Read bura-pabir Pristayeri 3 Bible Online

Pristayeri 3 - bura-pabir bible

Pristayeri 3

¹Ma ga ata hamta saɗakar jakə mwardzi, tar ka tsa ndzi gyal wala mbəkəl na kula nangka.

²Mwantə ni akwa nyarmbwar ləkwa tentər tsaptədzi, ka gə pungkər tsiya ga ata kərari ka gə tsi ni. Antə pristayeri ata pshitə shanga tenga bagaɗi ni ka mamshari.

³Ga ata mbamta bwadukwa saɗakar jakə mwardzi ni: Da an shanga mal na hartə dza kari kuta,

⁴ka kulshayeri na suɗa, ka mal na hartə dza ɗa, ka bwa na ɓɗakta shang ar mir.

⁵Antə pristayeri ata mbamta shanga su nayeri ni ata kəma duku kəga saɗaka mbamba ata bagaɗi. Tsa an saɗaka mbamba swakti ka shiwur na msəra natə I ata dluwari ka kucali.

⁶Ma ga ata kəɓəla təma wala kwi akwa ciɓər nga kamnyar hamta saɗakar jakə mwardzi, tar ka tsa ndzi gam, wala nciwa, wala mbəkəl na kula nangka.

⁷Ma ga ata hamta ɓzər təma, kara hamta ni tsu akwa nyarmbwar ləkwa tentər tsaptədzi.

⁸Ga ata pungkər tsiya ga ata kəra thlar saɗaka mbamba ni, antə I ata dlu saɗaka ni apa sur kəcimta ala gə bikər nga Antə pristayeri ata pshitə mamshir mwaɓi ni ata shanga tenga bagaɗi ni.

⁹Ga ata hamta bwadukwa saɗakar jakə mwardzi nayeri ni apa sur hamta ar susəma: Da an mal ar kurari, ka kurari ni zwai, ka shanga mal na hartə dza kari kutari,

¹⁰ka kulshayeri na suɗa, ka mal na hartə ɗa, ka bwa na ɓɗakta shang ar mir.

¹¹Antə prist ata mbamta ɗa shang ata bagaɗi apa susəma mbamba ali.

¹²“Ma saɗaka tə ga ata hamta ali an kwi,

¹³antə tar ka gə mwantə ni akwa nyarmbwar tentər tsaptədzi ka gə pungkər tsiya ga ata kərari ka gə tsi ni akəma tent ni. Antə pristayeri ata pungkər mamshari ata shanga tenga bagaɗi ni.

¹⁴Ga ata mbamta saɗaka ka bwa nayeri ni apa sur hamta ali. Da an shanga mal na hartə kari kuta,

¹⁵ka kulshayeri na suɗa, ka mal na hartə ɗa, ka bwa na ɓɗakta shang ar mir.

¹⁶Antə prist ni ata mbamta ɗa shang ata bagaɗi, antə shiwur na msəra ar susəmər saɗaka ni ata ndzi msəra ali. Shanga mal an arna.

¹⁷Tsawu ngəni ata ndzi aka shanga zamanayeri ar giri. Akwa shanga vəyayeri tə giri ata ndzəndzi akwa, giri aɗi ata səm mal wala mamshi wa.”