Read bura-pabir Irmiya 24 Bible Online

Irmiya 24 - bura-pabir bible

Irmiya 24

¹MTHLAKU ku ncanta ali thlambəl suɗa ar yar kamndə tə mdə pwi anyarmbwar vəngkər səli alari. Ngəni an aghəla sakatə Nebukadnezzar na kuthlir Babila ku kətə Yehoyacin ɓzər Yehoyakim na kuthlir Yahuda ahar Urushalima ka mwantə ni ahar Babila. Tsa paktə ni kəga mji ol'olər tsəɗi, ka fatə mjir kəthlər tsi ka mjir ɓdla ka mwantə ɗa ahar Babila.

²Mdə nghyantə thlambəl na ntangkəma ka yar kamndə na həng'hari ɓɗakɓɗaku, ng'hə na ntangkəma. Thlambəl na dukwari mdə nghyantə ka yar kamndə na ɗimi ɗimi kamta tə har mda amzhi səmari wa.

³Antə MTHLAKU yu ra abbər, “Irmiya, man tə gə wutə ri?” Antə I shinau abbər, “Yar kamnda. Na ɓɗakɓɗaku ni, da ɓɗak ka duna, na ɗimi ɗimi ni da ɗimi kamta tə mda amzhi kwasari wa.”

⁴Antə MTHLAKU pəla ali,

⁵“I na MTHLAKU na Hyelər Israila ku wuta abbər mji natə mdə ku fatə ka mwanta ahar Babila ni ku ndzi apa yar kamndə na ɓɗakɓɗaku ni, antə I ata wulwul ɗa ka hangkal.

⁶I ata wulwul ɗa kəi ngka ka da akwa tsəɗi ngəni. I ata nci ɗa, I aɗi ata ntsumta ɗa wa. I ata dunautə ɗa, I aɗi ata fəi shaha ɗa wa.

⁷I ata hamta ala ɗa ɗəffər bara səndə ra abbər I an MTHLAKU. Da ata ndzi mjirna antə I ata ndzi Hyelər ɗa, kamnyar da ata ngka adzə ra ka ɗəffa ɗa shang.”

⁸“Amma Zedekiya na kuthlir Yahuda, ka kwakunayeri arni, ka shanga mji na mbila akwa Urushalima ka mji na ra ndzi ahar Masar, I ata namtə ɗa apa yar kamndə na hiɗahiɗari ɗimi tə mda amzhi kwasari wa ni.

⁹I ata sənta asar ata kəra ɗa, asar na ata thlivərantə shanga mjir duniya. Da ata ndzi sur səli ka sur kumshi aka mji, antə mji ata kyartəkur ala ɗa ka nggənggəl ɗa akwa kəlara vəi tə I mwantə ɗa akwa.

¹⁰I ata thlenta ala ɗa dləra, ka mi, ka shilku, tar ma shanga ɗa ku kurəmtadzi akwa tsəɗi tə I hamta ala ɗa kəga kəkayeri arɗa na waci ni.”