Read bura-pabir Irmiya 15 Bible Online

Irmiya 15 - bura-pabir bible

Irmiya 15

¹Antə MTHLAKU pəla ali, “Wala Musa ka Samiwal an azi akwa kiɗə kəri ata vəya mji ngəni, I aɗi ata kətadzə ɗa wa. Təra ka da kazhar kəmi, I aɗi ata bara wul ɗa ka nci wa.

²Antə ma da ku yu nga abbər ka da ləma ri? Pəla ala ɗa abbər I pəla, “Mji laga mdə ku ɗəmhə ka shilku an kurəmta ɗa an vəi mwarər ɗa! Mji bwaduku mdə ku ɗəmhə ka da mta akwa mpa, an vəi mwarər ɗa! Bwadukwa ɗa mdə ku ɗəmhə ka mi an kurəmta ɗa, an vəi mwarər ɗa! Tsuwa bwadukwa ɗa mda ata mwantə ɗa akwa pərsəna, an vəi mwarər ɗa!”

³I ata thlenta asarayeri zumzum nfwar ata kəra ɗa. Da ata mta akwa mpa, ka kilayeri ndəkər mshiyir ɗa, ka ɗikayeri səməmnya ɗa, ka mwaɓi mtakəu kuri ɓɗəmnya su na mbila.

⁴Kamnyar ɗimikur tə Manasse na ɓzər Hezekiya hara akwa Urushalima sakatə tsa kuthlir Yahuda, antə shanga mjir duniya na ku wuta asarayeri tə I ata hara aka mjir Israila ata sə yakata.

⁵“Mjir Urushalima, Wan ata kətadzə giri, wala damitədzi kamnyar giri ri? Wan ata shamta sakarni kamnyar yu lapiyakur giri ri?

⁶Giri ku nggəlar ra, ka təra kazhar ra. Antə I ata shamta giri, kamnyar I ku ghəri akwa kətadzə giri.

⁷I ata titiləmta giri akwa bərniyayeri, apatə shambar ana fatə buɗər kusar ka titiləmta, I ata ndəkə ka giri mjirna, I ata shamta giri, kamnyar giri aɗi zhar hara ɗimikur wa.

⁸I ata vu ka kughungayeri hara hang akwa tsəɗiyir giri, ta hangkur wuyakər mnya manda. I ata vu ka asar pwa ata kəra mwanki na ka maɗangkyar ata kərathlər pci, ka kurəmta maɗadakwi giri akwa kustakurər ɗa. I ata vu ka asar ka thlivəra pwa ata kəra ɗa kakər.

⁹Mwala na ana gaya kamnyar maɗashilərni murfa, dzari ata mta antə tsa ata thləvamtadzi. Parakəu na təpci ata shin ka kuthlu alari, tsa ata ləkwa sur səli har ka hara nggawa. I ata zhar ka dawayeri ar giri kurəmta mji na ku mbila, I na MTHLAKU, an pəla.”

¹⁰Sha ku wutə ra, mama'na! Kuji mda aɗi yaɓəla ra wa! Tədək saka yeru akwa beɗi ka ɓuji kəga mjir tsəɗi Yahuda. I aɗi təpa akəla mda wala hamta təpa aka mdə laga wa, amma wala apani da akwa nggənggəl ra.

¹¹Antə MTHLAKU, ka ɗimikur tə da kiɗa ali ni wutə ra, ma I aɗi akwa nu nga ka jirkur wa, ma I aɗi kiɗə nga ata vəya dawayeri arna abbər kara mbantə ɗa sakatə da akwa bwani wa!

¹²Mda aɗi na ata mzhi ɓəlwa zwal liya mənggəl wala əmza na thlata abwar yala ya?

¹³MTHLAKU pəla ali, “I ata vu ka dawayeri ar mjirna famnya kariyir ɗa kəga gənar ɗa, kamnyar bikayeri tə da hara akwa tsəɗi ni.

¹⁴I ata vu ɗa ka da hara kəthlər mafakur aka dawayeri akwa tsəɗi tə da aɗi səndə wa. Kamnyar ɗəffi ku thlata apa u'u na ata mba har ba saka madi.”

¹⁵Antə I pəla, “MTHLAKU, ga asəndə shanga su na ku tsəkwar ra. Ɗangtə ra ka ra dlar ra. Ɗi ali kəlara mdə na akwa hara ali bwani. Ga aɗiya kətadzə ɗa wala raka wa kamnyar da ata tsi ra. Ga sənda abbər kamnyar nga antə I akwa sa nggənggəl ni.

¹⁶Kəlara sakatə ga ku gari ali, ndər ni ana ndzi msəra ali apa susəma. I an ar ngə, MTHLAKU na Hyel na ka Duna ta Shang. Antə ndərayeri ar nga ana hara kəi ndzi ka kucali.

¹⁷I aɗi ndzəndzi akwa nca mji kamnyar ɓukci, wala kamnyar kəi nggatə msərakur wa. Kamnyar tə I akira ga, tar kəi ndzi I shira, kamnyar ga ku ɓzamtə ɗəffi ka duna.

¹⁸Kamnyar mə tə I akwa ləkəma akwa ɗar bwani ri? Kamnyar mə tə mbəlkəi nggəlta kur ri? Ga ata pwaktəmta ra apa zərkə tə yimərni ku shiwi ya?”

¹⁹Kamnyar ngəni MTHLAKU akwa pəla ali, “Ma ga ku ngka, I ata dlu nga, antə ga ata ndzi mdər kəthlər ali ka damwa. Ma ga ku zhar mnya gapangapani ka pəla su na ɓɗaku, ga ata ndzi wakilərna. Antə mjir Yahuda ata ngka adzə nga, ga ɗi ata tur mwari adzə ɗa wa.

²⁰I ata namtə nga ɓəɓal apa katangga liya əmza. Da ata dlər nga amma da aɗi ata nggyari ngə wa. Kamnyar I ata ndzi adzə nga, kəi tsəlpi nga.

²¹I ata msərantə nga akwa tsiya mji na ɗimi ka mji na kəmanggar.” I na MTHLAKU an pəla ngəni.