Read bura-pabir Irmiya 21 Bible Online

Irmiya 21 - bura-pabir bible

Irmiya 21

¹Zedekiya na kuthlir Yahuda ku thlentə ka mdə kəga alari Pashhur na ɓzər Malkiya ka Prist Zafaniya na ɓzər Maaseya ka tsa thlentə ɗa adzə ra. Tsa pəla ka da pəla ali,

²“Nebukadnezzar na kuthlir Babila akwa bara sə dlər yeru. Apani, yuɓəla ala yeru bu akəla MTHLAKU, nuhum tsa ata hir dlar yeru apatə tsa ana hara ala yeru hwatu, ka vu Nebukadnezzar ka tsa shari mpa ni.”

³Antə I pəla ala ɗa ka da ra pəla aka Kuthli Zedekiya na thlentə ɗa adzə ra ni abbər,

⁴“MTHLAKU na Hyelər Israila akwa pəla, ‘I ata vu ka kari mpa tə giri ata bara mpa kuthlir Babila ka sojayeri arni kəgari ni jaktə dəkəi giri. Antə I ata tsaptə shanga kari mpar giri ni ata ɗəffa di.

⁵I ata mpa giri ka duni shang, kamnyar giri ku ɓzamtə ɗəffi ka duna. Antə ɗəffi aɗi wa!

⁶I ata səntə shilku na ɗimi na ata kurəmta shanga mji ka shanga mwaɓi na akwa tsəɗi ngəni.

⁷Amma ar nga, ka kwakunayeri ar nga, ka mji natə mpa aɗi kuri ka da wa, natə mi ka shilku aɗi kurəmta ɗa wa, I ata hamta giri akwa tsiya Kuthli Nebukadnezzar na dawar giri. Antə tsa ata kurəmta giri shang kula kətadzə giri. I na MTHLAKU an pəla ndər ngəni.’ ”

⁸“Tsuwa kəi pəla aka shanga mjir Urushalima abbər, MTHLAKU ku hamta ala ɗa su suɗa: Ka da carɓəla su na ata hara ka da ndzi ka mpikə wala su na ata vu ka da mta.

⁹Mjir Babila ku kalaktə bərni Urushalima ka mpa. Antə kəlara mdə na ku ndzi tsu akwa bərni ni, tsa ata mta akwa mpa, wala atar mi, wala shilku. Amma mdə na ku ləɓəla ka hamta kərni aka mjir Babila tsa aɗi ata mtə wa. Tsa ata msər ka mpikari.

¹⁰Kamnyar I ku vətə kəmi ata Urushalima abbər kəi sənta asar ata kərari, amma aɗi kamnyar ɓɗakkur wa. Kamnyar I ata hamta ni akwa tsiya kuthlir Babila ka tsa ngkərta alari su, ka tsa mbamta ni tuktukku apa pənju. I na MTHLAKU an pəla.”

¹¹MTHLAKU ku pəla ali kəi pəla aka kutakəyir kuthlikur ar Yahuda, natə da an kəkayeri ar Dauda abbər, “Psi gir thləma giri aka su tə I na MTHLAKU akwa pəlari ni. Ka giri wuta abbər waskəi akwa hara su na kalkal aka nvwani tədəku. Dlar giri mji tə mdə ku zambatə ɗa, ka giri msərantə ɗa akwa tsiya mjir hara ala ɗa bwani. Ma apani wa ɗəffi ata ɓza ata kəra giri kamnyar ɗimikur giri, ka mba apa u'u tə mdər tsiyari aɗi wa.”

¹³“Urushalima, gə na andzəndzi amtamta mular, ata bəbal na ata kəra gar. Ɗəffi ku ɓzi adzə nga! Kamnyar mjir nga akwa gaya abbər, ‘Su aɗi na ata wutə yeru ata gar ni wa, wala mzhi ləkwa adzə yeru wa!’

¹⁴Apani I ata ɗi giri ata kəra suayeri tə giri hara ni. I ata hatə u'u ata kəi kuthlikur ar giri, antə tsa ata mbamta shanga su na kalaktə nga.”