Read bura-pabir Pristayeri 9 Bible Online

Pristayeri 9 - bura-pabir bible

Pristayeri 9

¹Akwa vir na nciskur antə Musa ku kəga Haruna, ka maɗashilərni, ka mji ol'ola ar Israila.

²Tsa pəla aka Haruna, “Səntə ɓzər gyal na kula nangka kamnyar hara saɗakar kiɗə tifəmta biku, ka gam na kula nangka kamnyar saɗaka mbamba, kara hamta ɗa aka MTHLAKU.

³Ka gə pəla aka mjir Israila, ka da kətə nciwa kamnyar saɗakar kiɗə tifəmta biku, ka kəna na ka məvari pal, ka ɓzər təma na ka məvari pal na kula nangka, kamnyar saɗaka mbamba.

⁴Tsuwa ka gə pəla ala ɗa ka da səntə gyal ka gam kamnyar saɗakar jakə mwardzi, ka da hamta ata kəma duku ka saɗakar mpur mthli natə mdə hərtə ka mal aka MTHLAKU. Ka da hara apani kamnyar ashina MTHLAKU ata ncantə kərni ala giri.”

⁵Antə da ku səntə suayeri natə Musa ku tsawa ala ɗa anyarmbwar tentər tsaptədzi, tə shanga mji ku shahədzi kudzəha kamnyar vəngkər səli aka MTHLAKU.

⁶Musa pəla, “MTHLAKU ku tsawa ala giri ka giri hara su ngəni, antə səliyirni ata si adzə giri.”

⁷Antə tsa pəla aka Haruna, “Shahədzi kudzəhə ka bagaɗi ni, ka gə hamta saɗakar nga kamnyar kiɗə tifəmtar biku, ka saɗaka mbamba ar nga kamnyar ka Hyel kəcimta ala gə bikər nga ka bikər mji. Ka gə hamta saɗaka ngəni kamnyar kəcə bikər mji tsu apatə MTHLAKU ku tsawa.”

⁸Antə Haruna ku shahədzi adzə bagaɗi ka tsi thla ni kamnyar kiɗə tifəmta biku aka kərari.

⁹Maɗa'ni ku sənta alari mamshari. Antə tsa nciu kulengari akwa mamshi ni, ka fadza aka təmbəlayeri ar bagaɗi saɗaka. Antə tsa kətə mamshi na ku mbiləmta ka pungkər ata nggilanga bagaɗi.

¹⁰Antə Haruna mbamta malkum, ka kulshayeri, ka bwa na ɓɗakta shang ar mir ata bagaɗi saɗaka ni tsu apatə MTHLAKU ku tsawa aka Musa.

¹¹Amma kum ni ka kəsəmari ni tsa ra mbamta ɗa aɓəla ata hildi.

¹²Aghəla ngəni antə Haruna tsi mwaɓiyir saɗaka mbamba tə maɗashilərni ku kətə mamshari ka hamta alari. Antə tsa pshitə shanga tenga bagaɗi saɗaka ni.

¹³Da hamta alari kər ka bwayeri damwa na raka raka tə mdə thləthlauwa antə tsa mbamta ɗa ata bagaɗi ni.

¹⁴Tsa kəcimta kari kuta ka nggilangayeri ka mbamta ɗa ata bagaɗi saɗaka apa saɗaka mbamba.

¹⁵Aghəla nda, antə Haruna ku hamta saɗaka ka nciwa kamnyar tifəmta bikər mji. Tsa kətə nciwu ni, ka tsi, ka hamta, apatə tsa ku hara ka saɗakar kiɗə tifəmta bikərni nda.

¹⁶Tsa ku səntə mwaɓiyayeri ni ka hamta ɗa saɗaka mbamba tsu akwa laku tə mdə ku thlamta.

¹⁷Ata kəra saɗaka mbamba tə mda ana hara ɗəɗəp ɗəɗəpa ni, tsa ata səntə saɗakar mthli ka kətsə mpu ni kuta tsiyari pal, ka mbamta ata bagaɗi saɗaka.

¹⁸Tsa tsi gyal ni ka gam ni kamnyar saɗakar jakə mwardzi ar mji. Antə maɗa'ni ku səntə ka ha alari mamshi ni, tə tsa pshita ata shanga tenga bagaɗi ni.

¹⁹Haruna ku kətə malkum ar gyal ni ka ar gam ni, ka na ata kur ni, ka na hartə kari kuta, kəga kulshayeri, ka bwa na ɓɗakta shang ar mir,

²⁰ka pungkər ata kəra kərathla mwaɓiyayeri ni, ka mbamta ata bagaɗi saɗaka.

²¹Antə Haruna ku haptə ka hamta kərathla mwaɓiyayeri ka kiɗayeri na abwa mazəm apa sur cauta na ɓɗakkarkara aka MTHLAKU apatə Musa ku tsawa.

²²Sakatə Haruna ku kuri hamta saɗakar tifəmta biku, ka saɗaka mbamba, ka saɗakar jakə mwardzi ni, antə tsa ku haptə tsiyari təbwar mji ka kiɗə ka Hyel vədzə barka ala ɗa. Antə tsa ku səghəi kazhar vəi ni.

²³Antə Musa ka Haruna ku ləmbwa akwa tentər tsaptədzi. Antə sakatə da səɓəla akwa mbwa ni, da vədzə barka aka mji ni. Antə səliyir MTHLAKU ku si adzə shanga mji.

²⁴Antə təkəma MTHLAKU ku thlentə u'u na ku mbamta saɗaka mbamba ni ka malkum na ata bagaɗi ni. Sakatə mji ku wutə su ngəni, antə da haptə kuraku ka zuzuri ka vəngkər səli aka MTHLAKU.