Read bura-pabir Irmiya 19 Bible Online

Irmiya 19 - bura-pabir bible

Irmiya 19

¹MTHLAKU ku pəla ali kəi ra mastə tughum həi. Aghəla nda kəi fatə mji ol'ola ar kutadi ka pristayeri na ol'ola,

²ka yeru nu Nyarfur Hahi ka mwari akwa Mular Hinnom. Ma yeru ku mzhitə vəi ni kəi jikatə su tə tsa ata pəla ali.

³MTHLAKU ku pəla ali kəi pəla ala ɗa abbər, “Kuthlyayeri ar Yahuda ka mjir Urushalima, I na MTHLAKU na ka duna, Hyelər Israila akwa pəla, I ata sənta asar ata kəra mular ngəni natə kəlara mdə na ku nggata ata kəra su ngəni thləmari ata tuwa wuyang!

⁴I ata hara su ngəni kamnyar tə mjir Israila ku nggəlar ra ka hilantə mular ngəni atar hamta saɗaka aka haptayeri azi. Da akwa nu haptayeri natə da ka kərɗa, wala kəkayeri arɗa, ka kuthlyayeri ar Yahuda aɗi səndə su ata kər wa. Da ku nghyantə mular ngəni ka mamshir mji na kula biku,

⁵ka latə mashiɗu aka Baal kamnyar hamta alari saɗaka mbamba ka maɗa' ɗa. I aɗi tsawa ala ɗa ka da hara su apani wa, tsuwa I aɗi ɗar dzam su apani shang wa.

⁶Antə ka giri sənda abbər aghəlazi mda aɗi ata kəga vəi ngəni Tofeth wala Hinnom kəra wa, mda ata sə kəga vəi ni Mular Tsi Mda.

⁷Akwa vəi ngəni antə I ata sharəmta shanga su tə mjir Yahuda ka Urushalima ku ɗəmha. I ata vu ka dawayeri arɗa nggyari ɗa ka kurəmta ɗa akwa mpa. I ata vu ka ɗikayeri ka mwaɓiyayeri na akwa mtakəu səməmnya mshiyir ɗa.

⁸I ata sənta asar na ɗimi ata kəra bərni Urushalima na ata namtə ni ka tsa ndzi sur thlivəra ka sur kyartəkur. Antə kəlara mdə na ata təramta adza ata yakata ka ncaɓwi.

⁹Dawayeri ar giri ata kalaktə bərni ni kamnyar ka da tsəgəi mji na akwa. Dlər ni ata hara ɗimi kamta har tə susəma ata kura aka mji na akwa bərni ni, antə da ata ɓɗə kərɗa kəga maɗa' ɗa kamnyar mi.”

¹⁰Antə MTHLAKU pəla ali, abbər ma sakatə I ku kuri gari ni, kəi jaɓumta tughum ni akəma mji natə yeru ku si kəga da ni.

¹¹Tsuwa kəi pəla ala ɗa su tə MTHLAKU pəla abbər, “Apatə mdər hən tughum ana jaɓumta tughum, har tə mda amzhi jaktə pakhə ni kəra wa, apani antə I ata shamta mjir Yahuda ka Urushalima. Mji ata harəmta mshiyir ɗa akwa Tofeth kamnyar vəi harəmta ɗa damwa aɗi wa.

¹²Apani antə I ata hara aka Urushalima, ka shanga mji na akwa, kəi namtə ni ka tsa ndzi sur cika tsu apa Tofeth.

¹³Kəyayeri na akwa Urushalima, ka kəyir kuthlyayeri ar Yahuda, ka shanga kəyayeri natə mdə ku mba sur shiwura aka sasəlkayeri ka hamta saɗakar sur sa aka haptayeri ata kəra ɗa ata ndzi sur cika apa Tofeth.”

¹⁴Antə I zhar Tofeth vəi natə MTHLAKU thlentə ra ata abbər kəi ra psəmnya labar arni nda. Antə I mwari ka thləthlata akwa bəbalər mbwar vəngkər səli aka MTHLAKU, ka pəla aka shanga mji,

¹⁵abbər MTHLAKU na ka Duna ta Shang, Hyelər Israila ku pəla, “I ata sənta asarayeri ata kəra Urushalima ka shanga diyayeri na kalaktə ni tsu apatə I ku pəla, kamnyar kəra giri ɓəɓal antə giri ku nggəlar ngga ndərərna.”