Read bura-pabir Irmiya 1 Bible Online

Irmiya 1 - bura-pabir bible

Irmiya 1

¹Naɓi laga aɗi ka thləmari Irmiya, tsa an ɓzər mdə laga tə mda ana kəga thləmari Hilkiya. Hilkiya an pal akwa nca pristayeri na ahar Anathloth, di laga akwa tsəɗi Benjamin. Nayeri ni an su tə Irmiya pəla.

²Ntangkəmari MTHLAKU ku gari aka Irmiya akwa sakatə Yosiya na ɓzər Ammon ku hara məva kumnya makər akwa kuthlikur ata kəra Yahuda.

³MTHLAKU ku jaktə gari aka Irmiya akwa sakatə Yehoyakim na ɓzər Yosiya ku ndzi kuthlir Yahuda, har ka mwanta akwa tsikəra məva na kumkantangkur ar Kuthli Zedekiya akwa Yahuda. Akwa thliya na ntəfkur ar məva ngəni antə mdə ku ngkəgəi mjir Urushalima ka mwantə ɗa akwa mafakur.

⁴MTHLAKU pəla ali abbər,

⁵“I asəndə nga karkar akəmata mda akətə hurər nga, akəmata mama' nga ayaɓəla nga I ku carɓəla nga ka gə ndzi naɓi aka shanga mji.”

⁶Antə I pəla, “MTHLAKU na olta shang, I amzhi gari ata vəya gə wa. I tsu ɓzəngkyar kamta!”

⁷Amma MTHLAKU shinau abbər, “Ga aɗiya pəla gə tsu ɓzəngkyar wa. Kəlara mji natə I ata thlentə nga adzə ɗa ka gə mwari, ka gə hara shanga su tə I pəla ala ga.

⁸Ga aɗiya thlivər ɗa wa kamnyar I ata ndzi ata vəi duku ka ga, kəi tsəlpi nga. I, na MTHLAKU an pəla ngəni.”

⁹Antə MTHLAKU ku ndərar tsiyari ka tsəkwar mnyi ka pəla, “Nggədza I ku vu ndərərna akwa mnya ga.

¹⁰Ashina I ku vəngkər nga ata kəra tsəɗiyayeri ka kuthlikurayeri. Ga ata ntsumta ɗa wala ngkamta ɗa ata di, ga ata huzamta ɗa wala titiləmta ɗa. Ga ata namtə ɗa wala kəlantə ɗa apa nfwa.”

¹¹Antə MTHLAKU pəla ali, “Irmiya, man tə ga akwa wula ri?” Antə I shinau alari, “I akwa wul tsiya nfu na ana ya ɗəm tə mda ana kəga ni almon.”

¹²Antə MTHLAKU pəla ali, “Ga ku wutə kalkal, kamnyar I akwa wul kəra ndərərna kəi wuta abbər I ku nghyaɓəla su tə I pəla.”

¹³Antə MTHLAKU ku jaktə gari ka pəla abbər, “Kulini man tə gə wutə ri?” Antə I pəla, “I wutə tughum laga ka yimi akwa mbwa təbwar yala, antə yimi ni akwa bara shirəmtadzi.”

¹⁴Antə tsa pəla ali, “I ata vu ka asar na mwavər səɓəla akwa bwar yala ka pungkərdzi aka shanga mjir tsəɗi ni,

¹⁵kamnyar I ata kəga sojayeri ar tsəɗiyayeri na akwa bwar yala ka da si akwa Urushalima. Antə kuthlyayeri arɗa ata sə nci dəkəlayeri arɗa akwa nyarfayeri ar Urushalima. Da ata pwa ata kəra katanggarni ka dlər bwadukwa diyayeri na akwa Yahuda.

¹⁶I ata ɗi mjirna kamnyar ɗimikur tə da hara atar nggəlar ra, ka hamta saɗaka ka vəngkər səli aka haptayeri.”

¹⁷“Irmiya, thlatə kara ɗəmhədzi ka gə ra pəla ala ɗa su tə I ata pəla ala ga. Ga aɗiya thlivər ɗa wa, ta I asə thlivərantə nga akəma ɗa.

¹⁸Kamnyar ashina I ku namtə nga ka gə ndzi ɓəɓal apa di na ka duna, apa zhimbwalər liya mənggəl, ka katangga ar əmza. Kuthli, wala kwakuna, wala prist, wala mdər Yahuda aɗi na ata mula ala gə wa.

¹⁹Da ata mpa ka ga, amma da aɗi ata nggyari ngə wa, kamnyar I ata ndzi adzə nga, ka ɓəlatə nga. I na MTHLAKU an pəla.”