Read bura-pabir Irmiya 25 Bible Online

Irmiya 25 - bura-pabir bible

Irmiya 25

¹Akwa məva na nfwarkur tə Yehoyakim na ɓzər Yosiya akwa hara kuthlikur ata kəra Yahuda, antə MTHLAKU ku gari ali ata kəra mjir Yahuda. Ngəni an məva na ntangkəma tə Nebukadnezzar akwa hara kuthlikur ata kəra Babila.

²Antə I pəla aka shanga mjir Yahuda ka Urushalima abbər,

³“Akwa məvayeri pal pal sərkumari ka makər na təramta, watau baɗita akwa məva na kumnya makərkur ar kuthlikur Yosiya na ɓzər Ammon ata kəra Yahuda, ka vədza aka ashina, MTHLAKU akwa gari ali tədəku. Tsuwa tədəku I akwa jikata ala giri ndər ni, amma giri aɗi ana psi thləm wa.

⁴MTHLAKU akwa thlentə naɓiyayeri arni ata kər ata kər, amma giri aɗi ana psi thləm wa, wala vədzə hangkala giri wa.

⁵Parang da akwa pəla ala giri ka giri pali harar giri ka zhar shanga ɗimikur tə giri akwa harari. Apani antə giri ata mzhi ləkəma ka ndzəndzi akwa tsəɗi tə MTHLAKU ku hamta ala giri kəga kəkayeri ar giri ba saka madi.

⁶Giri aɗiya nu haptayeri wa, antə tsa aɗi ata ɗi giri wa. Kamnyar ma giri ku hara, giri ata ɓzamtə ɗəffa MTHLAKU.

⁷Amma MTHLAKU akwa pəla abbər wala apani giri aɗi psi thləm alari wa. Ata vəyari giri ku ɓzamtə ɗəffari ka haptayeri ar giri ka ndəkərəngkər bwani aka kəra giri sur giri.”

⁸“Antə MTHLAKU na ka Duna ta Shang akwa pəla, kulini tə giri aɗi psi thləm alari wa,

⁹I ata thlenta aka shanga durayeri na abwar yala, ka aka buɗarna Nebukadnezzar na kuthlir Babila. I ata vu ka shanga ɗa si ka da dlər mjir Yahuda, ka shanga tsəɗiyayeri na kalaktə ni. I ata vu ka mdə shamta ɗa karkar tə kəlara mdə na wutə su ngəni ata yakata. Antə mjir Yahuda ata sə ndzi sur kumshi ka kyartəkur. I na MTHLAKU an pəla.

¹⁰Tsuwa I ata thləthlatə ka kəlara vir kucali kəga kəldzayeri ar giri. Mda aɗi ata jaktə nggatə yarali tə mda ana hara aka amaliya wala sala mwala wa. Mda aɗi ata jaktə nggatə kuraka bur akwa hadlə kəra wa, wala wutə mdər njiu u'u akwa pitəlayeri aviri kəra wa.

¹¹Tsəɗi ngəni shang ata ndzi fya kula ampani, antə Yahuda ka tsəɗiyayeri na kalaktə ni ata ndzi akira kuthlir Babila məva murfəkumari.

¹²Aghəla tə məvayeri ngəni ku kuri I ata ɗi mjir Babila ka kuthlir ɗa kamnyar bikayeri tə da hara. I ata namtə Babila ka tsa ndzi fya ba saka madi.

¹³I ata sənta asarayeri na ɗimi ɗimi ata kəra Babila apatə I ku pəla aka Irmiya, ka shanga suayeri na ɗimi ɗimi tə I ɗəmha ata kəra tsəɗiyayeri tə mdə ku rəbuta akwa kakaɗə ngəni.

¹⁴I ata ntə shanga ɗimikur tə mjir Babila ku hara, antə tsəɗiyayeri kəga kuthlyayeri na ol'ola ata fatə ɗa ka namtə ɗa mafa.”

¹⁵Antə MTHLAKU na Hyelər Israila ku pəla ali, “Nggədza kwapə tə mdə nghyantə ka ɗəffə bwarbwarkur arna. Kəta ka gə mwanta akwa kəlara tsəɗi tə I thlentə nga akwa, ka mjir tsəɗi nda sa.

¹⁶Ma da ku sa akwa antə da ata wika ka hara su apa da ka cicu kamnyar mpa tə I ata thlenta ala ɗa ni.”

¹⁷Antə I dlu kwapə ni akəla MTHLAKU, ka mwari akwa tsəɗiyayeri tə tsa thlentə ra akwa ni, ka vu tə kəlara mjir tsəɗi ku sa akwa.

¹⁸Antə I baɗitə ka mjir Yahuda natə da an mjir Hyel, tə shanga mjir Urushalima ka diyayeri na akwa Yahuda, kuthlyayeri kəga mji ol'olər ɗa ku sa. Antə diyayeri ni ku ndzi fya na ndlandlari apa zawar mbwa, kula mda akwa, tə mji ana ncaɓwi ka hara kyartəkur ala ɗa ba ata vir na ashina.

¹⁹Aghəla nda antə I ləhar Masar ka gari ala ɗa, antə shanga mji, watau kuthlir Masar, kəga kwakunayeri arni, ka mjir kəthlər akirari, ka shanga mambila mjir Masar ku sa akwa kwapə ni,

²⁰purəm kəga mətəpiyayeri na ka ndzi akwa tsəɗi nda. Aghəla nda antə I mwari adzə kuthlir Uz, kambəla mwari adzə shanga kuthlyayeri ar Ashkelon, ka Gaza, ka Ekron, ka mambila mjir Ashdod shang na akwa tsəɗi Filistiya.

²¹Thlatər na anda antə I mwari akwa tsəɗiyayeri ar Edom, ka Mowab, ka Ammon,

²²ka mwari adzə shanga kuthlyayeri na akwa Taya ka na akwa Sidon, ka kuthlyayeri ar tsəɗiyayeri na aɓəla bwanda Yimi na Ola.

²³Aghəla nda antə I mwari ahar Dedan, ka Tema, ka Buz ka shanga mji na ana pamta shishir kuɗəmar kəra ɗa, na akwa mtakəu ciju.

²⁴I ku mwari adzə kuthlyayeri ar Arabiya, ka shanga kuthlyayeri ar durayeri damwa na akwa mtakəu,

²⁵ka shanga kuthlyayeri na akwa Zimri, ka Elam, ka Mediya.

²⁶I ku mwari adzə shanga kuthlyayeri na abwar yala, na ciju ka na kudzəha. I ku mwari akwa shanga tsəɗiyayeri na akwa duniya ni ata ata. Na aghəl ta shang I mwari ahar Babila, antə kuthlir Babila tsuwa ku sa akwa kwapə ni.

²⁷“Antə MTHLAKU pəla ali, ‘Pəla ala ɗa abbər I, na MTHLAKU na ka Duna ta Shang, Hyelər Israila akwa tsawa ala ɗa abbər, Sa giri akwa kwapə ngəni. Antə tsa ata vu ka giri wika ka tapəra. Antə ma sakatə I ku thlentə mpa na mwavər ata kəra giri, mpa ni ata mula ala giri.’

²⁸Antə ma da nggəlar dlu kwapə ni akwa tsiya ga ka da sa akwa, ka ra pəla ala ɗa abbər MTHLAKU na ka Duna ta Shang ku pəla dwali ka giri sa akwa!

²⁹Kamnyar I ata baɗitə ɗi Urushalima, bərni na arna. Antə apa madi tə bwadukwa tsəɗiyayeri ni ata tamata abbər arɗa mda ata zhar ɗa ri? I ata thlentə dləra ata kəra shanga mji na akwa duniya. I na MTHLAKU na ka Duna ta Shang an pəla.”

³⁰Ar nga Irmiya, ka gə psəmnya aka mji shanga su tə I pəla. Ka gə pəla, “MTHLAKU ata ndər akwa vəi na amtazi ka kuraku, tsa ata dlər ka kuraku akwa vəi ndzəndziyirni na amta ta shang. Tsa ata nggyinggya ka duna kamnyar mpa aka mjirni, tsa ata hara kuraku apa mjir ntsar yimər anap, antə kəlara mdə na akwa duniya ata nggatə ni.

³¹Antə mda ata nggatə kuraka MTHLAKU ba akwa datər duniya, kamnyar tsa ata burkatə shanga mji. Tsa ata səntə shanga mji akwa shariya ka tsa tsəgəi mji na ɗimi ɗimi. I na MTHLAKU an pəla.”

³²MTHLAKU na ka Duna ta Shang akwa pəla abbər asar ka bwani ata si ata kəra tsəɗiyayeri ata ata, antə shambar yimi na mwavər ata thlatə ciju akwa datər duniya.

³³Vir ndaga MTHLAKU ata kurəmta shanga mji na akwa duniya, tə mshiyir mji ata ndzi leɓleɓu. Mda aɗi wala duku na ata mbil ka tuwa ɗa wa, wala mdər tsaptə ɗa aɗi wa, zhar ka harəmta ɗa wa. Mshiyir ɗa ata hartə kəra di apa kuɓa.

³⁴“Tuwa giri diya mjir ɓəla na ɗimi! Tuwa giri, giri na mjir pwar mjirna ka giri takəla akwa pənju, kamnyar saka ku hara tə mda ata thlamta wulya giri! Antə giri ata ndzi apa gamayeri tə mdə thlagamta wulya ɗa, apa tughum na ata təri ka jaɓumtadzi

³⁵Giri aɗi ata wutə vəi ɗuwardzi wala hwiyimta su ngəni wa.

³⁶Ngga giri mjir ɓəla akwa tuwa kamnyar bwani. Ngga giri mji na ol'olər ciɓa akwa jaɓtuwa! Kamnyar MTHLAKU akwa hilantə tsəɗiyir ɗa.

³⁷Kamnyar sakatə ɗəffa MTHLAKU ku ɓzi ka duna antə tsa ku ɓdləmta tsəɗiyir giri na lapiya ni.

³⁸MTHLAKU ku təra kazhar mjirni apatə tsəngi ana təra ka zhar kurni. Kamnyar thlivər dləra, ka thlivər bwarbwarkur ɗəffa MTHLAKU antə mji ku hwi tə tsəɗi ni ku ndzi mtakəu kula mji.”