Read bura-pabir Irmiya 2 Bible Online

Irmiya 2 - bura-pabir bible

Irmiya 2

¹MTHLAKU ku jaktə gari ali

²kəi ra psəmnya aka shanga mjir Urushalima abbər, “I akwa ɗangtə laku tə giri hir ra sakatə giri maɗangkyar, giri ku hir ra apatə mda ana hir amaliya. Giri ku nu ra akwa mtakər masali, mtakə na aɗi ana ptsantə su wa.

³Israila, giri an mjirna I shira, giri an yarakəmar sur fakərna. Kəlara mdə na ku tsəkwar giri tsa ku hara biku, antə I ata thlenta asar ata kərari. I na MTHLAKU an pəla ngəni.”

⁴Psi gir thləm aka MTHLAKU, giri na kəkar Yakub, shanga giri na mjir Israila.

⁵MTHLAKU akwa pəla, “Man tə I ɓzamta aka kəkayeri ar giri ri tə da hwi ciju kazhar ra ni? Da ku nu haptayeri na an su hilhila, antə da ka kərɗa ku ndzi su hilhila.

⁶Da aɗi damitədzi ka i'i wa, wala tə I an msərantə ɗa akwa tsiya mjir Masar ka pwar ɗa akwa mtakər masali na kula yimi, mtakə na kula ampani ka kuayeri na ɗimi ɗimi, vəi na ul'ulari ka bwaniyayeri hang akwa, vəi tə mda aɗi ana ndzi anda wa, wala nggitə təramta akwa wa.

⁷I ku səntə giri akwa tsəɗi na ka susəma hang, ka giri səm yar sur fakari ka shanga su ɓɗaku na aɗi. Amma səyir giri təng giri hilantə tsəɗi ni, ka namtə ni tə tsa ndzi sur cika.

⁸Wala tə pristayeri an mjir thlipə tsawurna aka mji da aɗi səndə ra wa, antə da aɗi damitədzi ka i'i wa. Mji ol'olər giri ku hara kər ɓəɓalkur ali, naɓiyayeri ar giri ku ndzi wakilər haptu Baal ka shamta sakar ɗa akwa hara suayeri gapangapani.

⁹Kamnyar ngəni I na MTHLAKU ata burkatə giri, ka burkatə kəkayeri ar giri.

¹⁰Mwar giri, ata ɗəɗəgələr Saiprus, ka giri thlentə mda abwar raghəi ka tsa dlarhə tsəɗiyir Kedar. Giri ata wuta abbər jili su apani aɗi ɗar hara wa.

¹¹Mji aɗi na ku ɗar pali haptayeri arɗa ya, wala tə da su ma wa? Amma mjirna ku tsi mdəkurər ɗa ka pali ra, ka nu suayeri na kula dlara.

¹²Antə I tsawa aka shanga vəyayeri na amtazi, ka da yakata ka kədza, ka da ndatədzi ka ul həyak!

¹³Kamnyar mjirna ku hara su na ɗimi pal pal suɗa, da ku fwari ata kəri, I na jiɓər yimi na yilang, ka lamta jiɓayeri aka kəra ɗa, jiɓayeri na ntantari akəsi yimi wa.”

¹⁴“Israila aɗi mafa wa, mda aɗi ya ni akwa mafakur wa. Kamnyar mə tə tsa ndzi susəmər mji ri?

¹⁵Dawayeri arni ku harangkər kuraku aka Israila apa tsəngi, ka namtə tsəɗiyirni apa shizha, bərniyayeri arni ku ndzi fya kula mji akwa.

¹⁶Mjir Masar ata sə thlata ahar Memfis ka Tapanhes, ka si ka shimta kərari.

¹⁷Israila, ga an ndəkərəngkər bwani ngəni aka kəra gə sur nga, ga an fwari ata kəri I na MTHLAKU na Hyelər nga, sakatə I pwar nga akwa laku.

¹⁸Man tə gə tamata abbər ga ata wutari akwa ləhar Masar, ka sa yimər Nayil ri? Man tə gə tamata abbər ga ata wutari akwa mwari ahar Assiriya, ka sa yimər Yufiretis ri?

¹⁹Ɗimikurər nga ata ngka ata kəra ga, antə shinadzə bwahili tə gə hara ali ni ata ɗiɓəla nga. Sakanda antə ga ata sə səndə ɗimikur ka mwavərkur ar fwari ata kəri, ka ɗimikur ar ndzi kula jirkur ali, ga aɗi akwa thlivər ɗəffi wala raka wa. I, na MTHLAKU na ka Duna ta Shang, Hyelər nga, an pəla.”

²⁰MTHLAKU na ka Duna ta Shang akwa pəla, “Israila, təng waci antə gə ɓəli tsawur na ka nthləmta alkawal na akwa daɓwa mwa sakatə gə pəla ga aɗi ata vəngkər ali səli wa. Ata kəra kəlara gar na nal ka akira kəlara nfwa na ka thlali, antə ga ku hara karwakur ka vəngkər səli aka haptayeri.

²¹I ku thləkamta nga apa hwulfər anap na carcara, hwulfa na ɓɗakta shang. Amma wul laku tə ga akwa kulini! Ga ku hili ka ndzi kula ampani apa anapər mtakəu.

²²Ma sakatə kari ku hara diɗi kamta wala sabul na ka Duna ta Shang ana mzhi kəcimtari wa, tsu apani ma biku ku hara ɗimi kamta sur kəɓəlari akwa ɗəffa gə aɗi wa.

²³Apa madi tə har ga ata mzhi pəla ga aɗi dlimbur wa ri, abbər ga aɗi ɗar vəngkər səli aka Baal wa? Ɗangtə jili ɗimikur tə gə hara akwa mular Hinnom ni! Ga ku ndzi apa mwala dləkəmau natə dzari ku thlata akwa bara sal, tə tsa amzhi ndzəndzi ata vəi duku wa, tsa abwani tsa abwa nda.

²⁴Ga ku ndzi apa mwala kwaramtaku na akwa kəl shiwurər bwa tə salari akwa. Mdər mzhi ngkatə ni akwa bara sal aɗi wa, antə sal aɗi na ata bara ni ka bwani wa, kəlara sakar səliyir ɗa tsa aɗi ɗəmhəɗəmhari.

²⁵Israila, ga aɗiya haləmta səla ga wa, wala zhar ka wulya gə ul ka thləli, akwa tətaliyir vəngkər səli aka haptayeri wa. Amma gə pəla ga aɗi ata zharari wa, kamnyar gə hir haptayeri ka duna, antə ga ata nu ɗa.”

²⁶MTHLAKU akwa pəla, “Tsu apatə həla ana ləkwa səli ma mdə ku ngkəi ni, antə shanga giri na mjir Israila, watau kuthlyayeri, ka kwakunayeri, ka pristayeri, ka naɓiyayeri ar giri ata ləkwa sur səli.

²⁷Shanga giri na ana pəla abbər nfwa an baba' giri ka pela an mama'giri, giri ata ləkwa səli. Su ngəni ata hara kamnyar giri ku shinadzə bwahila giri ali. Tar ma sakatə giri ku ləkwa bwani antə giri ata sə bara kəi mbantə giri.

²⁸Kaha, haptayeri tə giri namtə ni ama ri? Ndzi ka da mbuli giri kəlara sakatə giri akwa bwani, ma da amzha! Kamnyar hangkur haptayeri ar giri ku mzhitə hangkur bərniyayeri tə giri kəgari akwa Yahuda.

²⁹Təng tə giri an nggəlar ta kələngkər ali, kamnyar mə tə giri ata jaktə nggungguni ata kəri ri?

³⁰I ku kəɗar ɓu maɗa' giri abbər tsu kəi ɗiɓəla ɗa, amma shang da thliptə su wa. Kamnyar mwavərkurər giri na apa tsəngi ni antə giri ku kurəmta naɓiyayeri arna ka katsakar.”

³¹“Antə kulini, psi giri thləm aka su tə I akwa pəlari. I ku ɗar ndzi ala giri apa mtakəu wala tsəɗi na ka kuthlu pələku ya? Kaha man hara ri tə giri akwa pəla abbər giri ata hara su tə ɗəffa giri hira, ka nggəlta ngka adzə ra nə ri?

³²Ɓzərngkwa ana fwari sur dəɓarni ya, nənga amaliya ana fwari ləptər kəldzərni ri? Amma mjirna ku fwari ata kəri məva ka məvangkər.

³³Giri masəku akwa bara mwala, natə wala mwanki na wuyim ma tar ka da thlipa akəla giri.

³⁴Giri ku tsəgəi mji na kula biku, wala tə da aɗi ɓəl kəyir giri wa, antə mamshir ɗa ku thləpərtə ləptər giri ka tata.” “Amma ba kulini,

³⁵giri akwa pəla, ‘Su aɗi tə yeru ɓzamtə wa, ɗəffa MTHLAKU aɗi ɓza ata kəra yeru wa.’ Antə kulini I na MTHLAKU ata ɗi giri kamnyar giri ku nggəlar kələngkər abbər giri ku hara biku.

³⁶Giri ku namtə kər giri butu kamta atar kadlər pali haptayeri zumzum. Masar ata vu giri akwa səli tsu apatə Assiriya ku hara ala giri.

³⁷Giri ata sə zhar Masar ka tsiya giri ata kəra giri. Kamnyar I na MTHLAKU ku nggəlar mji ngəni tə giri mbərsa ka da ni, antə su aɗi tə giri ata wutari akəla ɗa wa.”