu.

²⁵Mda ata ɗəmhə shanga kwaba masər su kalkal, ata sur ngkər su tə mda ana kəthlər kəgari akwa Vəi na Ɓɗakkarkara ni.

²⁶Shanga yarakəmar mwaɓi, wala thla wala təma, an arna hwatu, kamnyar ngəni ga aɗiya dzama abbər ga ata hamta ali na ndaga apa saɗakar hirər ɗəffu wa.

²⁷Amma ma tsa an yarakəmar mwaɓi na dlimbur, ga ata mzhi masəɓəlari ata kəra kwabar masari tə mdə ku thlamta, ka gə jakəngkər duku ata kəra ntəfu ar kwaba ni. Ma ga aɗi hir masɓəlari wa, prist ata ɗələmtari aka mdə damwa ata kəra masər su tə ɓɗakkur mwaɓi ni ku tamta.

²⁸Amma kəlara su tə ga ku hamta ali, wala an mda, wala mwaɓi, wala fakəu na ar kutakəi, mda amzhi ɗələmtari wala pəliyari wa. Kəlara su tə ga ku hamta tsa ku ndzi arna ba saka madi.

²⁹Wala an mdə natə ga ku kurtə ka hamta ni ali, ga amzhi pəli ni wa, tar ka mdə tsi ni.

³⁰Shanga zaka ar sur fakəu wala mthli, wala yar nfwa an arna, antə tar ka mdə hamta ni ali.

³¹Ma ga ata bara pəli duku akwa kuta kuma ar ngə ni tar ka gə jakəngkər duku akwa kuta ntəfu ar kwaba na kalkal ka masər su ni.

³²Kəlara mwaɓi na ku si na kumkur akira zwalər mdər ɓəla ata ndzi arna.

³³Ga aɗiya car mwaɓi na kumkur ni atar ɓɗakkurərni wala ɗimikurərni wa, wala palɓəla na ɓɗaku wala ɗimi wa. Ma ga ku pali ka damwa antə japwa ɗa ata ndzi arna, tsuwa mda amzhi masɓəlari wa.”

³⁴Nayeri ni an tsawayeri natə MTHLAKU ku hamta aka mjir Israila atar Musa ata kəra Gar Sinai.