Read bura-pabir Irmiya 13 Bible Online

Irmiya 13 - bura-pabir bible

Irmiya 13

¹MTHLAKU ku pəla ali abbər, “Mwari ka ra mastə byangtangər lilin ka ra mbwi kusara ga kəgari. Amma ga aɗiya nciu akwa yimi wa.”

²Apani antə I ku mastə byangtang ni ka mbwi kusari kəgari apatə MTHLAKU ku pəla.

³Antə mthlaku ku gari ali ka damwa abbər,

⁴“Kətə byangtangər ngə ni kara mwari akwa Thlyagha Yufiretis ka gə ɗuwar ni akwa daɓwa gagəma na ntaudzi.”

⁵Antə I mwari ka ɗuwari adzə Thlyagha Yufiretis apatə MTHLAKU ku pəla.

⁶Aghəla virayeri laga antə MTHLAKU pəla ali, “Mwari akwa Thlyagha Yufiretis ka gə kəɓəla byangtang ni.”

⁷Antə I mwari ka wutə byangtang ni tsu akwa vəi tə I ɗuwari akwa, amma tsa ku hiɗa, akəthlər kəra wa.

⁸Antə MTHLAKU ku jaktə gari ali,

⁹ka pəla, “Ngəni an laku tə I ata shamta afər gayar Yahuda ka Urushalima.

¹⁰Mji ngəni ɗimi ni ku nggəlar kələngkər ali. Da ku hara ɗimikur tə ɗəffa ɗa hira, ka nu haptayeri akwa vəngkər səli ala ɗa. Apani da ata sə ndzi tsu apa byangtang ngəni, kula ampani.

¹¹Kamnyar apatə byangtang ana kəsi kusara mdə ɓəɓal antə I bara ka mjir Israila ka Yahuda kəsi ra. I hara apani kamnyar ka da ndzi mjirna, afər gayarna, mji na ata hu ra ka haptə səliyirna. Amma da aɗi hir wa.”

¹²Antə MTHLAKU na Hyelər Israila ku gari ali abbər, “Irmiya, pəla aka mjir Israila abbər mda ata nghyantə kəlara tughum yimər anap ka yimər anap.” Antə ka gə pəla ala ɗa su tə MTHLAKU na Hyel ar Israila pəla, abbər, “Kalkal ka mdə nghyantə kəlara tughum ni ka yimər anap.”

¹³Antə ka gə pəla ala ɗa, “I na MTHLAKU ata nghyantə shanga mjir tsəɗi ni ka yimər anap har ka da wika. Watau, I ata vu ka kuthlyayeri na akwa nyarmbwar Dauda, ka pristayeri, ka naɓiyayeri, ka shanga mjir Urushalima wika.

¹⁴Antə I ata paktə kəra mjir ya ka maɗa' ɗa kəi pukthləmta ɗa apatə mda ana pukthləmta tughum. I aɗi ata kətadzə mdə wala duku wa, I ata shamta ɗa shang.”

¹⁵Mjir Israila, MTHLAKU akwa pəla, Psi gir thləma giri, giri aɗiya hara kər olkur wa!

¹⁶Nar giri səli aka MTHLAKU na Hyelər giri, kwabə tsa vu ka sakar kuthlu hara, kwabə giri tsamta səla giri ka ndla, ata kəra garayeri na akwa kuthlu. Kwabə tsa vu ka parakəu tə giri akwa mwaɓari ngka kuthlu na mənggəl ta shang.

¹⁷Amma ma giri ku hara kər olkur ka nggəlar psi thləm ali ɗəffi ata ɓza adzə giri, I ata tuwa ka duna, ka shimwi hwi ata nci, kamnyar dawayeri ata fatə mjir MTHLAKU ka mwanta akwa mafakur.

¹⁸MTHLAKU ku pəla ali, “Pəla aka kuthli ka mama'ni ka da ləghəi ata kulahu na raka, kamnyar dzakwar kuthlikur arɗa na ɓɗakɓɗaku ni ku təri.

¹⁹Dawayeri ku kalaktə bərniyayeri na abwar anəmər Yahuda, antə mdər mzhi ləvəi wala səɓəla aɗi wa. Mdə ku fatə shanga mjir Yahuda ka mwanta akwa mafakur.”

²⁰Urushalima, haptə nca ga kara wul dawayeri ar nga na thlata akwa bwar yala akwa səghəi. Kulini ciɓa tə mdə pu akwa tsiya gə ni ama ri, ciɓər nga na ɓɗaku ni?

²¹Man tə ga ata pəlari ri, ma sakatə mji tə gə tamata abbər da an pazhir nga ku nggyari nga ka ləkwa hara kuthlikur ata kəra ga? Ga ata ɗar bwani apa mwala na akwa kutərya.

²²Ma gə yu kər nga abbər, “Kamnyar mə tə su akwa wutə ra apani ri? Su na hara an abbər bikər nga ku hara hang kamta. An su na hara tə mdə tsari zhaɓər nga ka pi ka gə kula hirər ngə ni.

²³Mdə mənggəl ata mzhi pali kəsəm dzari ya, nənga tənvwa ata mzhi shamta ɗahər dzari ri?” “Ma da ata mzhari, to giri ata mzhi pali surharar giri na ɗimi ni, ka hara su na ɓɗaku.

²⁴MTHLAKU ata titiləmta giri apa ɓaɓiya tə shambar ana fiɓəla ka təra kəgari.

²⁵MTHLAKU akwa pəla an su na ata ndzi watsəɓər giri. An su tə tsa ɗəmha ala giri, kamnyar tə giri ku fwari ata kərari ka mbərsa ka haptayeri.

²⁶MTHLAKU surni ata famta zhaɓər giri ka sur səli ngkəi giri.

²⁷Tsa ku wutə giri akwa hara adiyakur. Tsa ku wutə giri akwa mwari adzə haptayeri akwa garayeri ka bəbalayeri, apa mdə na akwa nggwar lək mwala' mda, apa kədəng na akwa nggyinggya aghəla mwala taku. Sha ku wutə giri, Urushalima! Nawa antə giri ata zhar adiyakur nə ri?”