Read bura-pabir Irmiya 23 Bible Online

Irmiya 23 - bura-pabir bible

Irmiya 23

¹MTHLAKU akwa pəla, “Asar na ɗimi an ata wutə mjir pwara na ana shamta mjirna ka titiləmta ɗa. Da ndzi apa mjir ɓəla na akwa titiləmta ali təmarna ka shamta ɗa!”

²MTHLAKU na Hyelər Israila akwa pəla, kəthlər mjir pwara an ka da wul lapiyakur mji na akira ɗa. Amma ar giri təng giri titiləmta ɗa ka kədləmta ɗa. Giri aɗi damitədzi kamnyar ɗa wa. Antə kulini mburu ata kəɓa kəga giri!

³I ata tsaptə mjirna na ku mbil ka mpika akwa tsəɗiyayeri natə I titiləmta ɗa akwa, kəi ngka ka da akwa tsəɗiyir ɗa. Antə da ata ya maɗangkyar hang ka jakjaka.

⁴I ata na ɗa mjir pwara na ata wulwul ɗa apa mdər ɓəla na pwa. Antə mda aɗi ata thlivərantə ɗa, wala ndəndatə hangkala ɗa kəra wa, tsuwa mda aɗi wala duku na ata sha akwa nca ɗa wa. I na MTHLAKU an pəla ngəni.

⁵MTHLAKU akwa pəla, “Saka ata sə si tə I ata carɓəla ala ɗa kuthli na ka jirkur akwa nyarmbwar Dauda. Kuthli ndaga ata ndzi ɗəɗu, antə tsa ata hara su na kalkal ka jirkur akwa shanga tsəɗi ni.

⁶Akwa zamanər kuthli ngəni, mjir Yahuda ata ndzi lapiya kula sur thlivəra, antə mjir Israila ata ndzi akwa msərmsərkur. Antə mji ata sə kəga thləmari abbər, ‘MTHLAKU AN MDƏR MBANTƏ AR YERU.’ ”

⁷“Saka ata si tə mji aɗi ata sə kahyel ka thləmi abbər, ‘Akwa thləma MTHLAKU na ka mpika na fwaɓəla mjir Israila akwa tsəɗi Masar’ kəra wa.

⁸Amma da ata sə kahyel abbər, ‘Apatə MTHLAKU aɗi, na pwar mjir Israila ka fwaɓəla ɗa akwa tsəɗi na abwar yala ka tsəɗiyayeri damwa natə tsa titiləmta ɗa akwa.’ Antə da ata ndzəndzi akwa tsəɗi na ar kəra ɗa.”

⁹Kəlara sakatə I dzama ata kəra naɓiyayeri, hyali ana nthlə ra, har ka dzi ləkwa kədza yikutyikutu, kamnyar ndər tə MTHLAKU pəla ata kəra ɗa, kamnyar labar arni an ɓɗakkarkara. I ana mwa kələng kələngnga apa mdə na wikəwikari, apa mdə tə yimər anap ku mula alari.

¹⁰Kamnyar tsəɗi ku nghyi ka mji na kula jirkur aka MTHLAKU. Mjir tsəɗi akwa tuwa kamnyar MTHLAKU ku shuwumta tsəɗi ni, antə vəi ɓəla na akwa mtakəu ku uli. Da ana hara su akwa laku na ɗimi, ka kəthlər ka duna akwa laku na aɗi kalkal wa.

¹¹MTHLAKU akwa pəla, “Naɓiyayeri kəga pristayeri aɗi akwa nu tsawur Hyel wa, da akwa hara ɗimikur ba akwa mbwar vəngkər səli ali.

¹²Antə laku tə da akwa nuwari ni ata ndzi ka dlyadlirka ka kuthlu, antə giri ata tsamta səla giri ka ndla. Kamnyar I ata sənta asar ata kəra ɗa akwa sakatə I wuta abbər kalkal kəi ɗi ɗa. I na MTHLAKU an pəla.

¹³I wutə naɓiyayeri na akwa Samariya akwa hara sur shar ɗəffa mda, da akwa ngkər labar akwa thləma haptu Baal, antə da ku shamta mjirna Israila.

¹⁴Amma naɓiyayeri na akwa Urushalima akwa hara su na ɗimi ta ni, da akwa ləka tsuwa da akwa thlandəra. Da andər vərantə mjir hara ɗimikur ni, antə mda aɗi wala duku na ata zhar hara ɗimikur wa. Shanga ɗa ku ndzi ɗimi kamta, da ku ndzi apa mjir Sodom ka Gomora.”

¹⁵Antə nggədza su tə MTHLAKU na ka Duna ta Shang akwa pəlari ata kəra naɓiyayeri na akwa Urushalima. “I ata na ɗa susəma na ɗəɗahəu apa kwarakuta ka da səma, kəi hamta ala ɗa yimər gwar ka da sangkər. Kamnyar su tə naɓiyayeri na akwa Urushalima akwa hara ni, ku titiləmtadzi ka dlarhə shanga duniya.”

¹⁶MTHLAKU na ka Duna ta Shang akwa pəla aka mjir Urushalima abbər, “Giri aɗiya psi thləm aka naɓiyayeri na ana pwaktə giri wa. Da ana nghyantə giri ka labar na msəra daci. Da ana pəla ala giri su tə da kwamta akwa ɗəffa ɗa, amma aɗi su tə I an pəla ala ɗa wa.

¹⁷Da ana kəɗar pəla aka mji na ana rutə ndərərna abbər, ‘Giri aɗiya damitədzi wa! MTHLAKU ku pəla giri ata ndzi akwa msərakur!’ Tsuwa da ana pəla aka mji natə kəra ɗa ɓəɓal, na ana hara su tə ɗəffa ɗa pəla ala ɗa abbər, ‘Asar aɗi na ata wutə giri wa!’ ”

¹⁸Kamnyar mda aɗi akwa nca naɓiyayeri ni na ku ɗar mwari akwa tsaptədzər mji ol'ola tə tsa ana hara amtazi wa. Mda aɗi na ku ɗar nggatə ndərərni ka nggaɓəla wa, wala ɗar psi thləmari aka ndərərni ka vədzə hangkal wa.

¹⁹Antə ɗəffa MTHLAKU ku ɓzi ka duna. Tsa ata si ka ɗəffu apa u'ur bara ka shambar yimi na mwavər, ka pumta ɗəffari ni ata kəra mji na kəmanggar.

²⁰Ɗəffa MTHLAKU aɗi ata pəpəi wa, tar ma tsa ku kuri shanga su tə tsa ɗəmha akwa ɗəffari. Aghəla nda antə mjirni ata sə nggaɓəla karapur suayeri ni ata bəbal.

²¹“I aɗi thlentə naɓiyayeri ngəni wa, amma wala apani tsu da mwari. I aɗi gari ka da wa, amma wala apani tsu da mwari ka gari akwa thləmi.”

²²Ma da an ku ɗar ləkwa tsaptədzi arna na amtazi, sakani da ata jikatə su tə I pəla aka mjirna. Antə sakani da ku zhar hara suayeri na ɗimi ɗimi ni.

²³MTHLAKU pəla, “I an Hyel na bamama, ciju ka kudzəha. I aɗi akwa vəi duku daci wa.

²⁴Mda aɗi na ata mzhi ɗuwardzi kula I wutə ni wa. Nənga giri aɗi sənda abbər I ata kəlara vəi wa ri? I an nghyantə vəi na amtazi ka duniya shang!

²⁵I ku nggatə suayeri tə naɓiyayeri na ana thlandər ni ana pəla. Da ana thlandər ka thləmi abbər I ku gari ala ɗa aviri akwa suni nggwa.

²⁶Nawa antə da ata thləthlatə ka jili thlandərayeri ngəni ri? Mji na pəla abbər da naɓi amma tar ka da pwaktə mji ka thlandər tə da ɗəmha akwa ɗəffa ɗa!

²⁷Da ana wuta apa suni tə da ana ngkər aka mji ni ata vu ka mjirna fwari ata kəri apatə kəkayeri arɗa na waci ku fwari ata kəri ka nu haptu Baal ni.

²⁸Ma naɓi na ku suni ka tsa ngkər suniyirni daci. Amma ma naɓi natə I ku thlentə ni ka ndər, ka tsa psəmnya ndər ni apatə I pəla alari. Nənga man ampaniyir paktə kədla ka mthli ri?

²⁹Ndərərna ka duna swaiswai apa u'u. Tsa ndzi apa gudəma na ana pukthləmta pelayeri na ol'ola ka da ndzi miɗiɗi.”

³⁰Antə I na MTHLAKU akwa pəla, “I aɗi akwa hir naɓiyayeri na ana həl ndər akəla nvwa ɗa ka pəla abbər I an pəla ni wa.

³¹I aɗi akwa hir naɓiyayeri na ana pəla sur kəra ɗa ka pəla abbər I an pəla ni wa.

³²Antə psi gir thləma giri, I aɗi ana hir naɓiyayeri na ana thlandər ka pəla I gari ala ɗa akwa suni ni wa. Da ana dəɓatə suniyir ɗa ka pwaktəmta mjirna ka thlandərayeri ka shamta ɗa. Ata kəra I aɗi thlentə ɗa wala tsawa ala ɗa ka da mwari wa, antə da aɗi ata dlar mji ngəni wala raka wa. I na MTHLAKU an pəla.”

³³MTHLAKU pəla, “Irmiya ma sakatə pal akwa nca naɓiyayeri wala pristayeri ni ku yu nga abbər, ‘Jili kəl madi tə MTHLAKU vəngkər ala gə nə ri?’ Ka gə shinau alari abbər, ‘Ga an kəl ni! Antə I ata psəmta nga!’ I na MTHLAKU an pəla.”

³⁴“Antə ma naɓi laga wala prist wala pal akwa nca mji ni ku pəla, ‘Nggədza labar na thlata akəla MTHLAKU’, to, I ata ɗi mdə ndaga kəga mjir kutakəyirni.

³⁵Antə kuji ka waskəi yu nvwani wala ntəwulərni wala ɓzərma'ni, ‘Man amsar MTHLAKU ri? Wala man su tə MTHLAKU pəla ri?’

³⁶Amma giri aɗiya jaktə kamnya ndərər MTHLAKU wa. Kamnyar mji akwa kəthlər kəgari kamnyar dunautə su tə da kwamtə daci. Nggədza giri akwa ɓzamtə ndərər Hyel na ka mpika, MTHLAKU na ka Duna ta Shang, Hyelər yeru.

³⁷Irmiya, ka gə yu naɓiyayeri ni abbər, ‘Man amsa tə MTHLAKU hamta ala giri ri?’ Wala tsuwa, ‘Man su tə MTHLAKU pəla ri?’

³⁸Antə ma da ku zhar ta kələngkər ali ka jaktə kəthlər ka ‘Kələr MTHLAKU’ ka gə pəla ala ɗa abbər,

³⁹I ata fatə giri kəi haptə giri, kəi pumta giri kazhar vəi tə I ata. I ata təra kazhar bərni ngəni tə I hamta aka kəkayeri ar giri ni.

⁴⁰Antə I ata hara ka giri ndzi sur kyartəkur ka sur səli har ba saka madi, mda aɗi ata fwariyari wa.”