Read bura-pabir Irmiya 10 Bible Online

Irmiya 10 - bura-pabir bible

Irmiya 10

¹Mjir Israila, psi giri thləma giri aka su tə MTHLAKU akwa pəlari.

²MTHLAKU akwa pəla, “Giri aɗiya nu surharar durayeri damwa wa, wala yakata kamnyar halama suayeri tə giri wuta ata kutahyel wa, wala tə mjir tsəɗi damwa ana thlivəra ka yakata,

³Kamnyar ampaniyir nu haptər ɗa aɗi wa, kamnyar da ana nthləi nfwa akwa mtakəu, ka marəmta ka kəmər mara,

⁴Tsa ana dəɓatə ni ka adzərfa ka dinar, ka tsahə ni ka kusa ka gudəma ta tsa asə kənggəra ka təri.

⁵Haptayeri ngəni ndzi apa sur thlivərantə mwaɓi mtakəu akwa fakər hwamdla daci, da amzhi gari wa, tsuwa da amzhi mwa wa, tar ka mda an kətə ɗa. Giri aɗiya thlivər ɗa wa, kamnyar su aɗi tə da amzhi hara ala giri wa: da amzhi dəkəi giri wa, tsuwa da amzhi dlar giri wa.”

⁶MTHLAKU, aɗi apa gə wa, gə ka duna na ola. Thləma gə ku tuwa ka duna kamnyar olkur nga.

⁷Wan athlivər ngə wa ri, gə na kuthlir shanga tsəɗiyayeri? Kamnyar ga ku mzhi ka mdə na gə olkur. Kamnyar akwa shanga nca mji na ɗəɗu akwa duniya, ka akwa nca shanga kuthlyayeri, mda aɗi na ɗəɗu apa gə wa.

⁸Shanga mjir nu haptu kəgaɓu apa təma. Su aɗi tə mda ata thliptari akəla haptayeri wa, kamnyar da udzəm daci.

⁹Da ana fəi dza haptayeri arɗa ka adzərfa na thlata ahar Tarshish, ka dinar na thlata ahar Ufaz, Da an udzəm tə mdə marəmta ɓɗaku, ka liya dinar tə mdə ɓdləta. Mda an hadza ala ɗa ləptə lipəla ka yar ndləngi, shanga ɗa mda an nam ɗa ka tsi.

¹⁰Amma MTHLAKU, ga an Hyel na jiri, ga an Hyel na ka mpika, ga an kuthli na ba saka madi. Ma sakatə ɗəffa ga ku ɓzi, antə duniya ana kənggərantədzi, tsuwa tsəɗiyayeri aɗi ana nggitə ɗəffu bwarbwarkur ar ngə wa.

¹¹Ka giri pəla ala ɗa abbər aɗi haptayeri an nam duniya ka vəi na amtazi wa, antə mda ata shamta ɗa karkar kazhar kəra duniya.

¹²MTHLAKU an namtə duniya ka dunari. Atar ɗəɗukurərni antə tsa ku nci duniya, ka pəbəlar vəyayeri na amtazi atar səndərni.

¹³Ma tsa ku ndəri yimayeri na amtazi ana putə kuraku, tsa ana səntə dlambayeri na akwa datər duniya. Tsa ana hara ka wurkə mbəla akwa yimərhyel, ka kəgaɓəla shambar yimi akwa mbwar pwi ɗa.

¹⁴Amma wala apani mdə ku ndzi kəgaɓu kula səndər su, shanga ɗeagha ɓdlə haptu dinar ku ləkwa səli, kamnyar dludzər su antə da namta, aɗi Hyel wa, da aɗi ka mpikə wa.

¹⁵Ampaniyir haptu aɗi wa, da sur pwaktə mdə daci, saka ata sə hara tə MTHLAKU ata shamta ɗa.

¹⁶Hyelər Yakub zum ka haptu nayeri ni, kamnyar tsa an namtə shanga su, ka carɓəla mjir Israila ka da ndzi mjirni. MTHLAKU na ka Duna an thləmari.

¹⁷MTHLAKU akwa pəla, “Mjir Urushalima, tsaptə giri kari giri, ka giri hwi, kamnyar sojayeri ku kalaktə giri.

¹⁸Kamnyar I ata kədləɓəla giri akwa tsəɗi ngəni, kəi na giri bwani. Apani antə giri ata nggahari.”

¹⁹Antə mjir Urushalima tuwa ka pəla, “Sha ku wutə yeru kamnyar yeru ku dəkəidzi! Mbəlka yeru ni mwavər, aɗi ata kur wa! Amma wala apani yeru wuta abbər ku ndzi dwali ka yeru nggita.

²⁰Tentayeri ar yeru ku huzamtadzi, səwur mbwa ɗa ku nthlənthləmtadzi. Mdə ku famnya maɗa' yeru kazhar yeru, mdər jaktə lata ala yeru tent wala lata ala yeru səva aɗi wa.”

²¹Antə I shinau abbər, “Mjir pwar mjir yeru ni kəgaɓu, da aɗi ana tsəkwitə MTHLAKU ata kəra su wa. An su na hara tə da aɗi səm wa ni, ka su na hara tə mjir yeru ku titiləmtadzi ni.

²²Ngga giri su tə mji akwa ngkərari! Kurakər mpa ku thlata akwa tsəɗi na bwar yala akwa si. Sojayeri ar tsəɗi ni ata sə shamta Yahuda ka namtə ni fya, ka vəi ndzəndziyir kilamtaku.”

²³MTHLAKU, I asənda abbər “Mda aɗi na mthlakər mpikari surni wa, mda aɗi na ka dunar hara su apatə tsa akwa barari wa.

²⁴Namta ala yeru vəi shar yeru MTHLAKU, amma ga aɗiya hara ka ɗəffə bwarbwar wa, ta yeru asə mta.

²⁵Pumta ɗəffa ga ata kəra mji na aɗi səndə ngə wa, ata kəra mji na ana vəngkər səli ala gə wa, kamnyar da ku kurəmta mjir nga, Israila. Da ku kurəmta mjir yeru, ka namtə tsəɗiyir yeru ka fya.”