Read bura-pabir Irmiya 12 Bible Online

Irmiya 12 - bura-pabir bible

Irmiya 12

¹Ga ana pəla ali jirkur MTHLAKU, kəlara sakatə I ku si ka damitədzərna akəma ga. Wala apani I ata bara nggaɓəla jirkur ata kəra su nayeri ni. Kamnyar mə tə mji na ɗimi ana wutə ləkəma ri? Kamnyar mə tə mji na kula jiri ana nggatə msəra ri?

²Ga andər ncimta ɗa ka da kukwa səl, ka da kəla ka ya munya. Da ana gari na msəra ata kəra ga, amma aɗi an su na akwa ɗəffa ɗa wa.

³Amma, MTHLAKU, ga asəndə ra, ga ana wutə su tə I ana hara, ka apatə I hir nga. Ndəkərɓəla mji nayeri ni apa təmayeri tə mda ata ra thla wulya ɗa, ka gə pwi ɗa shiɗa tar vir tə mda ata thla wulya ɗa.

⁴MTHLAKU, kusar akwa ula akwa mtakəu, antə nawa tə ga ata thləthlatə ka ultə ngəni ri? Mwaɓi kəga ɗika akwa kurəmtadzi kamnyar ɗimikur ar mjir yeru. Da akwa pəla, “Tsa aɗi ata wutə datər yeru wa.”

⁵MTHLAKU akwa pəla, “Irmiya, ma ga amzhi pu hwi ka mji wa, apa madi tə ga ata mzhi pu hwi ka takwayeri ri? Ma ata bəbal ga akwa hwi ka ndla, ka ma akwa dlədləkur Jodan ga ata hara karari?

⁶Wala maɗa'ma nga kəga yangkura ga akwa fa səla ga, da akwa ngkər ndər ɗimi ata kəra ga. Wala tə mnya ɗa msəra ni, ga aɗiya mbərsa ka da wa.”

⁷MTHLAKU akwa pəla, “I ku nggəlar mjirna Israila, mjirna na carcarari. I ku hamta mji tə I hirhira akwa tsiya dawayeri arɗa.

⁸Mjirna tə I carɓəla ku shinadzə bwahila ɗa ali, ka harangkər ali kurakər mpa apa da tsəngi kuɓər nfwa, antə apani I ku nggəlar ɗa.

⁹Mjirna ku ngka apa mbwambwar kum tə mwaɓəlu ɓɗə ka zhari, tə ɗikayeri na ana səm kum ku tsaɓəngkərdzi ka kalaktə ya? Mwari kara tsaptə shanga mwaɓi mtakəu, ka gə səntə ɗa ka da səma apatə da akwa barari.

¹⁰Mjir ɓəla hang ku si ka mwaɓiyir ɗa ka hilantə fakər anapərna, da ku ntsəntsartə fakə ni ka hilantə ni, ka namtə ni apa mtakə na kula ampani.

¹¹Da ku namtə bərni ni apa mtakəu, kula mda akwa, antə tsa akwa tuwa ali. Shanga tsəɗi ni ku ndzi kula mda, amma mda aɗi na damitədzi wa.

¹²Sojayeri ku thlata akwa kər garayeri na akwa mtakəu ka si kamnyar ka da famnya sur tsəɗi ni. I ku thlentə mji ka mji ɓdləmta tsəɗi ni karkar, antə mda aɗi na ata msər wa.

¹³Mjirna ku thləka alkama, amma kusar antə da thli, da ku ghəri akwa kəthlər, amma su aɗi tə da wutə wa. Rakakur sur fakə ni ata vu ɗa akwa səli, kamnyar ɗəffi ku ɓzi ata kəra ɗa ka duna.”

¹⁴MTHLAKU akwa pəla, “I ku hamta tsəɗi ngəni aka mjirna Israila. Amma ntəwulayeri arɗa na kəmanggar ku si ka mbultsa akəla ɗa. Apani I ata fwaɓəla ɗa kazhar tsəɗiyir ɗa tsu apatə I ku fwaɓəla mjir Yahuda kazhar tsəɗiyir ɗa.

¹⁵Amma aghəla nda I ata kətadzə kəlara dur, kəi ngka ka da akwa tsəɗiyir ɗa.

¹⁶Waci da ku thlipa aka mjirna ka da vəngkər səli aka Baal. Amma ma da ata kələngkər abbər I an Hyel duku na ka mpika, ka nu addinər mjirna, to da ata ndzi mjirna.

¹⁷Amma kəlara tsəɗi na aɗi psi thləm ali wa, I ata kədləɓəla ɗa kazhar tsəɗiyir ɗa kəi kurəmta ɗa karkar. I na MTHLAKU an pəla.”