Read bura-pabir Irmiya 17 Bible Online

Irmiya 17 - bura-pabir bible

Irmiya 17

¹MTHLAKU akwa pəla, “Mdə ku rəbutə bikər mjir Yahuda ka sur rəbuta ar liya mənggəl. Mdə ku rəbutə ni ata ɗəffa giri ka sur rəbutə na ɓəɓal ta shang, ka ata təmbəlayeri na akwa kuɗəmar bagaɗiyayeri ar hamta saɗakar giri.

²Mjir giri ana vəngkər səli ata bagaɗiyayeri ar hamta saɗaka. Da ana vəngkər səli aka haptayeri tə mdə ncigəi akira shanga nfwayeri na ka thlali mirakəu, ka ata kəra ɗəɗəgəlayeri kamnyar ɗangtə haptu mwala Ashera.

³Da ana hara ba ata garayeri na akwa mtakəu. I ata hara ka dawayeri ar giri famnya gənar giri, ka shanga bagaɗiyayeri tə giri ana hamta saɗaka ata, kamnyar bikayeri tə giri hara akwa shanga tsəɗiyir giri.

⁴Giri ata ni ka tsəɗi tə I hamta ala giri ni kamnyar biku tə giri hara. Antə I ata vu ka giri hara mafakur aka dawayeri ar giri akwa tsəɗi natə giri aɗi səndə su ata kər wa, kamnyar giri ku mbwantə ɗəffi na ata mba apa u'u ba saka madi.”

⁵MTHLAKU akwa pəla, “I ata shuwumta shanga mji na ata nggəlar ra ka mbərsa ka mdə gapani ka mbərsa ka dunar ɗəva.

⁶Da ndzi apa thlali na akwa hamada, na ana ptsa akwa vəyayeri na ul'ulari, vəi na məmashu apa una tə su amzhi ptsa ata wa, vəi tə mda amzhi ndzi ata wa. Su ɓɗaku aɗi na ana wutə ɗa wa.”

⁷“Amma I ata vədzə barka aka shanga mji na ku hamta jiri ka mbərsa ka iya, na MTHLAKU

⁸Da ndzi apa nfwa tə mdə nci ata mnya yimi, natə nggilangayerari ana hwi ka ləkwa yimi. Da aɗi ana thlivər sakar vəi gərgər wa, kamnyar thlaliyir ɗa ana ndzi tsu mirakəu ciɓakciɓakku. Da aɗi ka damitədzi akwa sakar ultə wa, kamnyar da ana ləkəma ka ya munya.”

⁹“Wan ata mzhi nggaɓəla ɗəffa mdə ri? Su aɗi na kəli ɗəffa mda akwa pwaktə mdə wa. Sur hararni ɗimi ka təra vəyari.

¹⁰I na MTHLAKU ana səndə dzamər mda, I asəndə ɗəffa mda. I ana hamta watsəɓa aka waskəi kalkal ka halərni, kalkal ka su tə tsa hara.”

¹¹“Mdə na ana hara gəna ka dlərpəkur, tsa ndzi apa ɗika na ana tsətsa thlithli natə aɗi tsa an psə wa. Tsu akwa kustakurərni antə gənarni ata ndəka ka tsa, antə akwa datər mpikari tsa ata nggaɓəla abbər tsa kəgaɓu.”

¹²Təng akwa baɗitari mda ana nar səli aka mbwar vəngkər səli, ar yeru na ata gar na nal ni kamnyar Hyel aɗi anda.

¹³MTHLAKU, ga an sur vəkər ar Israila, shanga mji na ku zhar vəngkər səli ala ga ata ləkwa səli. Mji na ku nggəlar nga, da ata sha apatə thləm tə mdə rəbuta akwa bərbər ana sha, kamnyar tə da ku nggəlar MTHLAKU na ndzi apa jiɓər yimi na yilang.

¹⁴MTHLAKU, mbantə ra antə I ata ndzi lapiya. Msərantə ra antə I ata ndzi msərmsərari, kamnyar ga antə I ana huwa.

¹⁵Mji ana kyartəkur ali ka pəla, “Irmiya, sur thlivərantə mdə natə MTHLAKU pəla ata wutə yeru ni ama ri? Ka tsa haratə ɗa kulini ja!”

¹⁶Amma MTHLAKU, I aɗi kiɗə nga ka gə sənta asar ata kəra ɗa wa. I aɗi mwaɓə ka su ɗimi wutə ɗa wa. MTHLAKU, ga asəndə su tə I pəla.

¹⁷Ga aɗiya ndzi sur thlivərantə ra wa, ga an vəi ɗuwardzərna akwa kəlara vir tə asar wutə ra.

¹⁸Səntə sur səli ata kəra mji na akwa hara bwani ali, amma ka ra msərantə ra ta sur səli MTHLAKU. Nghyantə ɗa ka sur thlivəra, amma ga aɗiya thlivərantə ra wa. Səntə asar ata kəra ɗa ka gə shamta ɗa bwakəma ka bwahili.

¹⁹Antə MTHLAKU pəla ali, “Irmiya, mwari ka ra thləthlata akwa Nyarfur Mji, nyarfu tə kuthlyayeri ar Yahuda ana ləvəi ka səɓəla akwa. Aghəla nda ka gə mwari akwa shanga nyarfayeri ar Urushalima,

²⁰ka gə pəla aka shanga kuthlyayeri ar Yahuda, ka shanga mji na akwa Urushalima na ana ləkwa nyarfayeri ngəni, ka da psi thləm aka su tə I ata pəlari.

²¹Pəla ala ɗa abbər ma da ata bara mpika ɗa, da aɗiya kəl kəla Vir Ghərəmtaghəra wa, wala ləvəi akwa nyarfayeri ar Urushalima wa.

²²Da aɗiya ləɓəla ka kəla avəyar ɗa Vir Ghərəmtaghəra wa, wala hara kəthlər laga wa. Ka da ɓəlatə Vir Ghərəmtaghəra ka namtə ni ɓɗakkarkara apatə I ku tsawa aka kəkayeri arɗa.

²³Amma kəkayeri arɗa aɗi psi thləm ali wa, wala vədzə hangkala ɗa wa. Təng da dzəɓtə thləma ɗa ta da dlu surthlipərna ka kələngkər ali.”

²⁴“Amma ma da ku kələngkər ali, tə da aɗi ləvəi ka kəla akwa nyarfayeri ar bərni ni Vir Ghərəmtaghəra wa, ma da ku ɓəlatə Vir Ghərəmtaghəra ni ɓɗakkarkara kula hara kəthlər,

²⁵tsəɗi ni ata ləkəma ba saka madi. Antə Yahuda ka Urushalima ata ləkəma ka wutə kuthlyayeri ka kwakunayeri na ata ləvəi akwa nyarfayeri ar Urushalima. Kuthlyayeri arɗa ata ndzi ka dunar kuthlikur apa Dauda. Da ata fəl takwayeri ka wagənayeri ar taku ka mwa ata kəma duku kəga mjir Yahuda ka shanga mjir Urushalima. Antə bərni Urushalima ata nghyi ka mji tədəku.

²⁶Mji ata thlata akwa bərniyayeri ar Yahuda ka diyayeri na kalaktə Urushalima ka si. Da ata thlata akwa tsəɗi Benjamin, ka akwa diyayeri na ata kusar garayeri, ka akwa garayeri ka abwar anəm ar Yahuda ka si. Da ata sənta ali saɗaka mbamba, ka saɗakayeri ar mpwa, ka sur shiwur na msəra, ka saɗakayeri ar usa akwa mbwar vəngkər səli.

²⁷Amma ma da aɗi kələngkər ali ka ɓəla Vir Ghərəmtaghəra na ɓɗakkarkara ni, ka zhar ləvəi wala ləɓəla ka kəla akwa nyarfayeri ar Urushalima vir nda wa, I ata hatə u'u ata nyarfayeri ni. Antə U'u ni ata mba har ka mbamta kəyayeri ar kuthlikur na akwa Urushalima, antə mda aɗi na ata mzhi tsiyari wa.”