Read bura-pabir Irmiya 18 Bible Online

Irmiya 18 - bura-pabir bible

Irmiya 18

¹Antə MTHLAKU pəla, ali,

²“Mwari akwa kəi mdər hən tughum, ata vəi tə I ata gari ala ga.”

³Apani antə I ku mwari anda ka wutə mdər hən ni akwa hən tughum.

⁴Kəlara sakatə tsa wuta abbər tughum ni aɗi akwa hən ɓɗaku wa, tsa ana ngkaɓəhə tughum ni ka namtə su damwa ka həi ni na ata kəskərari.

⁵Antə MTHLAKU pəla ali,

⁶“Ka ha, mjir Israila, azha I amzhi hara ka giri apatə mdər hən tughum ana hara ka həi hən tughum na akwa tsiyari ni wa ya? Tsu apatə həi ni akwa tsiya mdər hən tughum antə giri akwa tsi.

⁷Ma I pəla I ata ntsumta tsəɗi laga na ɗimi, wala titiləmta mjirni, wala shamta kuthlikur ni,

⁸amma təng mjir tsəɗi nda zhar surharar ɗa na ɗimi ni, I ata zhar hara su tə I ɗəmha ata kəra tsəɗi ni.

⁹Tsuwa ma I ku pəla I ata nci tsəɗi laga wala kuthlikur laga ka kəlantə ni,

¹⁰amma ma tsəɗi ni ku nggəlar kələngkər ali ka hara ɗimikur, I ata zhar hara su tə I ɗəmhə kamnyar ni ni.

¹¹Antə kulini ka ra pəla aka mjir Yahuda ka shanga mjir Urushalima abbər I akwa ɗəmhə su na ɗimi ata kəra ɗa. Pəla ala ɗa ka da zhar hara ɗimikur, ka da namtə ndzəndziyir ɗa ka hara su na kalkal.

¹²Amma da ata pəla, ‘Awa, ampani su ngəni aɗi wa! Yeru ata hara su tə ɗəffa yeru hira, waskəi ata hara kər ɓəɓalkur apatə tsa hira.’ ”

¹³MTHLAKU akwa pəla, “Yu kəlara dur madi, ma da ku ɗar nggatə su hara apani waci. Urushalima, di na ɓɗaku ar Israila, ku hara su na ɗimi kamta!

¹⁴Garayeri ar Lebanon ku ɗar ndzi kula handzəkəla ya? Zərkayeri na mtathlaku na thlata akwa kər gar, ku ɗar shuwumtadzi ya?

¹⁵Amma mjirna ku fwari ata kəri, da akwa mba tulari ɗuza aka haptayeri, da ku tsamta səla ɗa akwa laku na kalkal, ka akwa laku na waci. Da nu lakur mtakəu laku na aɗi ol wa.

¹⁶Da ku namtə tsəɗi ngəni ka sur thlivəra, tə ka mdə sə ncaɓwiyari ba saka madi. Shanga mji na ata təramta adza ata thlivəra, kamnyar su tə da wuta. Da ata kənggələmta kəra ɗa kamnyar ndatədzi.

¹⁷I ata titiləmta mjirna akəma dawayeri arɗa apa bərbər tə shambar baktalau ana fimta. I ata shinadzə bwahili ala ɗa, I aɗi ata dlar ɗa akwa sakar asar wa.”

¹⁸Antə mji ni pəla, “Asər giri ka mburu səndə su tə mburu ata hara aka Irmiya! Kəlara saka mburu ata mzhi wutə pristayeri na ata thlipa ala mburu su, ka mji na ɗəɗu na ata hamta ala mburu sauri, ka naɓiyayeri na ata ngkər ndərər Hyel. Apani mbura zhar ngga ni, ka mburu thlandər ata kərari.”

¹⁹Antə I hara adduwa aka MTHLAKU abbər, “MTHLAKU, psi thləm bu, ka ra nggatə su tə dawayeri arna akwa pəlari ata kəri.

²⁰Mda ana ntə ɓɗakkur ka ɗimikur ya? Amma da ku lamta ku kamnyar kəi ndla akwa. Ɗangta apatə I ku si ka kiɗə kəra ga ata vəya ɗa, abbər ga aɗiya ndzi ka ɗəffə bwarbwar ata kəra ɗa wa.

²¹Antə kulini, MTHLAKU, ndzi ka maɗa' ɗa kurəmtadzi ka mi. Zhar ka mdə tsəgəi ɗa akwa mpa, ka mwankir ɗa ndzi kula maɗar, kula shili. Zhar ka mji shilər ɗa kurəmtadzi ka shilku, ka maɗadakwi arɗa kurəmtadzi akwa mpa.

²²Ma sakatə ga ku thlentə ka mji famnya kari kutakəyir ɗa, zhar ka kəyayeri arɗa nghyi ka tuwa. Zhar ɗa ka da ɗar bwani, kamnyar da ku lamta kur kəmanggarkur ali ka ngga ali dərku.

²³MTHLAKU, ga asəndə shanga ɗimikur tə da akwa ɗəmhari kamnyar ka da tsi ra. Ga aɗiya fwari ata kəra ɗimikur tə da hara wa. Zhar ka dawayeri arɗa nggyari ɗa, kara ɗi ɗa apatə gə hira akwa ɗəffə bwarbwarkurər nga.”