Read bura-pabir Pristayeri 8 Bible Online

Pristayeri 8 - bura-pabir bible

Pristayeri 8

¹MTHLAKU ku pəla aka Musa,

²“Səntə Haruna ka maɗashilərni kəga ləptər pristkur, ka mal pungkər tsi, ka gyal ar saɗakar kiɗə tifəmta biku, ka gamayeri suɗa, ka buradi na kula yist akwa thlambəl.

³Ka gə tsaptə shanga mji akwa nyarfur tentər tsaptədzi.”

⁴Musa ku hara tsu apatə MTHLAKU ku tsawa alari. Antə sakatə mji ku tsaptədzi akwa nyarfur tentər tsaptədzi,

⁵Musa ku pəla ala ɗa abbər, “Ngəni an su tə MTHLAKU ku tsawa ka mdə hara.”

⁶Antə Musa kəgaɓəla Haruna kəga maɗa'ni tə da si akəma, antə tsa kəcimta ɗa.

⁷Tsa hadza aka Haruna ləptər pristkur, ka mbwi kusara Haruna ka sur mbwadzi, ka hata alari efod, ka mbwahə efod ni ka səwur mbwari.

⁸Aghəla nda antə Musa ku mbwahə kərathla Haruna ka yadər kərathlu, ka putə pelar ndzəlsu suɗa ata.

⁹Tsa hangkər alari dzakwar olkur ar pristkur ka vətə sur dəɓa ar dinar ata bwakəma dzakwa ni kamnyar ncanta abbər mdə ku hamta Haruna aka Hyel apatə MTHLAKU ku tsawa alari.

¹⁰Antə Musa ku hamta tentər tsaptədzi, ka shanga kariyayeri na akwa kutari aka Hyel atar pshitə ɗa ka mal pungkər.

¹¹Tsa kətsə mal ni ka pshingkər aka bagaɗi saɗaka ka murfa, ka pshitə shanga sur kəthlər na akwa, ka tasa na ola, ka sur vətari.

¹²Antə tsa pungkər bwadukwa mal pungkər tsi ni ata kəra Haruna ka namtə ni kalkal kamnyar hara kəthlər aka MTHLAKU.

¹³Aghəla nda antə Musa ku səntə maɗashilər Haruna, ka hata ala ɗa ləptu, ka mbwi kusara ɗa ka sur mbwadzi. Tsuwa tsa ku tsangkər ala ɗa dzakwayeri ni tsu apatə MTHLAKU ku tsawa alari.

¹⁴Musa ku səntə gyal ar saɗakar kiɗə tifəmta biku. Antə Haruna kəga maɗashilərni ku pungkər tsiya ɗa ata kəra gyal ni

¹⁵sakatə Musa akwa tsi gyal ni. Musa ku nciu kuleng tsiyari akwa mamshir gyal ni, ka fadza aka təmbəlayeri ar bagaɗi saɗaka na nfwar ni ka hamta ni aka Hyel. Tsa puɓəla mbila mamshi ni ata nggilanga bagaɗi ni. An laku natə Musa ku kəcimta bagaɗi ni ka hamta ni aka MTHLAKU.

¹⁶Musa fwaɓəla shanga malkum na ata kari kuta, ka bwa na ɓɗakta shang ar mir, ka kulshayeri na suɗa ka malkum na ata da, ka mbamta ɗa ata bagaɗi saɗaka.

¹⁷Tsa fatə mambila kum ni, kəga kəsəmari, ka hyalari, kara mbamtari aɓəla ata hildi, tsu apatə MTHLAKU ku tsawa alari.

¹⁸Aghəla nda Musa ku səntə gamər saɗaka mbamba, antə Haruna ka maɗashilərni ku pungkər tsiya ɗa ata kəra gam ni.

¹⁹Musa ku tsi gam ni ka pshitə shanga tenga bagaɗi saɗaka ni ka mamshari.

²⁰Sakatə Musa ku thləthlau kumər gam ni dakul dakul, ka mbamta kərari ni, bwadukwa dakulayeri ni, ka paktə kəga malari ata bagaɗi saɗaka.

²¹Sakatə Musa ku kəcimta kari kuta, ka nggilangayeri, antə tsa mbamta gam ni ata bagaɗi saɗaka mbamba apa saɗakar susəma na ata hamta shiwura na msəra aka MTHLAKU. Mdə ku hara su nayeri ni tsu apatə MTHLAKU ku tsawa alari.

²²Aghəla ngəni antə Musa ku səntə gam na dukwari kamnyar hamta pristayeri aka Hyel. Antə Haruna kəga maɗashilərni ku pungkər tsiya ɗa ata kəra gam ni

²³sakatə Musa akwa tsi gam ni. Musa kətsə mamshari ka fadza aka mnya thləma Haruna na abwa mazəm, ka aka mpəl ola ar tsiyari na abwa mazəm, ka ata mpəl ola ar səlari na abwa mazəm.

²⁴Aghəla ngəni antə Musa ku shahə maɗashilər Haruna, ka kətsə mamshi ni ka fadza aka mnya thləma ɗa na abwa mazəm, ka aka mpəl ola ar tsiya ɗa na abwa mazəm, ka ata mpəl ola ar səla ɗa na abwa mazəm. Aghəla nda antə Musa kətə mamshi na ku mbili ka pshitə shanga tenga bagaɗi ni kəgari.

²⁵Musa Ku kətə malkum, ka malkum na ata kur, ka shanga mal na ata kari kuta, ka bwa na ɓɗakta shang ar mir, ka kulshayeri na suɗa ka malkum na ata da, ka kiɗə na təbwa mazəm.

²⁶Tsa kəɓəla kər buradi pal akwa kuta thlambələr buradi na kula yist natə mdə ku hamta aka MTHLAKU, ka kətə kər buradi pal na ka mal zaitun, ka kwasi kər pal, ka pungkər ɗa ata kəra malkum ka kiɗə na təbwa mazəm ni.

²⁷Musa ku hamta susəma nayeri ni akwa tsiya Haruna kəga maɗashilərni. Tsa hamta ɗa atar kədaɓta ɗa apa cauta na ola aka MTHLAKU.

²⁸Aghəla nda antə Musa ku jaktə dlu susəma na akwa tsiya ɗa ni, ka mbamta ata bagaɗi saɗaka mbamba, ata kəra saɗaka mbamba, apa saɗakar hamta ɗa aka Hyel. Ngəni an saɗakar susəma na ka shiwura msəra aka MTHLAKU.

²⁹Musa ku kətə kərathla gam ni ka kədaɓta apa susəmər cauta na ola tə mdə hamta aka MTHLAKU. Ngəni an nəɓwar Musa akwa gamər hamta mji aka MTHLAKU ni. Musa ku nu shanga su apatə MTHLAKU ku tsawa alari.

³⁰Antə Musa ku kətə mbila mal pungkər tsi ka mamshi na ata kəra bagaɗi saɗaka ni, ka pungkər aka Haruna ka maɗashilərni, ka pshitə ləptayeri arɗa. Apani antə tsa ku hamta Haruna kəga maɗa'ni, kəga ləptayeri arɗa aka MTHLAKU.

³¹Musa pəla aka Haruna ka maɗa'ni abbər, “Mwar giri, ka kum ni anyarmbwar tentər tsaptədzi. Ka giri ɓwatə kum ni anda ka mbumnya ka buradi na akwa thlambələr saɗakar hamta giri aka Hyel, tsu apatə MTHLAKU ku tsawa.

³²Ka giri mbamta shanga kum ka buradi na ku mbiləmta.

³³Giri aɗiya zhar nyarmbwar tentər tsaptədzi ni wa, tar aghəla sakatə vir murfa na ar hamta giri aka Hyel ni kuri.

³⁴MTHLAKU ku tsawa ala yeru ka yeru hara su tə yeru ku hara ashina ni, kamnyar ka mdə kəcimta ala giri bikər giri.

³⁵Tar ka giri ndzi tsu akwa nyarmbwar tentər tsaptədzi ni pci ka viri mnyar vir murfa kamnyar hara su tə MTHLAKU ku tsawa. Ma giri aɗi hara wa, giri ata mta. Kamnyar ngəni an tsawu natə I ku dluwa akəla MTHLAKU.”

³⁶Antə Haruna kəga maɗashilərni ku hara shanga suayeri natə MTHLAKU tsawa atar Musa.