Read bura-pabir Irmiya 14 Bible Online

Irmiya 14 - bura-pabir bible

Irmiya 14

¹Ngəni an su tə MTHLAKU pəla ali ata kəra ulta na ku təri:

²“Mjir Yahuda akwa tuwa, mjirni na akwa bərniyayeri akwa tuwa. Mjirni ku ndzəndzi ata di akwa tuwa, antə mjir Urushalima akwa tuwa dlara.

³Mjir gəna ku thlentə buɗayeri arɗa ka da ra bara yimi, antə da ku mwari akwa jiɓayeri amma da aɗi wutə yimi wa, antə da ku ngka kula yimi akwa tughumayeri arɗa. Dza ɗa ku mti antə da ku ləkwa səli, ka ɗuwar kəma ɗa.

⁴Di ku uli, kamnyar yimi aɗi tər akwa tsəɗi ni wa. Su ngəni ku nthlə hyala mjir tsuhwa, antə da ku ɗuwar kəma ɗa.

⁵Wala jikəl na ku ya akwa mtakəu ku hwi kazhar ɓzər maɓir arni kamnyar tə kusar aɗi wa.

⁶Kwaramtakayeri akwa ndzəndzi ata kəra garayeri, akwa kəl shiwur vəi tə kusar mirakəu akwa apa kilamtaku, amma da aɗi wutə wa kamnyar kusar mirakəu aɗi wa.”

⁷Mjirna akwa tuwa ali abbər, “Bikər yeru ku ngkəi yeru, yeru ku nggəlar nga ka hang. Yeru ku hara biku ala ga, amma dlar yeru bu, MTHLAKU, tə barkar thləma ga.

⁸Gə duku antə mjir Israila ana vəkər kari, ga andər mbantə yeru akwa sakar bwani. Kamnyar mə tə gə ndzi apa mətəpi akwa tsəɗi nə ri, apa mdər lənggu na ata pi vir duku ka təra?

⁹Kamnyar mə tə gə ndzi apa mdə na ndəndandəndari apa soja na kula dunar mbantə mdə ri? Jiri, MTHLAKU, ga akwa nca yeru, yeru an mjir nga, ga aɗiya zhar yeru wa.”

¹⁰MTHLAKU akwa pəla abbər, “Mji ngəni hir kadlə dzau, səla ɗa ana ndzi ata vəi duku wa. Antə I aɗi nggatə msərakurər ɗa wa. Antə kulini I ata səndə su tə I ata hara ka da, I ata ɗi ɗa kamnyar bikayeri tə da hara.”

¹¹MTHLAKU ku pəla ali, “Irmiya, ga aɗiya kiɗa abbər kəi dlar mji nayeri ni wa.

¹²Wala da an nggəlar ɗəva, I aɗi ata psi thləm ala ɗa wa. Tsuwa wala da an hamta ali saɗaka mbamba ka saɗakar mthli, aɗi ata kəs kəri wa. Ata vəyari, I ata kurəmta ɗa akwa mpa, ka mi, ka shilku.”

¹³Antə I shinau ka pəla, “Ai MTHLAKU, naɓiyayeri arɗa ku kəɗar pəla ala ɗa abbər da aɗi ata kəɓa ka mpa wala mi wa. Da pəla ga ku hara ala ɗa alkawal abbər su aɗi na ata wutə ɗa azi wa.”

¹⁴Amma MTHLAKU shinau ali abbər, “Naɓiyayeri ni akwa thlandər ka thləmi. I aɗi thleng ɗa wa, wala tsawa ala ɗa ndər wa. I aɗi gari ka da wa. Da akwa thlandər abbər da ku wutə su, amma da aɗi ɗar wutə su akəli wa. Suayeri tə da akwa ngkərari ni shang thlandər gapani, da an ɗəmhə sur ɗa ka kəra ɗa daci.

¹⁵I akwa pəla ala gə su tə I ata hara aka naɓiyayeri na akwa thlandər ka thləmi ni. Da ana pəla mpa ka mi ata səkwa tsəɗi ni, amma I aɗi thleng ɗa wa ni. Apani I ata kurəmta naɓiyayeri ngəni akwa mpa, kəi kurəmta mambila ɗa ka mi.

¹⁶Antə kəlara mdə na ku psi thləm ala ɗa mda ata tsi ni tsu apa da. Mda ata pugəmta mshiyir ɗa ata lakwayeri ar Urushalima. Mwankir ɗa kəga maɗa' ɗa shili ka mwanki ata kurəmtadzi ka mi, ka akwa mpa ka ni ka mjir harəmta ɗa. I ata vu ka da ɗar bwani kamnyar kəmanggarkur tə da hara.”

¹⁷MTHLAKU pəla, “Antə kulini, Irmiya, pəla aka mji ngəni laku tə ɗəffa gə ɓzəɓzari akwa kamnyar ɗa.” Antə I pəla ala ɗa, “Nci akwa hwi shimwi pci ka viri, I amzhi zhar tuwa wa kamnyar mdə ku dəkəi mjirna ka duna, mji natə I hir apa ngkwar kuti.

¹⁸Ma I ləɓəla akwa mtakəu, I ata wutə mshiyir mji tə mdə kurəmta akwa mpa. Ma I ləkwa kuta bərni, I ata wutə dlamar mji akwa kurəmtadzi ka mi. Naɓiyayeri ka pristayeri akwa ləkəma ka kəthlərər ɗa, amma da aɗi səndə su tə da akwa harari wa.”

¹⁹Ga ata nggəlar Yahuda jirjiri ya, MTHLAKU? Ga ata nggəlar mjir Sihiyona ya? Kamnyar mə tə gə dəkəi yeru har tə mbəlka yeru aɗi ata kur wa ri? Yeru tamata abbər yeru ata wutə msərakur amma su aɗi tə yeru wutə wa. Yeru tamata abbər yeru ata wutə mbantədzi, amma təng sur nthlə hyel an wutə yeru.

²⁰Yeru asəndə bikayeri tə yeru hara ala ga, MTHLAKU, ka bikayeri tə kəkayeri ar yeru ku hara, kamnyar shanga yeru ku ɓzamtə ɗəffa ga.

²¹Kamnyar olkur səliyir thləma ga, MTHLAKU, ga aɗiya kyar yeru wa, ga aɗiya kəli səliyir Urushalima wa, vəi tə dəkəl kuthlikurər nga na ɓɗakkarkara ata. Ga aɗiya ɓəli alkawal tə gə hara ala yeru ni wa.

²²Haptu aɗi na amzhi səntə yimərhyel wa, tsuwa kutahyel surni amzhi vu ka kwandza hara wa. Gə shinga, MTHLAKU na Hyelər yeru, an ka dunar hara su nayeri ni, yeru ku mbərsa ka ga.