Read bura-pabir Irmiya 11 Bible Online

Irmiya 11 - bura-pabir bible

Irmiya 11

¹MTHLAKU ku jaktə gari aka Irmiya abbər,

²“Ka gə ɗangta aka mjir Yahuda ka mji na akwa Urushalima ata kəra su tə da ndəli akwa alkawal ni.

³I na MTHLAKU na Hyelər Israila ku pəla I ata shuwumta kəlara mdə na ku gyal ka su tə mdə mbwi akwa alkawal ni.

⁴Tsa an alkawal natə I mbwi kəga kəkayeri arɗa sakatə I fwaɓəla ɗa akwa Masar, tsəɗi na mwavər apa vir u'u tə mda ana juwa liya akwa. I pəla ma da ku ɓəla su tə I tsawa ala ɗa, da ata ndzi mjirna antə I ata ndzi Hyelər ɗa.

⁵Antə apani I ata nghyaɓəla alkawal natə I hara aka kəkayeri arɗa abbər I ata hamta ala ɗa tsəɗi na ɓɗaku, na ata ya su, tsəɗi tə giri akwa ashina.” Antə I pəla, “Ngəni jiri, MTHLAKU”

⁶Antə MTHLAKU pəla ali, “Mwari akwa bərniyayeri ar Yahuda ka akwa lakwayeri ar Urushalima. Ka gə psəmnya ala ɗa abbər ka da vədzə hangkal aka su tə alkawal pəla ka da ɓəlata.

⁷I ku tsaktə kəkayeri ar giri ka duna sakatə I fwaɓəla ɗa akwa tsəɗi Masar abbər ka da kələngkər ali. I ku ləkəma ka tsaktə ɗa har ba ata vir na ashina.

⁸Wala apani da aɗi psi thləma ɗa wala kələngkər ali wa. Təng waskəi akwa hara kər ɓəɓalkur ka ɗimikur apatə ɗəffari hira. I ku tsawa ala ɗa ka da kəsi alkawal ni, amma da aɗi hir wa. Apani antə I ku ɗi ɗa ka suayeri natə I pəla ala ɗa təng ɗəm.”

⁹Aghəla nda antə MTHLAKU pəla ali, “Mjir Yahuda ka Urushalima ku ɗəmhə ɗimikur ata kəri.

¹⁰Da ku jaktə ngka akwa ləkəma ka hara jili bikayeri tə kəkayeri arɗa ku hara. Da nggəlar ndərərna ka ləkwa vəngkər səli aka haptayeri. Kutakəyir Israila ka Yahuda ku ɓəli alkawal tə I hara ka kəkayeri arɗa.

¹¹Apani, I na MTHLAKU, akwa tsaktə ɗa abbər I ata sənta asar ata kəra ɗa, antə da aɗi ata mzhi hwiyimtari wa. Tsuwa wala da an tuwa ali, I aɗi ata ngga ɗa wa.

¹²Antə mjir Yahuda ka Urushalima ata sə mwantə tuwar ɗa aka haptayeri arɗa, ka mba ala ɗa tulari ɗuza. Amma da aɗi ata mzhi mbantə ɗa akwa asar ndagə wa.

¹³Kamnyar mjir Yahuda ka haptayeri hang apa hangkur bərniyayeri tə da kəgari. Hangkur bagaɗiyayeri ar hamta saɗaka tə mji ana mba sur shiwura aka haptu Baal na sur cika ata, ku mzhitə hangkur lakwayeri na akwa Urushalima.

¹⁴Antə Irmiya, ga aɗiya hara adduwa kamnyar mji ngəni wa, wala kiɗə ra ata vəya ɗa wa. Kamnyar wala da an tuwa dlara akəli sakatə da akwa ɗar bwani, I aɗi ata ngga ɗa wa.”

¹⁵MTHLAKU akwa pəla, “Apa madi tə mjirna natə I hirhira ata mzhi ləkwa mbwar vəngkər səli ali, aghəla tə da ku hara ɗimikur ri? Da tamata abbər alkawal tə da ana kətə ka saɗakayeri ata mzhi ngkamta asar ya? Da ana wuta apa su ngəni ata vu ɗa ka da hara kucali ya?

¹⁶Sakanda I ana kəga ɗa abbər nfur zaitun na ka thlali, ka yarni ni ɓɗakɓɗaku. Amma kulini I ata hangkər ala ɗa u'u, kəi mbagamta tsiya ɗa kəga thlaliyir ɗa. Antə da ata ndəkəla ka kuraku apa dlərərhyel.”

¹⁷“I na MTHLAKU, na ka Duna ta Shang, an nthlə Israila ka Yahuda, amma kulini I ata shamta ɗa. I ata shamta ɗa kamnyar tə da ku hara ɗimikur atar mba sur shiwura aka Baal, ka mbwantə ɗəffi.”

¹⁸MTHLAKU ku pəla ali ɗimikur tə dawayeri arna akwa ɗəmhari ata kəri.

¹⁹I ku ndzi apa təma tə mda akwa ndəkər ni kamnyar thla wulyari. I aɗi sənda abbər da akwa ɗəmhə ɗimikur ata kəri wa. Da pəla, “Ndzi ka mburu tsi ni ka mdə fwari ata kərari turəku.”

²⁰Antə I hara adduwa abbər, “Ya MTHLAKU, Hyel na ka Duna ta Shang, gə ka jirkur. Gə na ana ngkərtə ɗəffa mda ka dzamər mda, I ku hamta kərna akwa tsiya ga. Ntəmta ali ɗimikur tə mji ngəni hara ali ni.”

²¹Mjir Anathloth akwa bara tsi ra. Da pəla da ata tsi ra ma I aɗi zhar ngkər labarər ngə wa.

²²Kamnyar ngəni MTHLAKU akwa pəla, “I ata ɗi ɗa! Maɗadakwi arɗa ata kurəmtadzi akwa mpa, maɗangkyar shili kəga maɗangkwi ata kurəmtadzi ka mi.

²³Ma sakatə I ɗəmha abbər I ata ɗi ɗa ni ku hara, mdər Anathloth aɗi wala duku na ata mbil ka mpikə wa.”