Read bura-pabir Irmiya 20 Bible Online

Irmiya 20 - bura-pabir bible

Irmiya 20

¹Akwa saka ngəni Pashhur na ɓzər Immer an prist na ola ata kəra mbwar vəngkər səli aka MTHLAKU. Tsa ku nggatə suayeri ngəni tə I akwa pəlari ni,

²antə tsa vu tə mdə ku ngkəi ra ka dlaɓu ra ka tsau ra akwa gang kudzəhə ka Nyarfur Benjamin na amta akwa mbwar vəngkər səli.

³Səɓəla ɗəpari aghəla tə Pashhur ku kəɓəla ra akwa gang ni, antə I pəla alari, “MTHLAKU ku pali ala gə thləm, mda aɗi ata kəga nga ‘Pashhur’ kəra wa, amma ‘Sur Thlivəra Akwa Kəlara Bwa.’

⁴Kamnyar MTHLAKU ka kərari akwa pəla, ‘I ata namtə nga sur thlivəra aka kər nga ka aka shanga pazhayeri ar nga. Ga ata wutə laku tə dawayeri ata kurəmta pazhayeri ar nga akwa mpa. Antə shanga mjir Yahuda ata ndzi akira kuthlir Babila. Tsa ata fatə bwadukwa mji ka tsa mwantə ɗa apa mafa akwa tsəɗiyirni, ka tsəgəi mambila ɗa.

⁵Tsuwa, I ata vu ka dawayeri ni famnya shanga gənar bərni ni, ka shanga kari ɗa, ka shanga sur ɗa na ka ampani, purəm kəga gənar kuthlyayeri ar Yahuda, ka mwantə ɗa ahar Babila.

⁶Antə gə na Pashhur, ka shanga mjir kutakəyir nga ata mwari akwa mafakur ahar Babila. Anda antə ga ata mta, ka mdə harəmta nga tsu anda, ata vəi duku kəga pazhayeri ar nga natə ga ku thlandər ala ɗa abbər su aɗi na ata wutə ɗa wa ni.’ ”

⁷MTHLAKU, ga ku pwaktə ra, antə I ku nutə ka sha. Gə ɓəɓal ta iya, antə ga ku mula ali. I ku ndzi sur kumshi aka mji, da ana dli ka təri pci ata kəra kyartəkur ali.

⁸Kəlara sakatə I ata gari, I ana haptə kurakəi, kəi pəla, “Mpa ka asar!” Antə, MTHLAKU, ndərər ngə ngəni tə I ana pəla ni, ku ndəkərəngkər ali nggənggəla ka sur səli surkə pci.

⁹Saka laga I ana pəla, I ata fwari ata kəra ga, MTHLAKU kəi zhar kamnya thləma ga, təng ndərər nga ana ndzi apa u'u, an akwa mba akwa dzi, apa u'u an akwa mba akwa ɗethli. Wala I kəɗar kəi hartə ndər ni akwa ɗəffi, I aɗi ana mzhi wa.

¹⁰I akwa ngga mji akwa gha ra abbər, “Shanga mji akwa thlivər abbər su laga ɗimi ata hara akwa kəlara bwa! Antə mbura burkatə ni akəma alkaliyayeri!” Wala pazhayeri arna na waci akwa sək kəi ndla. Da akwa pəla, “Ma tsa aɗi ngga ngga wa mda ata pwaktəmta ni ai, antə mburu ata ngkəi ni ka mburu ntəmta ɗimikur tə tsa hara ala mburu ni.”

¹¹Amma MTHLAKU, ga andər mpa na ka duna, tsuwa ga ata vəi duku ka iya, apani mji na akwa hara bwani ali da an ata ndla. Da ata ləkwa sur səli na ɗimi, kamnyar da aɗi ata nggyari ra wa. Sur səli ngəni aɗi ata kura ba saka madi wa.

¹²MTHLAKU, na ka Duna, ga səndə mji na ka jirkur, ga səndə su na akwa ɗəffa mda ka hangkala mda. I ku pəla ala gə su na akwa damitə ra, antə usa, ntəmta ali ɗimikur tə dawayeri arna ku hara ali.

¹³Hara gir ha aka MTHLAKU! Hu giri, MTHLAKU! Kamnyar tsa ku msərantə mji na akwa tura, tsa ku msərantə ɗa akwa tsiya mji na ɗimi.

¹⁴I aɗi ata bara ka mdə ɗangtə vir tə mdə ya ra wa! Mda aɗiya jaktə ɗangta ali vir tə mama'na yaɓəla ra wa! Mda aɗiya jika vir ndaga wa!

¹⁵Ka Hyel kəl barkar mdə na səntə labar yarna aka baba'na, mdə na namtə ɗəffari akwa pəla alari abbər, “Albəshir! Mdə ku yaɓəla ala gə ɓzər sal!”

¹⁶Ka mdə ndaga ndzi apa bərniyayeri, natə MTHLAKU ku huzamta kula kətadza. Thlivərantə ni ka kurakər mpa har ka pci təri,

¹⁷kamnyar tsa aɗi tsi ra akəmata mda ayaɓəla ra wa. Ai sakani kuta mama'na ata ndzi kulər na, tə kuta mama'na ata ndzi ola ba saka madi.

¹⁸Kamnyar mə tə mdə yaɓəla ra ri? Təng kamnyar kəi ɗar bwani ka ɗəffi ɓza, kəi sə kuri ndzəndziyirna akwa sur səli?