Read bura-pabir Irmiya 16 Bible Online

Irmiya 16 - bura-pabir bible

Irmiya 16

¹MTHLAKU ku jaktə gari ali ka pəla,

²“Ga aɗiya kəl mwala wa, wala ya maɗa' akwa jili vəi ngəni wa.

³Kamnyar nggədza su tə I pəla ata kəra maɗangkyar natə mdə ya ɗa akwa vəi ngəni, ka mjir yar ɗa.

⁴Da ata mta ka shilkayeri na ɗimi ka duna. Mda aɗi na ata tuwa ɗa wa wala harəmta ɗa wa. Mda ata pumta mshiyir ɗa ata vəi duku apa kuɓa ata di. Da ata mta akwa mpa wala ka mi, ka mshiyir ɗa ndzi susəmər ɗika ka mwaɓi mtakəu.”

⁵“Ga aɗiya ləkwa kəi tə tuwa akwa wa. Ga aɗiya tuwa kamnyar wama wa. I aɗi ata jaktə vədzə barka aka mjirna wala jaktə hir ɗa, wala kətadzə ɗa wa.

⁶Mjir gəna ka mjir tura ata mta akwa tsəɗi ngəni, amma mda aɗi na ata harəmta ɗa wala jikatuwa kamnyar ɗa wa. Mda aɗi na ata dəkəi kərni wala shimta kərari abbər tsa akwa tuwa mtər ɗa wa.

⁷Mda aɗi na ata səntə susəma ka da səma ka mdə natə mdərni ku mti abbər asar ku wutə ni wa. Mda aɗi na ata thlentə sur sa kamnyar ncantə kətadza aka mdə natə baba'ni wala mama'ni ku mtə wa.”

⁸“Ga aɗiya ləkwa kəi tə mji akwa səm susəmər kucali wa. Ga aɗiya səm susəm wala sa su kəga da wa.

⁹Psi thləm aka su tə I na MTHLAKU na ka duna, Hyelər Israila ata pəlari. I ata tsi shanga sur kucali, ka shanga gyali ar kəldzayeri. Gə ka kəra ga ata wutə su nayeri ni ka nca ga akwa sakar nga.”

¹⁰“Ma sakatə ga ku pəla ala ɗa shanga suayeri ngəni, da ata yu nga abbər kamnyar mə tə I ata ɗi ɗa ka suayeri na mwavər ka duna apani ri? Da ata pəla man jili ɗimikur tə da harari, tsuwa man su tə da ɓzamta aka MTHLAKU na Hyelər ɗa ri?

¹¹Antə ga ata pəla ala ɗa abbər MTHLAKU pəla, ‘Su na hara an abbər kəkayeri ar giri ku nggəlar ra ka vəngkər səli aka haptayeri. Da ku fwari ata kəri ka nggəlar ɓəla tsawur na.

¹²Amma giri ku hara su na ɗimi ta kəkayeri ar giri. Shanga giri suwasuwari, giri akwa hara ɗimikur apatə ɗəffa giri hira. Giri aɗi akwa kələngkər ali wa.

¹³Apani I ata kədləɓəla giri ka zhar tsəɗi ngəni ka mwantə giri akwa tsəɗi natə wala kəkayeri ar giri aɗi ɗar nggatə su ata kər wa. Antə pci ka viri giri ata vəngkər səli aka haptayeri na anda, I aɗi ata kətadzə giri wala raka wa.’ ”

¹⁴MTHLAKU akwa pəla, “Saka ata sə si tə mji na ata kahyel aɗi ata jaktə kahyel akwa thləmi wa abbər, ‘Apatə Hyel na ka mpika na fwaɓəla mjir Israila akwa tsəɗi Masar aɗi' wa.’

¹⁵Amma da ata sə pəla, ‘Apatə Hyel na ka mpika na fwaɓəla mjir Israila akwa tsəɗiyayeri na abwar yala ka tsəɗiyayeri damwa tə tsa titiləmta ɗa akwa.’ Kamnyar I ata ngka ka da akwa tsəɗiyir ɗa natə I hamta aka kəkayeri arɗa.”

¹⁶MTHLAKU akwa pəla, “I ata thlentə ka mjir ngka kəlfa hang si ka da ngkəgəi mji nayeri ni. Aghəla nda I ata thlentə ka mjir bara sə bara ɗa akwa kəlara gar madi ka vəi na haptəhaptari ka gular gagəmayeri.

¹⁷I ana wutə kəlara su tə da ana hara. Su aɗi na ɗuwarɗuwarari ali wa. Bikayeri arɗa ata bəbal ali.

¹⁸I ata ɗi ɗa kəma suɗa kamnyar shanga ɗimikur tə da hara, kamnyar da ku hilantə tsəɗiyir na ka mshiyir haptayeri. Da ku nghyantə tsəɗi ni ka haptayeri na an sur cika.”

¹⁹MTHLAKU, ga andər ɓəla ra ka mdər dunautə ra. Ga ana dlar ra akwa sakar bwani. Mji ata thlata akwa datər duniya ka pəla, “Su aɗi tə kəkayeri ar yeru wutə wa, tar haptayeri ar thlandəra, natə da an su gapani kula ampani.

²⁰Mda ata mzhi namtə hyel aka kərari ya? Awa, kamnyar su tə mda an namta amzhi ndzi hyel wa.”

²¹Antə apani MTHLAKU pəla, “I ata hara ka mji sənda abbər I an MTHLAKU na ka Duna ta Shang.”