Read bura-pabir Irmiya 22 Bible Online

Irmiya 22 - bura-pabir bible

Irmiya 22

¹MTHLAKU ku pəla ali “Ləghəi akwa kəi kuthlikur ar Yahuda, kəi pəla aka kuthli ni,

²‘Gə na ata dəkəl kuthlikur ar Dauda, ka kwakunayeri ar nga, ka shanga mjir Urushalima, ngga giri su tə MTHLAKU pəla.’

³MTHLAKU akwa pəla, ‘Ka giri hara su na kalkal ka jirkur aka kəlara mda kula nca zumzumkur. Ka giri msərantə mjir bwani akwa tsiya mjir hara ala ɗa bwani, ka mjir zambatə ɗa. Giri aɗiya hara su na ɗimi aka mətəpiyayeri, wala mutayeri, wala kughungayeri wa, wala mpa ala ɗa wa. Tsuwa giri aɗiya tsi mda kula suari aɗi akwa vəi ngəni wa.

⁴Jiri, ma giri ku kələngkər ali, tədəku giri ata wutə mda akwa nyarmbwar Dauda na ata ndzi kuthlir Urushalima. Antə kuthlyayeri ata sə ləkəma ka fəl wagənayeri ar taku, ka kwakunayeri kəga mjir ɗa na akwa pwar ɗa.

⁵Amma ma giri aɗi kələngkər aka tsawurna wa, I akwa kahyel abbər kəi kuthlikur ngəni ata sə ndla ka ndzi fya. I, na MTHLAKU an pəla ndər ngəni.’ ”

⁶MTHLAKU akwa pəla, “Kəi kuthlikur ar Yahuda ku ndzi ɓɗaku ali apa tsəɗi Gileyad, ka jikwara Gar Lebanon. Amma I ata shamta giri kəi zhar vəi ni kula mda akwa apa mtakəu.

⁷I ata thlentə mji ka da ra huzamta bərni ni. Da ata si ka kəmayeri arɗa ka da nthləgəmta zhimbwalayeri ar seda na ɓɗakɓɗaku ka pu ɗa akwa u'u.”

⁸Aghəla nda mji hang ata sə təramta adzə bərni ni ka yu nvwa ɗa abbər, “Kamnyar mə tə MTHLAKU hara su apani aka bərni ngəni ol nə ri?”

⁹Antə amsar sur yu ngəni an abbər, “Kamnyar da ku ɓəli alkawal na akwa daɓwa ɗa ka tsa, na Hyelər ɗa, ka vəngkər səli aka haptayeri.”

¹⁰“Gir na mjir Yahuda, giri aɗiya tuwa Kuthli Yosiya wa, giri aɗiya tuwa mtərni wa. Amma tuwa giri ka duna kamnyar ɓzərni Yehowahaz, kamnyar da akwa təra ka tsa, kamnyar tsa aɗi ata jaktə ngka, ka wutə tsəɗi tə mdə yaɓəla ni akwa wa.”

¹¹Kamnyar ngəni an su tə MTHLAKU pəla ata kəra Yehowahaz na ɓzər Yosiya. Yehowahaz ku hara kuthlikur ata kəra Yahuda ata vəya baba'ni Yosiya. Mdə ku kətə Yehowahaz ka təra ka tsa kazhar Urushalima, antə tsa aɗi ngka kəra wa.

¹²Tsa ata mta akwa tsəɗi tə da ku mwantə ni akwa ni, antə tsa aɗi ata jaktə wutə tsəɗi ngəni wa.

¹³Sha ku wutə mdə na ana hən mbwarni ka dlərpəkur, ka mbwayeri arni na amta kula jirkur, mdə na ana vu ntəwulərni ka tsa hara kəthlər gapani, kula nta alari watsəɓərni.

¹⁴Sha ku wutə mdə na ana pəla, “I ata həntə kəyirna na ata nggari, ka kutambwayeri na ol'ola amta, kəi pu windauwayeri na ol'ola hang. Shanga katako ar mbwa ni ata ndzi udzəm seda, antə I ata fəi dza mbwa ni ka həi mamza ɓɗak laga.

¹⁵Amma ɓɗakkur kəi kuthlikurər nga, na təramta shanga kəyayeri ar kuthlikur amzhi namtə nga kuthli na ol wa. Baba nga ku fəi akwa kuthlikur ka nggatə msərakur, kamnyar tə tsa ku hara su na kalkal ka jirkur aka mji, antə shanga su ku mwa alari kalkal.

¹⁶Tsa ku dlar mjir tursu ka mjir bwani, antə shanga su ku mwa alari kalkal. Ngəni an karapur ka mdə səndə MTHLAKU ni.

¹⁷Amma təng gə putə nca ga ka vətə hangkala ga ata sur dlərpəkur, ka tsi mji kula suari aɗi. Ga akwa nar bwani aka mji, ka thlentə hangkala mji ka mpa.”

¹⁸Kamnyar ngəni nggədza su tə MTHLAKU pəla ata kəra Kuthli Yehoyakim, ɓzər Yosiya. “Mda aɗiya tuwa Yehoyakim wa, apatə mji laga ana pəla, ‘Ai ɓzərma'na!’ Wala ‘Ai ngkwarmana,’ wa. Mda aɗiya tuwa ni wala ka pəla abbər, ‘Ai mthlakərna!’ Wala ‘Ai Barkarni,’ wa.

¹⁹Apa kwara antə mda ata harəmta ni, mda ata ndəkər ni ka ra psəmta ni aɓəla anyarfur Urushalima.”

²⁰Mjir Urushalima, mwar giri ahar Lebanon ka giri tuwa ka kuraku, mwar giri ahar Bashan ka giri haptə kuraka giri. Tuwa giri ba akwa garayeri ar Mowab, kamnyar mdə ku kurəmta shanga pazhayeri ar giri.

²¹MTHLAKU ku gari ala gə sakatə shanga su akwa ləkəma ala ga, amma ga aɗi psi thləm wa. Ngəni an su tə ga ana hara təng tə gə ɓzəngkyar, ga aɗi ana kələngkər aka MTHLAKU wa.

²²Apatə baktalau ana təra ka ɓaɓiya, antə mda ata sə fatə mjir pwar giri ka təra ka da. Mda ata sə fatə pazhayeri ar giri, ka mwantə ɗa akwa pərsəna. Aghəla nda giri ata sə nggaɓəla ɗimikurər giri, antə giri ata sə ləkwa səli ka damitədzi.

²³Ga akwa ngga msəra akwa kəi kuthlikur tə mdə nam ka udzəm seda ar Lebanon. Amma ma sakatə bwani ku si ata kəra ga ga ata nggyinggya ka tuwa, apa mwala na akwa kutərya.

²⁴MTHLAKU ku pəla aka Kuthli Yehoyacin, ɓzər Yehoyakim na kuthlir Yahuda abbər, “Apatə I aɗi ka mpika, wala ma ga an lenduwar dunar kuthlikur na ata kulengi, tsu I ata ntsumta nga,

²⁵kəi hamta nga aka mji na akwa bara kəl mpika ga, mji tə ga ana thlivər ɗa. I ata hamta nga aka Nebukadnezzar na kuthlir Babila ka sojayeri arni.

²⁶I ata kədləmta giri ka mama' nga kazhar tsəɗi ngəni. Antə giri ata sə ra mta akwa tsəɗi damwa.

²⁷Giri ata sə nggukə ka giri jaktə ngka akwa tsəɗi ngəni, amma giri aɗi ata ngka wa.”

²⁸Kamnyar mə tə Yehoyacin ndzi apa tughum jaɓjaɓwa tə mdər barari aɗi wa nə ri? An su na hara tə mdə kədləmta ni kəga maɗa'ni ka mwantə ɗa akwa tsəɗi mafakur ni ya, tsəɗi tə da aɗi ka səndə su ata kər wa ni?

²⁹Ai duniya, duniya, duniya! Psi thləma ga aka su tə MTHLAKU pəla,

³⁰“Rəbuta abbər Yehoyacin aɗi ka ɓzər wa, mdər sə dlu tsiyari akwa kuthlikur aɗi wa. Kamnyar ɓzərni aɗi na ata lətə dəkəl kuthlikur ar Dauda wa, wala hara kuthlikur ata kəra Yahuda wa.” I, na MTHLAKU an pəla ndər ngəni.